ઓખા, મીઠાપુર, દ્વારકા, ખંભાળીયા, હાપા, જામનગર, રાજકોટ, મોરબી, વાંકાનેર, થાન, સુરેન્દ્રનગર સહિત ડિવિઝનની દરેક કોલોનીઓમાં લીકવીડ કલોરીનના પ્રયોગ સાથે સેનીટાઈઝેશન કરાયું
“સ્વચ્છતા પખવાડીયા અંતર્ગત રાજકોટ વિભાગની તમામ રેલ્વે કોલોનીમાં મેડિકલ વિભાગ દ્વારા મોટા પાયે સફાઇ અને સેનિટાઈઝેશનની કામગીરી કરવામાં આવી છે. રાજકોટ વિભાગના સિનિયર ડીસીએમ અભિનવ જેફના જણાવ્યા અનુસાર ચેપને લીધે થતાં રોગોના ફેલાવાને રોકવા માટે રેલ્વે દ્વારા અનેક પગલા લેવામાં આવ્યા છે. ઓખા, મીઠાપુર, દ્વારકા, ખંભાળીયા, હાપા, જામનગર, રાજકોટ, મોરબી, વાંકાનેર, થેન્હ, સુરેન્દ્રનગર સહિતના વિભાગની તમામ રેલ્વે કોલોનીમાં લીકવીડ ક્લોરીનનો પ્રયોગ કરીને સેનેટાઈઝીંગની કામગીરી હાથ ધરવામાં આવી હતી. તબીબી વિભાગના આરોગ્ય નિરીક્ષક અને આરોગ્ય કર્મચારીઓ દ્વારા આરોગ્ય સ્વચ્છતા હાથ ધરવામાં આવી છે. મચ્છરોને મારવા માટે, ફોગિંગ દ્વારા દવાનો છંટકાવ કરવામાં આવી રહ્યો છે. સ્થિર પાણીમાં ખીલતા મચ્છરોના લાર્વાનો નાશ કરવા માટે એન્ટિ લાર્વા સ્પ્રે કરવામાં આવી રહ્યું છે. ખુલ્લી ગટરોની સફાઈ કરવામાં આવી છે અને વહેતા પાણીની પ્રક્રિયા સુચારૂ રીતે ચાલે તે માટે આસપાસની ઘાસ અને બાવળોને દૂર કરવામાં આવ્યા છે. વરસાદનું પાણી જ્યાં જ્યાં જમા થયું હતું ત્યાં દવાઓનો છંટકાવ કરવામાં આવ્યો છે. વર્તમાન પરિસ્થિતિને જોતા રેલ કર્મીઓ તથા તેના પરિજનોને કોરોનાથી બચાવવા મેડિકલ વિભાગ દ્વારા જરૂરી માર્ગદર્શન આપવામાં આવી રહ્યું છે. કોલોનીમાં બીમારીઓથી બચાવ સંબંધીત પોસ્ટર લગાવામાં આવ્યા છે તથા પેમ્પલેટસનું પણ વિતરણ કરવામાં આવ્યું છે.
