કુસ્તીબાજો તરફથી એફઆઈઆર નોંધવાની માંગ કરતી અરજી દાખલ થઈ હતી, એફઆઈઆર દાખલ થઈ ગઈ છે હવે તેઓ નીચલી કોર્ટમાં જઈ શકે છે : સુપ્રીમ
સુપ્રીમ કોર્ટમાં ધરણા પર બેઠેલી મહિલા રેસલરોને મોટો ફટકો પડ્યો છે. સુપ્રીમ કોર્ટે ગુરુવારે આ મામલે વધુ સુનાવણી હાથ ધરવાનો ઈન્કાર કરી દીધો છે. કોર્ટે કહ્યું કે કુસ્તીબાજો તરફથી એફઆઈઆર નોંધવાની માંગ કરતી અરજી દાખલ કરવામાં આવી હતી. હવે પોલીસે આ મામલે બે એફઆઈઆર નોંધી છે, આ કેસમાં વધુ સુનાવણી અટકી છે.હવે તેઓએ નીચલી કોર્ટમાં જવું જોઈએ.
સુનાવણી દરમિયાન ચીફ જસ્ટિસની બેંચે કહ્યું કે અરજીનો હેતુ એફઆઈઆરને લઈને હતો જે નોંધવામાં આવી છે. આ મામલો હવે મેજિસ્ટ્રેટ સમક્ષ છે અને જો કોઈ મુદ્દો હોય તો હાઈકોર્ટમાં જવાની સ્વતંત્રતા છે. આજની સુનાવણી દરમિયાન ભારત સરકારના સોલિસિટર જનરલ તુષાર મહેતાએ મહિલા કુસ્તીબાજોની સુરક્ષા માટે લેવામાં આવેલા પગલા વિશે માહિતી આપી હતી. આ સાથે જ કોર્ટે આરોપીને મેજિસ્ટ્રેટ કોર્ટમાં રજૂ કરવા અંગે પણ સવાલ ઉઠાવ્યા હતા. જંતર-મંતર પર કુસ્તીબાજો સાથેની ગઈકાલની ઘટના પર, સોલિસિટર જનરલે સ્પષ્ટતા કરી હતી કે કેટલાક રાજકીય પક્ષના લોકો પથારીઓ લઈ ગયા હતા. ત્યારબાદ મારામારી થઈ હતી. એકપણ પોલીસ કર્મચારીએ દારૂ પીધો ન હતો. તમામની મેડિકલ તપાસ કરવામાં આવી છે. વિરોધ સ્થળ પર કુસ્તીબાજો માટે સુરક્ષા વ્યવસ્થા કરવામાં આવી છે.
તેમણે વધુમાં જણાવ્યું કે કુસ્તીબાજોની સુરક્ષા માટે જંતર-મંતર પર ત્રણ સશસ્ત્ર પોલીસ તૈનાત છે. સુનાવણી દરમિયાન ચીફ જસ્ટિસે પૂછ્યું કે એફઆઈઆર નોંધ્યા બાદ આરોપીને મેજિસ્ટ્રેટ સમક્ષ રજૂ કરવાની કાર્યવાહી કરવામાં આવી? પ્રશ્નના જવાબમાં મહેતાએ કહ્યું કે તપાસ ચાલુ છે.
બીજી તરફ બ્રિજ ભૂષણ વતી એડવોકેટ હરીશ સાલ્વે કોર્ટમાં હાજર થયા હતા. પોતાની દલીલો આપતા સાલ્વેએ કહ્યું કે રેસલિંગ ફેડરેશનના પ્રમુખ સામે કોઈ કેસ કરવામાં આવતો નથી. કેસની સુનાવણી દરમિયાન અમારી બાજુ પણ સાંભળવામાં આવી ન હતી. એકસપાર્ટી ઓર્ડર આપવામાં આવ્યો હતો.
છેલ્લી સુનાવણીમાં, સરકારને સાંસદ બ્રજભૂષણ શરણ સિંહ વિરુદ્ધ એફઆઈઆર નોંધવાનું કહેવામાં આવ્યું હતું અને તે પછી બે એફઆઈઆર નોંધવામાં આવી હતી. આ કેસની સુનાવણી જસ્ટિસ ડીવાય ચંદ્રચુડની બેન્ચ કરી રહી છે.
