રોજગારી સહિત આર્થિક ક્ષેત્રે અનેક પડકારો ઉભા થવાની શક્યતા!!
અબતક, સાણંદ
ફોર્ડ ઈન્ડિયાએ ભારતમાં પોતાનું મેન્યુફેક્ચરિંગ બંધ કરવાની આજે જાહેરાત કરતાં જ ઓટોમોબાઈલ ઉદ્યોગમાં ખળભળાટ મચી રહ્યો છે. ફોર્ડનું એક પ્રોડક્શન યુનિટ સાણંદમાં પણ આવેલું છે, જેને કંપનીએ તાળાં મારવાની તૈયારી કરી લીધી છે. કંપની દ્વારા જણાવાયું છે કે, સાણંદ પ્લાન્ટને 2021ના ચોથા ક્વાર્ટર સુધીમાં બંધ કરી દેવાશે, જ્યારે ચેન્નૈ પ્લાન્ટને 2022 ક્વાર્ટરના બીજા ક્વાર્ટર સુધીમાં બંધ કરી દેવાશે. સાણંદમાં ફોર્ડનો પ્લાન્ટ માર્ચ 2015માં શરુ થયો હતો. તે વખતે રાજ્યના સીએમ આનંદીબેન પટેલ પણ તેના ઉદ્ઘાટનમાં મોજૂદ રહ્યાં હતાં.
ફોર્ડ ઇન્ડિયાની જાહેરાતને કારણે ગુજરાત સરકારની ચિંતામાં પણ વધારો થયો છે. સૌરાષ્ટ્ર ઓટોમોબાઈલ ક્ષેત્રનું હબ માનવામાં આવે છે. જેના થકી ફક્ત આર્થિક ઉપાર્જન કે વિદેશી હૂંડિયામણ જ નહીં પરંતુ રોજગારી પણ મોટી માત્રામાં મળે છે ત્યારે જો ઓટોમોબાઈલ ક્ષેત્ર પીછેહઠ કરે તો રાજ્યમાં રોજગારી સહિતના અનેક પ્રશ્નો ઉભા થઇ શકે છે.
કંપનીના જણાવ્યા અનુસાર, તેણે આ બંને પ્લાન્ટમાં ગાડીઓનું ઉત્પાદન પણ અટકાવી દીધું છે. છેલ્લા 10 વર્ષમાં ફોર્ડે 2 અબજ ડોલરની ખોટ કરી છે, જ્યારે 2019માં તેણે 0.8 અબજ ડોલરની મિલકતોની માંડવાળ કરી હતી. ફોર્ડ પોતાની પોપ્યુલર કાર્સની આયાત કરીને તેનું વેચાણ ચાલુ રાખશે. ફોર્ડના આ નિર્ણયથી કંપનીમાં કામ કરતાં ચાર હજાર જેટલા કર્મચારીઓની નોકરી પર તલવાર લટકી રહી છે. આ સિવાય તેના દ્વારા પરોક્ષ રીતે રોજગારી મેળવતા મોટી સંખ્યામાં લોકો પણ બેરોજગાર થઈ જશે.
ફોર્ડ હાલ ભારતમાં ફિગો, એસ્પાયર, ફ્રીસ્ટાઈલ, ઈકોસ્પોર્ટ અને એન્ડેવર જેવી કાર્સ વેચે છે. હાલ તેનો જેટલો પણ સ્ટોક છે તેનું વેચાણ પૂરું થયા બાદ તેનું વેચાણ અટકાવી દેવાશે. ફોર્ડ ઈન્ડિયાના એમડી અને પ્રેસિડેન્ટ અનુરાગ મલ્હોત્રાના જણાવ્યા અનુસાર, કંપની પોતાના હાલના કસ્ટમર્સની સંભાળ લેવાનું ચાલુ રાખશે. આ સિવાય ફોર્ડ ડીલર્સ સાથે પણ સંપર્કમાં છે.
ઉલ્લેખનીય છે કે, આ પહેલા અમેરિકન કંપની જનરલ મોટર્સે પણ ભારતમાંથી પોતાના ઉચાળા ભર્યા હતા. ભારત ગાડીઓનાં સૌથી મોટા બજારમાંનું એક ગણાય છે, પરંતુ દેશના માર્કેટ પર મારુતિ, હ્યુન્ડાઈ, ટાટા જેવી કંપનીઓનો ભારે દબદબો છે. તેમાંય અડધાથી વધુ માર્કેટ તો માત્ર મારુતિ પાસે જ છે. જેની સસ્તી અને ભારતીયોને પરવડે તેવી કાર બનાવવાની મહારથને આજ સુધી બીજી કોઈ કંપની પહોંચી નથી શકી.
ફોર્ડ દ્વારા છેલ્લા ઘણા સમયથી પોતાનું કામકાજ સમેટી લેવા માટે વિચારણા કરવામાં આવી રહી હતી. તેણે પોતાનો બિઝનેસ અન્ય કાર કંપનીને વેચવા માટે પણ પ્રયાસ કર્યા હતા, પરંતુ તેનું કોઈ પરિણામ નહોતું આવી શક્યું. અનેક પ્રયાસો બાદ પણ કંપનીનું વેચાણ ના વધતા તેમજ ખોટમાંથી પણ બહાર ના આવી શકાતા આખરે તેણે ભારતીય બજારમાંથી એક્ઝિટ લેવાનો આખરી નિર્ણય કરી લીધો છે. તેના કેવા પ્રત્યાઘાતો પડે છે તે જોવાનું રહેશે, કારણકે જનરલ મોટર્સે જ્યારે પોતાનો પ્લાન્ટ બંધ કર્યો ત્યારે કામદારોના યુનિયન દ્વારા તેનો ભારે વિરોધ કરાયો હતો. કર્મચારીઓ દ્વારા સતત વિરોધ કરાઈ રહ્યો છે. કર્મચારીઓની માંગ છે કે પ્લાન્ટ બંધ કરવામાં આવે નહીં અન્યથા પ્લાન્ટ બંધ કરાય તો કર્મચારીઓને વૈકલ્પિક નોકરીની વ્યવસ્થા કરી આપવામાં આવે.
