પામ તેલમાં સર્જાયેલી અંધાધૂંધી શેમ્પૂ, સાબુ, ટૂથપેસ્ટ, વિટામિન ટેબ્લેટ, કોસ્મેટિક ઉત્પાદનો, કેક અને ચોકલેટ સહિતની પ્રોડક્ટમાં ભાવ વધારો ઝીંકે તેવી શકયતા
દેશમાં ખાદ્યતેલના આસમાની કિંમતો વચ્ચે ઈન્ડોનેશિયા 28 એપ્રિલથી પામ ઓઈલની નિકાસ બંધ કરી રહ્યું છે. આ નિર્ણયની સૌથી વધુ અસર ભારત પર પડશે કારણ કે ભારત અડધાથી વધુ પામ ઓઈલની જરૂરિયાત ઈન્ડોનેશિયાથી ખરીદે છે. પામ ઓઈલના મોંઘવારીથી માત્ર ખાદ્યતેલ જ મોંઘા થશે એટલું જ નહીં શેમ્પૂ-સાબુથી લઈને કેક, બિસ્કીટ અને ચોકલેટના ભાવ પણ વધશે.
નિષ્ણાતોએ જણાવ્યું કે ઘણા તેલમાં પામ ઓઈલ ભેળવવામાં આવે છે કારણ કે તેમાં સુગંધ નથી હોતી. એફએમસીજી અને કોસ્મેટિક્સ કંપનીઓ પણ મોટી માત્રામાં પામ ઓઈલનો ઉપયોગ કરે છે. ભારત લગભગ 9 મિલિયન ટન પામ ઓઈલ ખરીદે છે. તેમાંથી 70 ટકા પામ ઓઈલ ઈન્ડોનેશિયાથી આયાત કરવામાં આવે છે. ઈન્ડોનેશિયામાંથી પામ ઓઈલની નિકાસ બંધ થયા બાદ મલેશિયા પર નિર્ભરતા વધશે.
પામ તેલ એ સમગ્ર વિશ્વમાં સૌથી વધુ લોકપ્રિય વનસ્પતિ તેલ છે. વિશ્વભરમાં લગભગ 50 ટકા ઘરગથ્થુ ઉત્પાદનોમાં તેનો ઉપયોગ થાય છે. પામ તેલનો સૌથી વધુ ઉપયોગ રસોઈ તેલ તરીકે થાય છે. તેનો ઉપયોગ શેમ્પૂ, નહાવાના સાબુ, ટૂથપેસ્ટ, વિટામિન ટેબ્લેટ, કોસ્મેટિક ઉત્પાદનો, કેક અને ચોકલેટ વગેરેમાં પણ થાય છે.
હાલમાં ઇન્ડોનેશિયાના સ્થાનિક બજારમાં રસોઈમાં વપરાતા તેલની કિંમતમાં લગભગ 40 થી 50 ટકાનો વધારો થયો છે.ખાદ્ય તેલ રિફાઇનરી કંપનીના એક અધિકારીએ જણાવ્યું હતું કે સૂર્યમુખી અને સોયાબીન તેલ પહેલેથી જ યુક્રેન યુદ્ધના દબાણ હેઠળ છે. જો ઈન્ડોનેશિયાના તેલ પરના પ્રતિબંધનો ઝડપથી નિકાલ કરવામાં નહીં આવે તો તેની ભારે વિપરીત અસર થશે.
સરકારે જલ્દી ઇન્ડોનેશિયા સાથે વાત કરવી જોઈએ: એસઇએ
ખાદ્ય તેલ ઉદ્યોગના સંગઠન સોલવન્ટ એક્સટ્રેક્ટર એસોસિએશન ઓફ ઈન્ડિયાએ ઈન્ડોનેશિયા દ્વારા પામ ઓઈલની નિકાસ પરના પ્રસ્તાવિત પ્રતિબંધ અંગે સરકારી સ્તરે તાત્કાલિક વાતચીતનું સૂચન કર્યું છે. એસઇએના ના ડાયરેક્ટર જનરલ બી.વી. મહેતાએ જણાવ્યું હતું કે ઇન્ડોનેશિયાના નિર્ણયની આપણા સ્થાનિક બજાર પર ગંભીર પ્રતિકૂળ અસર પડશે કારણ કે પામ તેલની કુલ આયાતનો અડધો ભાગ ત્યાંથી આવે છે. આ ખાલીપો કોઈ પુરી શકતું નથી. તેથી, અમે આ બાબતે કેન્દ્રીય ખાદ્ય મંત્રાલયના સંપર્કમાં છીએ.
કઈ પ્રખ્યાત કંપનીઓ પામતેલનો વપરાશ કરે છે?
હિન્દુસ્તાન યુનિલિવર: કંપનીએ 2016માં કહ્યું હતું કે તે દર વર્ષે તેના ઉત્પાદનોમાં 10 લાખ ટન ક્રૂડ પામ ઓઈલનો ઉપયોગ કરે છે. કંપની સાબુ, શેમ્પૂ, ક્રીમ, ફેસ વોશ સહિત ડઝનેક કોસ્મેટિક પ્રોડક્ટ્સ બનાવે છે.
નેસ્લે: કિટકેટ ચોકલેટ નિર્માતા કંપનીએ 2020માં 4.53 લાખ ટન પામ ઓઈલ ખરીદ્યું હતું. તેમાંથી મોટા ભાગની ઇન્ડોનેશિયાથી ખરીદી કરવામાં આવી હતી, જ્યારે કેટલીક મલેશિયાથી આયાત કરવામાં આવી હતી.
પ્રોક્ટર એન્ડ ગેમ્બલ: કંપનીએ 2020-21માં 6.05 લાખ ટન પામ તેલ ખરીદ્યું હતું. મોટેભાગે ઘરની સંભાળ અને સૌંદર્ય પ્રસાધનો ઉત્પાદનો બનાવવામાં વપરાય છે.
મોન્ડેલેઝ ઇન્ટરનેશનલ: ઓરીઓ બિસ્કિટ બનાવતી કંપની પણ તેના ઉત્પાદનોમાં ઉપયોગ કરવા માટે મોટા જથ્થામાં પામ તેલ ખરીદે છે.
લોરિયલ: કંપની તેના ઉત્પાદનોમાં પામ તેલનો ઉપયોગ કરે છે. તેણે 2021માં તેના ઉત્પાદનોમાં 310 ટન પામ તેલનો ઉપયોગ કર્યો હતો.
