- 33 રાજ્યોના પરિણામ જાહેર, 21માં રિપબ્લિકન પાર્ટીના ડોનાલ્ડ ટ્રમ્પ અને 12માં ડેમોક્રેટિક પાર્ટીના કમલા હેરિસનો વિજય: વિશ્ર્વભરમાં ભારે ઉત્તેજના
આમ તો અમેરિકા ઘણું વિકસિત છે. ત્યાં સ્ત્રીને સંપૂર્ણ સ્વતંત્રતા છે પણ અત્યાર સુધી ત્યાં મહિલા રાષ્ટ્રપતિનું સાશન આવ્યુ નથી. ત્યારે વિશ્વભરની નજર એના ઉપર છે કે શું અમેરિકાને પ્રથમ મહિલા રાષ્ટ્રપતિ મળશે કે ’ટ્રમ્પ’કાર્ડ ચાલશે ? રાષ્ટ્રપતિની ચૂંટણીમાં મતદાન પૂર્ણ થતાની સાથે જ પરિણામ આવવાનું શરૂ થઈ ગયું છે. અત્યાર સુધીમાં 33 રાજ્યોના પરિણામ આવી ચૂક્યા છે. જેમાંથી 21માં રિપબ્લિકન પાર્ટીના ડોનાલ્ડ ટ્રમ્પ અને 12માં ડેમોક્રેટિક પાર્ટીના કમલા હેરિસનો વિજય થયો છે.
અત્યાર સુધી મતદાનમાં કોઈ મોટો ફેરફાર થયો નથી. ડેમોક્રેટ્સને વફાદાર રાજ્યએ કમલાને જીત અપાવી છે. જ્યારે, ડોનાલ્ડ ટ્રમ્પ રિપબ્લિકન પાર્ટીના વફાદાર રાજ્યમાંથી જીતી રહ્યા છે. જ્યાં સુધી 7 સ્વિંગ રાજ્યોના પરિણામો ન આવે ત્યાં સુધી કોઈપણ પક્ષ જીતનો દાવો કરી શકે નહીં. સ્વિંગ સ્ટેટ્સ એવા રાજ્યો છે જ્યાં બંને પક્ષો વચ્ચે વોટ માર્જિન ખૂબ જ ઓછું છે. આ કોઈપણ રીતે જઈ શકે છે. આ રાજ્યોમાં 93 સીટો છે. 538 ઈલેક્ટોરલ વોટ એટલે કે અમેરિકાના 50 રાજ્યોમાં સીટો માટે વોટિંગ ભારતીય સમય અનુસાર મંગળવારે સાંજે 4 વાગ્યે શરૂ થયું અને આજે સવારે 9:30 વાગ્યા સુધી ચાલ્યું. રાષ્ટ્રપતિની ચૂંટણીની સાથે સાથે અમેરિકી સંસદના બંને ગૃહો, સેનેટ અને હાઉસ ઓફ રિપ્રેઝન્ટેટિવ માટે પણ ચૂંટણી યોજાઈ છે. આમાં પણ ટ્રમ્પની પાર્ટી રિપબ્લિકન આગળ છે. જો ટ્રમ્પ આ ચૂંટણી જીતશે તો તેઓ 4 વર્ષ બાદ વ્હાઇટ હાઉસ પરત ફરશે. ટ્રમ્પ 2017 થી 2021 સુધી રાષ્ટ્રપતિ હતા. આ સાથે જ જો કમલા હેરિસ જીતશે તો તેઓ પ્રથમ મહિલા રાષ્ટ્રપતિ બનીને ઈતિહાસ રચશે. હાલમાં તે અમેરિકાના ઉપરાષ્ટ્રપતિ છે.
અધિકારીઓના જણાવ્યા અનુસાર, પ્રી-વોટિંગમાં 8 કરોડથી વધુ અમેરિકન નાગરિકોએ પોસ્ટ અને ઈ-મેલ દ્વારા મતદાન કર્યું હતું. 5 નવેમ્બરે કેટલા અમેરિકનોએ મતદાન કર્યું અને ટકાવારી કેટલી હતી તેના સત્તાવાર આંકડા જાહેર કરવામાં આવ્યા હતા.
મને આત્મવિશ્ર્વાસ છે, અમે જીતીશું: ટ્રમ્પ
ભૂતપૂર્વ રાષ્ટ્રપતિ અને રિપબ્લિકન ઉમેદવાર ડોનાલ્ડ ટ્રમ્પે પ્રમુખપદની ચૂંટણી માટે ફ્લોરિડામાં પોતાનો મત આપ્યો. તેમની પત્ની મેલાનિયા ટ્રમ્પ સાથે ફ્લોરિડામાં તેમના ઘરની નજીક આવેલા પામ બીચ પર મતદાન કરવા પહોંચ્યા હતા. વોટિંગ પછી ટ્રમ્પે કહ્યું કે તેમને વિશ્વાસ છે કે તેઓ ચૂંટણી જીતશે અને હરીફાઈ બહુ નજીક નહીં હોય ટ્રમ્પે કહ્યું, “હું ખૂબ જ આત્મવિશ્વાસ અનુભવું છું.” તેણે કહ્યું કે મેં સાંભળ્યું છે કે અમે દરેક જગ્યાએ ખૂબ સારું પ્રદર્શન કરી રહ્યા છીએ. ડોનાલ્ડ ટ્રમ્પે કહ્યું કે તે ત્રણેય અભિયાનોમાં શ્રેષ્ઠ છે.
