આવનાર દિવસોમાં જોવા જેવી થવાના એંધાણ: અધ્યક્ષ પદ માટે સુપ્રિયા સુલે અને અજિત પવારમાંથી કોણ બાજી મારશે તેના ઉપર સૌની મીટ
રાષ્ટ્રવાદી કોંગ્રેસ પાર્ટીના પ્રમુખ શરદ પવારે જાહેરાત કરી છે કે તેઓ પાર્ટીના રાષ્ટ્રીય અધ્યક્ષ પદ પરથી રાજીનામું આપી રહ્યા છે. પવારે કહ્યું કે હવે હું ઈચ્છું છું કે એનસીપીની જવાબદારી કોઈ અન્ય સંભાળે. મેં ઘણા વર્ષોથી પાર્ટીની જવાબદારી નિભાવી છે અને હવે હું પાર્ટીનું નેતૃત્વ કરવા માંગતો નથી. તેમણે કહ્યું કે તેઓ રાજકારણમાં સક્રિય રહેશે, પરંતુ પાર્ટી અધ્યક્ષ પદ પરથી નિવૃત્ત થવા માંગે છે.
શરદ પવારની આ જાહેરાત બાદ હવે સવાલ એ ઊભો થયો છે કે પવાર આ પદ કોને સોંપવા જઈ રહ્યા છે. વાસ્તવમાં અજિત પવારને પણ એનસીપી અધ્યક્ષ પદ માટે પ્રતિસ્પર્ધી તરીકે જોવામાં આવે છે. તે જ સમયે, શરદ પવારની પુત્રી સુપ્રિયા સુલેને પવારની ઉત્તરાધિકારી માનવામાં આવે છે. આવી સ્થિતિમાં આગામી સમયમાં પાર્ટી અધ્યક્ષની લડાઈ રસપ્રદ બની શકે છે.
ગયા સપ્તાહની શરૂઆતમાં, પવારે મુંબઈમાં આયોજિત યુવા મંથન કાર્યક્રમમાં રોટલી ફેરવવાની વાત કરી હતી. પવારે કહ્યું, ’મને કોઈએ કહ્યું કે રોટલી યોગ્ય સમયે ફેરવવી પડે છે અને જો યોગ્ય સમયે ન ફેરવવામાં આવે તો તે બળી જાય છે. હવે રોટલી ફેરવવાનો યોગ્ય સમય આવી ગયો છે, તેમાં કોઈ વિલંબ ન કરવો જોઈએ. આ સંદર્ભે હું પાર્ટીના વરિષ્ઠ નેતાઓને તેના પર કામ કરવા વિનંતી કરીશ.
પવારનું નિવેદન એવા સમયે આવ્યું છે જ્યારે તેમના ભત્રીજા અને એનસીપી નેતા અજિત પવારના નવા રાજકીય પગલા અંગે અટકળો ચાલી રહી છે. દાવો કરવામાં આવી રહ્યો છે કે તેઓ ભાજપ સાથે હાથ મિલાવશે. જો કે અજિત પવારે પણ આ અટકળોને ફગાવી દીધી છે.
