વિપક્ષનો એક સાંધે ત્યાં તેર તૂટે તેવો ઘાટ
પશ્ચિમ બંગાળમાં યોજાનારી પંચાયત ચૂંટણી પહેલા કોંગ્રેસ અને સીપીએમએ હાથ મિલાવતા મમતા બેનર્જી ઉકળી ઉઠ્યા
ભાજપના વિજય રથને આગળ ધપતો રોકવા એકમાત્ર ઉપાય વિપક્ષી એકતા છે. આ માટે અનેક વિપક્ષોએ પહેલ શરૂ કરી દીધી છે. પણ કમનસીબે તેમાં એક સાંધે ત્યાં તેર તૂટે તેવો ઘાટ સર્જાયો છે. કારણકે વિપક્ષી એકતા માટેની અગત્યની બેઠક પૂર્વે જ કોંગ્રેસ અને તૃણમૂલ કોંગ્રેસ વચ્ચેના મતભેદ ખુલ્લા પડ્યા છે.
પશ્ચિમ બંગાળમાં યોજાનારી પંચાયત ચૂંટણી પહેલા કોંગ્રેસ અને સીપીએમએ હાથ મિલાવ્યા છે. મમતા બેનર્જીએ હવે બંગાળ પંચાયત ચૂંટણીને પગલે નોમિનેશનને લઈને ચાલી રહેલા ઘર્ષણ પર મોટું નિવેદન આપ્યું છે. તેમણે કહ્યું કે જેઓ આજે કહી રહ્યા છે કે બંગાળમાં શાંતિ નથી. હું તેમને પૂછવા માંગુ છું કે સીપીએમના શાસન દરમિયાન શું શાંતિ હતી. કોંગ્રેસ પર નિશાન સાધતા મમતા બેનર્જીએ કહ્યું કે કોંગ્રેસ પાર્ટી ઘણા રાજ્યોમાં સરકારમાં છે. એક તરફ તેઓ સંસદ ચલાવવામાં અમારો સહયોગ માંગી રહ્યા છે. બીજી તરફ આપણા લોકો પર હુમલા થઈ રહ્યા છે.
તેમણે કહ્યું કે અમે ભારતીય જનતા પાર્ટી વિરુદ્ધ કોંગ્રેસ પાર્ટીને સમર્થન આપવા તૈયાર છીએ. પરંતુ સીપીએમ સાથે હાથ મિલાવ્યા પછી, બંગાળમાં અમારો સહકાર ન માગો. તેમણે કહ્યું કે કોંગ્રેસ ભાજપના ખોળામાં બેઠી છે અને ભાજપ કોંગ્રેસના ખોળામાં બેઠી છે. સીએમ મમતાએ કહ્યું કે ગઈકાલ સુધી પંચાયત ચૂંટણી માટે 2 લાખ 31 હજાર નોમિનેશન થયા છે. આમાંથી ટીએમસી પાસે 82 હજાર નોમિનેશન છે. પરંતુ વિરોધ પક્ષે લગભગ 1.5 લાખ નોમિનેશન કર્યા છે. બીજી તરફ ભાજપ પર તેમણે કહ્યું કે ભાજપના મોટાભાગના લોકો ચોર અને ડાકુ છે. જો તમે અમને લાકડીઓ વડે રોકવાનો પ્રયાસ કરશો તો અમે અમારા ધ્વજનો ઉપયોગ કરીને વિરોધ કરીશું.
નોંધનીય છે કે, 15 જૂન, ગુરૂવારે નોમિનેશન દરમિયાન અથડામણના સમાચાર સામે આવ્યા હતા. આ દરમિયાન ફાયરિંગમાં એક વ્યક્તિનું મોત થયું હતું, જ્યારે આ ઘટનામાં બે લોકો ઘાયલ થયા હતા. આ પછી, પંચાયત ચૂંટણી પહેલા, કલકત્તા હાઈકોર્ટે રાજ્ય ચૂંટણી પંચને કેન્દ્રીય ગૃહ મંત્રાલયને રાજ્યમાં કેન્દ્રીય સશસ્ત્ર દળોની તૈનાતી માટે પત્ર લખીને 48 કલાકની અંદર તેમની તૈનાતીની માંગણી કરવાનો આદેશ આપ્યો હતો. ભાજપ અને અન્ય પક્ષોએ આ નિર્ણયને આવકાર્યો છે. પરંતુ મમતા સરકારે આ અંગે તીખી પ્રતિક્રિયા આપી છે. તૃણમૂલ કોંગ્રેસના નેતા મદન મિત્રાએ કહ્યું કે હવે પાર્ટી લડવા તેમજ કેન્દ્રીય દળો અને તેમના ત્રાસનો સામનો કરવા તૈયાર છે.
