વોર્ડ નં.૮ની અનેક સોસાયટીમાં પાણી વિતરણ નિર્ધારીત સમય કરતા દોઢ કલાક મોડુ: ગૃહિણીઓમાં દેકારો
શહેરના વોર્ડ નં.૮માં અમીન માર્ગ પર સાગર ટાવર પાસે આજે વહેલી સવારે એર લોકના કારણે પાણીની પાઈપ લાઈનમાં ધડાકાભેર ભંગાણ સર્જાયું હતું. જેના કારણે વિતરણ વ્યવસ ખોરવાઈ જવા પામી હતી. સર્વત્ર વિસ્તારમાં જળબંબાકાર જેવી સ્થિતિ સર્જાઈ જવા પામી હતી. અનેક સોસાયટીઓમાં નિર્ધારીત સમય કરતા દોઢ કલાક પાણી વિતરણ મોડુ કરવામાં આવતા ગૃહિણીઓમાં ભારે દેકારો બોલી ગયો હતો.
આ અંગે પ્રાપ્ત થતી વધુ વિગત મુજબ આજે સવારે અમીન માર્ગ પર સાગર ટાવર પાસે એમએસ લાઈનમાં એરલોકના કારણે ભંગાણ સર્જાયું હતું. તાત્કાલીક રિપેરીંગ કામગીરી શરૂ કરી દેવામાં આવી હતી. પાઈપ લાઈન તૂટતા છેક જનકલ્યાણ સોસાયટી સુધી પાણી પહોંચ્યા હતા. પાઈપ લાઈન તૂટવાના કારણે કોટેચાનગર, હરિહર સોસાયટી, નૂતન નગર, નાલંદ સોસાયટી, નાલંદ પાર્ક, હિંગળાજ નગર, સૂર્યા પાર્ક, આમ કુંજ સોસાયટી, વિદ્યાકુંજ સોસાયટી, જાનકી પાર્ક, ટાગોર નગર, અજૂર્ન પાર્ક, કિંગ્સ લેન્ડ, એસ્ટ્રોન સોસાયટી અને પંચવટી સોસાયટી સહિતના વિસ્તારોમાં નિર્ધારીત સમય કરતા દોઢ કલાક પાણી વિતરણ મોડુ કરવામાં આવતા દેકારો બોલી ગયો હતો.
