ફિનિક્સ પક્ષીની જેમ વોડાફોન ઉડાન ભરવા સજ્જ

• એક આઈડિયા દુનિયા બદલ દે
• વોડાફોન આઈડિયાએ હરાજીમાં રૂ.3510 કરોડના ખર્ચે કુલ 30 મેગાહર્ટઝ સ્પેક્ટ્રમ ખરીદ્યું : કંપની હવે 4જીના વધુ ગ્રાહકો ઉમેરવા માટે સક્ષમ બનશે

એક સમયે અનેક સમસ્યાઓથી ઘેરાઈને પડી ભાંગવાની આરે પહોંચેલું વોડાફોન આઈડિયા હવે ફિનિક્સ પક્ષીની જેમ ફરી બેઠું થઈને મોટી ઉડાન ભરવા સજ્જ થઈ ગયું છે. વોડાફોન આઈડિયાએ હરાજીમાંથી 1800 એમએચઝેડ અને 2500 એમએચઝેડ બેન્ડમાં નવા 4જી સ્પેક્ટ્રમની ખરીદી કરી છે. જેને કારણે તેના 4જી નેટવર્કમાં ઘણો સુધારો આવશે.

રૂ. 6,856 કરોડની બિડ સાથે, ભારતી એરટેલ સ્પેક્ટ્રમની સૌથી મોટી ખરીદદાર હતી અને તેણે 97 મેગાહર્ટ્ઝની ખરીદી કરી હતી. ટેલિકોમ માર્કેટની દિગ્ગજ કંપની રિલાયન્સ જિયોએ રૂ. 973 કરોડમાં 14.4 મેગાહર્ટ્ઝ સ્પેક્ટ્રમ ખરીદ્યું છે. વોડાફોન આઈડિયાએ એ 30 એમએચઝેડ બેન્ડમાં 3,510.4 કરોડ રૂપિયામાં સ્પેક્ટ્રમ ખરીદ્યું. “જ્યારે તેને બે સર્કલમાં 900 એમએચઝેડ  રિન્યુઅલના પડકારનો સામનો કરવો પડ્યો હતો, ત્યારે વોડાફોન આઈડિયાએ અન્ય સાત સર્કલમાં આ બેન્ડમાં સ્પેક્ટ્રમ મેળવ્યું છે,” આઈઆઈએફએલ સિક્યોરિટીઝે ગુરુવારે એક વિશ્લેષક અહેવાલમાં જણાવ્યું હતું. આમાંના ઘણા બેન્ડમાં, વોડાફોને 1.2 એમએચઝેડ અથવા 2.4 એમએચઝેડ જેવા સ્પેક્ટ્રમની થોડી માત્રા લીધી.  આ સ્પેક્ટ્રમનો ઉપયોગ 2જી ટ્રાફિક પાર્ક કરવા માટે થઈ શકે છે અને કંપનીને વધુ 4જી ગ્રાહકો ઉમેરવા માટે સક્ષમ બનાવી શકે છે. કોટક ઇન્સ્ટિટ્યૂશનલ સિક્યોરિટીઝે જણાવ્યું હતું કે નેટવર્ક ક્ષમતા સુધારવા માટે વોડાફોન આઈડિયાએ મધ્યપ્રદેશ અને બિહાર સર્કલમાં મિડ-બેન્ડમાં સ્પેક્ટ્રમ પણ મેળવ્યું છે, જે નેટવર્ક અનુભવને સુધારશે.  તેમાં કહેવામાં આવ્યું છે કે એરટેલ પાસે હવે 10 સર્કલમાં ઓછામાં ઓછા 10 મેગાહર્ટ્ઝ સબ-ગીગાહર્ટ્ઝ સ્પેક્ટ્રમ છે, જે જીઓ સામેની તેની સ્પર્ધામાં વધુ વધારો કરે છે.

જોકે, વિશ્લેષકોનું કહેવું છે કે સ્પેક્ટ્રમની હરાજીમાં આ સફળતા બાદ ત્રણેય ઓપરેટરો વચ્ચેની સ્પર્ધામાં કોઈ ખાસ ફેરફાર થશે નહીં.  જીઓ અને ભારતી પહેલેથી જ સેક્ટરની 78 ટકા આવક સંયુક્ત રીતે નિયંત્રિત કરે છે.

શેરના ભાવ રૂ.18.50 સાથે 5 વર્ષની ટોચે પહોંચ્યા
વોડાફોન આઈડિયાના શેર રૂ. 18.50એ તેના છેલ્લા 5 વર્ષના સર્વોચ્ચ સ્તરે પહોંચી ગઉઆ છે.આ વધારો ટ્રેડિંગના જંગી વોલ્યુમ વચ્ચે થયો છે. કંપનીનો સ્ટોક 29 માર્ચ, 2019 પછી પ્રથમ વખત આટલો ઊંચો ગયો છે, જે રાઇટ્સ ઇશ્યૂના બીજા દિવસે હતો.  ગઈકાલે ટ્રેડિંગના અંતે વોડાફોન આઈડિયાનો શેર 2.77%ના વધારા સાથે રૂ. 18.52 પર બંધ થયો હતો.

આ મહિને જૂનમાં અત્યાર સુધીમાં, વોડાફોન આઈડિયાના શેરોએ 21% વધીને બજારને પાછળ રાખી દીધું છે.  સરખામણીમાં, આ સમયગાળામાં બીએસઇ સેન્સેક્સ માત્ર 7% ઉપર છે.  આ મહિનાની તેજી સાથે, વોડાફોન આઈડિયાની બજાર કિંમત તેની ફોલો-ઓન પબ્લિક ઑફર કિંમત રૂ.11 પ્રતિ શેર સામે 68% વધી છે.  એપ્રિલમાં કંપનીએ એફપીઓ દ્વારા 18,000 કરોડ રૂપિયા એકત્ર કર્યા હતા.

આ વર્ષે અત્યાર સુધીમાં 2024 સુધીમાં, કંપનીએ ઇક્વિટી તરીકે આશરે રૂ. 24,000 કરોડ એકત્ર કર્યા છે. વધુમાં, કંપની રૂ. 25,000 કરોડ સુધીની લોન એકત્ર કરવા માટે તેના ધિરાણકર્તાઓ સાથે વાતચીત કરી રહી છે.

વોડાફોન આઈડિયાનું કહેવું છે કે સ્પેક્ટ્રમ ખરીદવા અને ફંડ (ઈક્વિટી અને ડેટ બંને) એકત્ર કરવાથી કંપનીને તેની વ્યૂહરચના લાગુ કરવામાં મદદ મળશે.  આ વ્યૂહરચનામાં 4જી કવરેજનું વિસ્તરણ અને 5જી સેવાઓની રજૂઆતનો સમાવેશ થાય છે.  આનાથી કંપની ભારતીય વાયરલેસ ક્ષેત્રમાં મોટી અને મહત્વપૂર્ણ તકોમાં ભાગ લઈ શકશે.

કંપનીનું કહેવું છે કે 31 માર્ચ, 2024 સુધીમાં તેની પાસે 21.26 કરોડનો મજબૂત ગ્રાહક આધાર છે, 1 અબજથી વધુ ભારતીયોની 4જી પહોંચ, સ્પર્ધાત્મક સ્પેક્ટ્રમ પ્રોફાઇલ, વ્યાપક વિતરણ નેટવર્ક અને મજબૂત બ્રાન્ડ તેમજ અલગ-અલગ ડિજિટલ ઓફરિંગ્સ છે. તેના આધારે તે બજારમાં અસરકારક રીતે સ્પર્ધા કરવા તૈયાર છે.