- ઇન્ડિયન રેયોન સહિતની કંપનીઓના સહકારને બિરદાવાયા
- વેરાવળ શહેરમાં ફરવા લાયક સ્થળોના વિકાસમાં ઇન્ડીયન રેયોન સહિતની કંપનીઓના સહયોગને બિરદાવવામાં આવી રહ્યું છે.
- વેરાવળ ચોપાટી વિકાસ કામોનું કલેક્ટરે ખાતમુહુર્ત કરાવ્યું હતું.
વેરાવળ ચોપાટી ખાતે કલેક્ટર બંગલોની પાછળથી ચોપાટી સુધી આવી શકાય તે પ્રકારે સુરેખ બીચ બનાવવાનું આયોજન જિલ્લા તંત્ર દ્વારા આયોજન હાથ ધરવામાં આવ્યું છે. જિલ્લા કલેક્ટર દિગ્વિજયસિંહ જાડેજાએ વેરાવળ ચોપાટી ખાતે ઈન્ડિયન રેયોનના સહયોગથી નિર્માણ પામનાર બ્યૂટીફિકેશન, પેવરબ્લોક સહિતના કામોનું વૈદિક મંત્રોચ્ચાર વચ્ચે ખાતમૂહુર્ત અને ભૂમિપૂજન કર્યું હતું.
વેરાવળ ચોપાટી ખાતે બ્યૂટીફિકેશન સહિતના કામો કરવા માટે વેરાવળ ખાતે કાર્યરત ઈન્ડિયન રેયોન કંપનીએ જે હકારાત્મકતા દર્શાવી છે. તે બીરદાવવા લાયક છે. રાજ્યમાં કાર્યરત કંપનીઓ નાગરિક સુવિધાઓ પણ ઉભી થાય તે માટે જે પ્રકલ્પો આયોજીત કરે છે. તેના કારણે આજે રાજ્ય દેશના વિકસિત રાજ્યો પૈકીનું એક બન્યું છે.
ઈન્ડિયન રેયોનના યુનિટ હેડ અને પ્રેસિડન્ટ શશાંક પરીખે જણાવ્યું હતું કે, કોઈપણ કંપનીનો ધ્યેય માત્ર નફો કરવાનું નથી હોતું પરંતુ સમાજનું કલ્યાણ થાય તેવું દાયીત્વ પણ કંપનીઓએ નિભાવવું જોઈએ. અમારી કંપની વર્ષોથી આ શહેરમાં કાર્યરત છે. ત્યારે શહેરના બ્યૂટીફિકેશનમાં વધારો થાય તે માટે અમારી કંપની મદદ માટે હંમેશા તૈયાર હોય છે. આમ કહી તેમણે વહીવટી તંત્રના સહકારથી વધુ ને વધુ વિકાસના કામોમાં સહયોગ આપવા પ્રત્યે પ્રતિબદ્ધતા દર્શાવી હતી.
આ ખાતમૂહુર્ત પ્રસંગે વેરાવળ-પાટણ સંયુક્ત નગરપાલિકા પ્રમુખ પલ્લવીબહેન જાની, નિવાસી અધિક કલેક્ટર રાજેશ આલ, પ્રાંત અધિકારી વિનોદ જોશી, ચીફ ઓફિસર પરમાર, વાઈસ પ્રેસિડન્ટ ક્રિષ્ના ગનેરીવાલ, લાઈઝનિંગ હેડ લક્ષેસ ગૌસ્વામી, સિવિલ ઓફિસર મુકેશ પરમાર સહિત નાગરિકો ઉપસ્થિત રહ્યાં હતાં.
