તુવેરદાળના ભાવ 40 ટકા વધતા સરકાર સતર્ક થઈ ગઈ છે. દાળના સરેરાશ ભાવ 112થી વધીને 158એ પહોંચ્યા છે. જેને પગલે આવતા દિવસોમાં ભાવને કાબુમાં લેવા સરકાર ખરીદી વધારી તેનો સ્ટોક વધારીને 10 લાખ મેટ્રિક ટને પહોંચાડશે.
સરકાર તુવેર દાળની ખરીદી વધારીને લગભગ 10 લાખ મેટ્રિક ટનનો સ્ટોક કરવાની તૈયારી કરી રહી છે, એક વર્ષમાં જ્યારે તુવેર દાળના વાવેતરનો વિસ્તાર ઘટ્યો હોય અને ઉત્પાદન ઘટ્યું હોય ત્યારે કોમોડિટીના ભાવ નિયંત્રણમાં રહે તે માટે સરકારે પ્રયાસ હાથ ધર્યા છે.
સરેરાશ ભાવ 112થી વધીને 158એ પહોંચ્યા : આવતા દિવસોમાં ભાવને કાબુમાં લેવા સરકાર સ્ટોક વધારીને 10 લાખ મેટ્રિક ટને પહોંચાડશે
સરકારી ડેટા અનુસાર, તુવેર દાળની છૂટક કિંમત ગયા વર્ષના રૂ. 112 પ્રતિ કિલોથી 40% વધીને આ વર્ષે રૂ. 158 પ્રતિ કિલો થઈ ગઈ છે. કઠોળનો છૂટક ફુગાવો ઓક્ટોબરમાં એક કેટેગરી તરીકે વધીને 18.79% થયો હતો, જેનું મુખ્ય કારણ તુવેર, ચણા અને મગના ભાવમાં તીવ્ર વધારો છે, જ્યારે ખાદ્ય ફુગાવો તે જ મહિનામાં 6.61% હતો. માર્ચમાં તુવેર પરની આયાત જકાત નાબૂદ કરીને આફ્રિકન દેશો અને બર્મામાંથી આયાત વધારવાના સરકારના પ્રયાસો છતાં આવી સ્થિતિ છે.
એક અધિકારીએ જણાવ્યું હતું કે પ્રાઇસ સ્ટેબિલાઇઝેશન ફંડ દ્વારા બજાર દરો પર ખરીદી કરવામાં આવશે, જે ન્યૂનતમ સમર્થન કિંમત કરતા ઘણી વધારે છે.
ખરીદી સીધી ખેડૂતો પાસેથી પ્રાપ્તિ એજન્સીઓ દ્વારા કરવામાં આવશે – નેશનલ એગ્રીકલ્ચરલ કોઓપરેટિવ માર્કેટિંગ ફેડરેશન ઓફ ઈન્ડિયા અને નેશનલ કોઓપરેટિવ કન્ઝ્યુમર્સ ફેડરેશન ઓફ ઈન્ડિયા લિમિટેડ અને સીઝનની શરૂઆતમાં જ શરૂ થશે. આ પાક બજારમાં આવવાનું શરૂ થઈ ગયું છે, એમ અધિકારીએ જણાવ્યું હતું.
ઓક્ટોબરમાં કૃષિ અને ખેડૂત કલ્યાણ મંત્રાલય દ્વારા બહાર પાડવામાં આવેલા પ્રથમ આગોતરા અંદાજ મુજબ, તુવેરનું ઉત્પાદન 34.21 લાખ મેટ્રિક ટન હોવાનો અંદાજ છે, જે ગયા વર્ષના ઉત્પાદન કરતાં થોડો ઓછો છે. આનાથી ખેડૂતોને એક સંદેશ જશે કે બજારમાં ખાતરીપૂર્વક ખરીદનાર છે.
તુવેરનું વાવેતર ઘટ્યું હોવાથી ભાવમાં ઉછાળો
ખરીફ સિઝનમાં તુવેરનો વાવેતર વિસ્તાર ઘટ્યો હતો, જેના કારણે ઉત્પાદનમાં ઘટાડો થયો હતો, જેના પરિણામે છેલ્લા કેટલાક મહિનામાં ખાદ્ય ફુગાવો વધ્યો હતો. સરકારી ડેટા અનુસાર, તુવેરનો વાવેતર વિસ્તાર 29 સપ્ટેમ્બર, 2022ના 46.13 લાખ હેક્ટરથી ઘટીને 29 સપ્ટેમ્બર, 2023ના રોજ 43.87 લાખ હેક્ટર થઈ ગયો છે.
