માલદીવ સાથેના વિવાદ બાદ હવે દેશવાસીઓએ લક્ષદ્રીપ ઉપર નજર માંડી છે. જેને કારણે હવે સરકારે પણ લક્ષદ્રીપને વધુ આકર્ષક બનાવવા કમર કસી છે. જેમાં સરકારે નવું એરપોર્ટ બનાવવા અને એર કનેક્ટિવિટી સુધારવા પગલાં લેવાનું શરૂ કરી દીધું છે. બીજી તરફ નવી હોટેલો બનાવવા કંપનીઓએ પણ કતારો લગાવી છે.
સરકારે નવું એરપોર્ટ બનાવા અને એર કનેક્ટિવિટી સુધારવા કમર કસી: નવી હોટેલો બનાવવા કંપનીઓએ પણ કતારો લગાવી
લક્ષદ્વીપને લઈને વડાપ્રધાન નરેન્દ્ર મોદીની સરકારની અલગ યોજના છે. ભારત સરકાર લક્ષદ્વીપના મિનિકોય ટાપુઓ પર નવું એરપોર્ટ બનાવવા જઈ રહી છે. જ્યાંથી ફાઈટર જેટ, મિલિટરી એરક્રાફ્ટ અને કોમર્શિયલ એરક્રાફ્ટ પણ ઓપરેટ કરવામાં આવશે. અહીં ડ્યુઅલ પર્પઝ એરફિલ્ડ હશે. આ સિવાય નાગરિક વિમાન પણ અહીં આવીને જઈ શકશે. ઉપરાંત, અન્ય લશ્કરી વિમાનોનું લેન્ડિંગ અને ટેકઓફ શક્ય બનશે.
ભારતીય હોટેલ કંપનીઓનું કહેવું છે કે તેઓ લક્ષદ્વીપમાં વધુ સાઇટ્સ શોધી રહ્યા છે. તાજે પહેલેથી જ જાહેરાત કરી છે કે તે 2026 સુધીમાં લક્ષદ્વીપના સુહેલી અને કદમત ટાપુઓમાં નવી હોટેલો ખોલશે. વહીવટીતંત્ર અરબી સમુદ્ર દ્વીપસમૂહમાં વધુ ક્રુઝ પ્રવાસન માટે પણ પ્રયાસ કરી રહ્યું છે.
ઉપરાંત, એર કનેક્ટિવિટી સુધારવાના પણ પ્રયાસો શરૂ થઈ ગયા છે. એલાયન્સ એર – એકમાત્ર ભારતીય એરલાઈન જે લક્ષદ્વીપ સુધી એર ફેર ઓપરેટ કરે છે – તેની તમામ કોચી-અગાટી-કોચી ફ્લાઈટ્સ છે – જે દ્વીપસમૂહનો એકમાત્ર હવાઈ માર્ગ છે. હવે ત્યાં ફ્લાઇટ્સ ઉમેરવાનું વિચારી રહી છે. બીજી તરફ માલદીવમાં એકલા દેશી એરલાઇન્સ દ્વારા વિવિધ ભારતીય શહેરોમાંથી લગભગ 60 સાપ્તાહિક ફ્લાઇટ્સ છે.
બાંગારામ એક ખૂબ જ પ્રીમિયમ આઇલેન્ડ રિસોર્ટ છે જેમાં એપ્રિલ 2023 સુધી 32 રૂમ હતા. જો કે, હવે ક્ષમતા બમણી કરીને 64 પ્રીમિયમ રૂમ કરવામાં આવ્યા છે. સુહેલી અને કામત ટાપુઓમાં તમામ આધુનિક સુવિધાઓ સાથેના પ્રીમિયમ રિસોર્ટનું નિર્માણ કરવામાં આવી રહ્યું છે. આ ઉપરાંત, અગાટી અને કાવારત્તી ટાપુઓમાં નવા ટેન્ટ સિટી આવી રહ્યા છે. જ્યારે લક્ષદ્વીપમાં ગુજરાતની જેમ દારૂ ઉપર પ્રતિબંધ છે, પ્રવાસી વિસ્તારોના અમુક ભાગોને મુક્તિ છે અને ત્યાં દારૂનું વેચાણ થાય છે.
પ્રતિબંધ ટાપુઓ પર જવા માટેની પરમીટની પ્રક્રિયા ઓનલાઈન કરાઈ
લક્ષદ્વીપ વહીવટીતંત્રનું કહેવું છે કે તેણે ફરજિયાત ઈ-પરમિટને સંપૂર્ણપણે ઓનલાઈન સ્થાનાંતરિત કરીને અને કેટલાક વિસ્તારોમાંથી પ્રવાસીઓ પરનો પ્રતિબંધ હટાવીને દ્વીપસમૂહની સફરને સરળ બનાવવા માટે ઘણા પગલાં લીધાં છે. અગાઉના પ્રવાસીઓ, જેમાં ભારતીય નાગરિકોનો સમાવેશ થતો હતો, તેમને પ્રવેશ પરમિટ માટે અરજી કરવા માટે બેંકમાં 200 રૂપિયાની ફી ચૂકવવી પડતી હતી અને ડિપોઝિટ ચલણ સબમિટ કરવું પડતું હતું.હવે, ઓનલાઈન પ્રક્રિયા એ સુનિશ્ચિત કરે છે કે એક કે બે દિવસમાં પરમિટ જારી કરી શકાય છે.
લક્ષદ્રીપની કમાન મોદીના અતિ નજીક ગણાતા પ્રફુલ પટેલના હાથમાં
માલદીવને ભલે તેની સુંદરતા પર ગર્વ હોય પરંતુ ભારતનું લક્ષદ્વીપ માલદીવને ટક્કર આપવા તૈયાર થઈ રહ્યું છે. સમગ્ર વિવાદ પર બોલતા અહીંના પ્રશાસક પ્રફુલ્લ પટેલે કહ્યું છે કે ભારતે માલદીવને જડબાતોડ જવાબ આપ્યો છે. પટેલ કહે છે કે પીએમ મોદીએ લક્ષદ્વીપ માટે ઘણું કામ કર્યું છે. અગાઉ લક્ષદ્વીપમાં પ્રવાસનને પ્રોત્સાહન આપવામાં આવ્યું ન હતું. અગાઉ લક્ષદ્વીપના વિકાસ માટે પ્રયત્નોનો અભાવ હતો. અહીંની કુલ વસ્તી 64 હજાર છે. માત્ર દસ ગ્રામ્ય પંચાયતો છે. અહીં પીવાનું શુદ્ધ પાણી નહોતું. તે કહે છે કે હવે વસ્તુઓ ઘણી બદલાઈ ગઈ છે.
