દેશભરના ખેડૂત સંગઠનોના ૧૫૦૦થી વધુ પ્રતિનિધિઓ ૨૬ અને ૨૭ ઓગસ્ટના રાષ્ટ્રીય સંમેલન દરમિયાન કૃષિ કાયદાઓ વિરુદ્ધ ચાલી રહેલી ચળવળ માટે ભાવિ વ્યૂહરચના અંગે ચર્ચા કરશે. ખેડૂત નેતાઓએ જણાવ્યું હતું કે, ત્રણ વિવાદાસ્પદ કૃષિ કાયદાઓ સામે ખેડૂતોના આંદોલનના નવ મહિના પૂરા થવા નિમિત્તે સિંઘુ સરહદ પર બે દિવસીય પરિષદનું આયોજન કરવામાં આવી રહ્યું છે.
ખેડૂત નેતા અભિમન્યુ કોહરે જણાવ્યું હતું કે, અમારા અન્ય કાર્યક્રમોથી વિપરીત રાષ્ટ્રીય સંમેલનમાં સામૂહિક મેળાવડો કે રેલી નહીં થાય. દેશભરમાંથી ખેડૂત સંગઠનોના ૧૫૦૦ પ્રતિનિધિઓ સિંઘુ સરહદ પર બે દિવસ સુધી અમારા વિરોધને વધુ તીવ્ર બનાવવા માટે ભેગા થશે. વ્યૂહરચનાઓ પર ચર્ચા કરવામાં આવશે. તેમણે કહ્યું કે, પરિષદનો ઉદ્દેશ દેશભરના ખેડૂતોને સાથે લાવવાનો છે જેથી પ્રદર્શનને આગળ કેવી રીતે લઈ શકાય તે અંગે દરેક નિર્ણય લેવાની પ્રક્રિયામાં સામેલ થઈ શકે.
કોહરે કહ્યું, અમે નવ મહિનાથી વિરોધ કરી રહ્યા છીએ. તે ટૂંકો સમય નથી. અમે દરેકને સામેલ કરવા માંગીએ છીએ અને પૂર્વ, પશ્ચિમ, દક્ષિણ અને ઉત્તરના ખેડૂત સંગઠનોના પ્રતિનિધિઓ દરેક અહીં હશે. ૫ સપ્ટેમ્બરે ઉત્તરપ્રદેશના મુઝફ્ફરનગરમાં યોજાનારી ખેડૂતોની મહાપંચાયત કોન્ફરન્સમાં મુખ્ય મુદ્દાઓની ચર્ચા કરવામાં આવશે. અમારી આગામી વ્યૂહરચના ૫ સપ્ટેમ્બરે મુઝફ્ફરનગરમાં મહાપંચાયત છે, જેની પરિષદમાં ચર્ચા પણ કરવામાં આવશે. મહાપંચાયતની તૈયારીઓ પૂરજોશમાં ચાલી રહી છે. મને ખબર છે કે ઓછામાં ઓછા ૫ હજાર વાહનો મુઝફ્ફરનગર જશે.
તમને જણાવી દઈએ કે ૨૬ ઓગસ્ટના રોજ ત્રણ નવા કૃષિ કાયદાઓ સામે દિલ્હીની સરહદો પર ખેડૂતોના વિરોધને નવ મહિના પૂરા થશે. ખેડૂતો ત્રણ કાયદા રદ કરવાની માંગ કરી રહ્યા છે. તેમને ડર છે કે, આ કાયદાઓ લઘુતમ ટેકાના ભાવ (એમએસપી) સિસ્ટમનો નાશ કરશે અને તેમને મોટા બિઝનેસ હાઉસની દયા પર છોડી દેશે. ખેડૂતો અને સરકાર વચ્ચે ૧૦ રાઉન્ડની વાતચીત થઈ છે પરંતુ મડાગાંઠનો અંત લાવવા માટે કોઈ પરિણામ આવ્યું નથી. રાષ્ટ્રીય સંમેલનનું કેન્દ્રબિંદુ સિંઘુ સરહદ હશે પરંતુ દેશના વિવિધ ભાગોમાં પણ સમાંતર બેઠકો થશે.
