સામાન્ય લોકો ઉપર ભારણ ન વધે તે માટે ઓપન માર્કેટ સેલ સ્કીમ હેઠળ કુલ 50 ટન ઘઉંનું વેચાણ કરવાની સરકારની યોજના
એક તરફ પાકિસ્તાનમાં લોટ માટે લોકોને ફાંફા પડી રહ્યા છે. તેવામાં ભારત સરકાર લોકોની પ્રાથમિક જરૂરિયાત એવા લોટ સામાન્ય લોકો માટે જરા પણ ભારણ ન બને તે માટે સતત પ્રયાસો કરી રહી છે. ફુગાવો નિયંત્રણમાં રહે અને ઘઉં તથા લોટની કિંમત નીચી રહે તે માટે સરકારે વધુ 20 લાખ ટન ઘઉંનો જથ્થો માર્કેટમાં ઠાલવવાનો નિર્ણય લીધો છે.
ઓપન માર્કેટ સેલ સ્કીમ હેઠળ કેન્દ્ર સરકારે વધુ 20 લાખ ટન ઘઉં વેચવાની જાહેરાત કરી છે. ઘઉં અને લોટની વધતી કિંમતોને રોકવા માટે ખુલ્લા બજારમાં આ વેચાણ કરવામાં આવી રહ્યું છે. આ સાથે જ લોટ મિલોને જથ્થાબંધ ભાવમાં ઘટાડો કરવા માટે કહેવામાં આવ્યું છે. અગાઉ 25 જાન્યુઆરીએ કેન્દ્રએ 30 લાખ ટન ઘઉં ખુલ્લા બજારમાં વેચવાની જાહેરાત કરી હતી.
આ વધારાના ઘઉંનું વેચાણ એફએસઆઈ દ્વારા ઈ-ઓક્શન દ્વારા ફ્લોર મિલર્સ, ખાનગી વેપારીઓ, જથ્થાબંધ ખરીદદારો અને લોટ ઉત્પાદનોના ઉત્પાદકોને કરવામાં આવશે, એમ એક નિવેદનમાં જણાવાયું છે. સૂત્રોના જણાવ્યા અનુસાર, વધારાના ઘઉંને ખુલ્લા બજારમાં વેચવાનો નિર્ણય જીઓએમ દ્વારા લેવામાં આવ્યો હતો. નિવેદન અનુસાર, અત્યાર સુધીમાં કુલ 50 લાખ ટન ઘઉં ખુલ્લા બજારમાં વેચવાનો નિર્ણય લેવામાં આવ્યો છે. અનામત કિંમતમાં ઘટાડો અને વધારાના ઘઉંના વેચાણથી ઘઉં અને લોટના બજાર ભાવમાં ઘટાડો કરવામાં મદદ મળશે.
બીજી તરફ વર્તમાન ખરીફ સિઝનમાં સરકાર દ્વારા અત્યાર સુધીમાં સાત કરોડ મેટ્રિક ટન ડાંગરની ખરીદી કરવામાં આવી છે. ઉપભોક્તા બાબતોના મંત્રાલયના અધિકારીઓએ જણાવ્યું હતું કે 20 ફેબ્રુઆરી સુધી ખેડૂતોને ડાંગરની ખરીદી માટે 1,45,845 કરોડ રૂપિયાના લઘુત્તમ ટેકાના ભાવની ચૂકવણી કરવામાં આવી છે. આ રકમ 96 લાખથી વધુ ખેડૂતોને આપવામાં આવી છે.
