મુંબઈમાં ત્રણ માળની ઇમારત ધડાકાભેર ધરાશાયી: અનેક લોકો દટાયાની આશંકા

• ઇમારતમાં અંદાજે 24 પરિવારો રહેતા હતા: પોલીસ, ફાયર બ્રિગેડ અને એનડીઆરએફ દ્વારા રેસ્કયુ ઓપરેશન શરૂ

મુંબઈમાં એક ત્રણ માળની ઈમારત ધરાશાયી થઈ ગઈ છે. ઈમારત ધરાશાયી થવાને કારણે અનેક લોકો કાટમાળ નીચે ફસાયા હોવાની આશંકા છે. કહેવામાં આવી રહ્યું છે કે બિલ્ડિંગમાં લગભગ 24 પરિવાર રહેતા હતા.

પોલીસ, ફાયર બ્રિગેડ અને એનડીઆરએફ ઘટનાસ્થળે હાજર છે અને બચાવ કામગીરી ચાલી રહી છે. કાટમાળ હટાવવા માટે જેસીબી પણ મંગાવવામાં આવ્યા છે અને કાટમાળ હટાવવામાં આવી રહ્યો છે. આ ઘટના અંગે નવી મુંબઈ મ્યુનિસિપલ કોર્પોરેશનના કમિશનર કૈલાશ શિંદેએ જણાવ્યું હતું કે વહેલી સવારે બિલ્ડિંગ અચાનક ધરાશાયી થઈ ગઈ હતી.

શિંદેએ વધુમાં કહ્યું કે તે ગ્રાઉન્ડ+3 બિલ્ડિંગ છે. શાહબાઝ ગામ બેલાપુર વોર્ડ હેઠળ આવે છે. બિલ્ડિંગમાં 13 ફ્લેટ હતા. બે લોકોને બચાવી લેવામાં આવ્યા છે અને બે લોકો ફસાયા હોવાની આશંકા છે. એનડીઆરએફની ટીમો સ્થળ પર છે. રેસ્ક્યુ ઓપરેશન ચાલુ છે. ઈમારતનું નામ ‘ઈન્દિરા નિવાસ’ હોવાનું કહેવાય છે. આ ઈમારત જમીન વત્તા 3 માળની હતી. ફાયર બ્રિગેડે જણાવ્યું કે આ ઘટના આજે સવારે 4.35 કલાકે બની હતી.

તેમણે વધુમાં જણાવ્યું હતું કે એનડીઆરએફની ટીમ બચાવ કામગીરી કરી રહી છે. જે બે લોકોને બચાવી લેવામાં આવ્યા છે તેઓ હોસ્પિટલમાં દાખલ છે અને તેમની હાલત સ્થિર છે. ઇમારત 10 વર્ષ જૂની છે. હવે તપાસ કરવામાં આવી રહી છે અને બિલ્ડિંગના માલિક સામે કાર્યવાહી કરવામાં આવશે.