રાહુલ ગાંધીને બોમ્બથી ઉડાડી દેવાની ધમકી

ભારત જોડો યાત્રા ઇન્દોર પહોંચે તે પૂર્વે જ મોટો ખળભળાટ : મીઠાઈની દુકાનમાં અજ્ઞાત વ્યક્તિ પત્ર મૂકી ગયો, પત્રમાં આખા શહેરમાં બોમ્બ બ્લાસ્ટ કરવાની અને રાહુલ ગાંધીને મારી નાખવાની ધમકી મળી

કોંગ્રેસના નેતા રાહુલ ગાંધીને ઈન્દોરમાં બોમ્બથી ઉડાડી દેવાની ધમકી મળતા ખળભળાટ મચી ગયો છે.  આ ધમકીભર્યો પત્ર જુની ઈન્દોર પોલીસ સ્ટેશન વિસ્તારમાં એક મીઠાઈની દુકાનમાંથી મળી આવ્યો હતો.  હાલમાં, પોલીસ નજીકમાં લગાવેલા સીસીટીવી ફૂટેજના આધારે પત્ર છોડનાર વ્યક્તિને શોધી રહી છે.

પ્રાપ્ત માહિતી અનુસાર, ઈન્દોરના જુની વિસ્તારમાં આવેલી મીઠાઈની દુકાનમાં એક અજાણ્યો વ્યક્તિ પત્ર મૂકી ગયો હતો.  જ્યારે દુકાનના માલિકે આ જોયું તો તેણે પત્ર પોલીસને સોંપ્યો.  આ પત્રમાં રાહુલ ગાંધીને ભારત જોડો યાત્રાના ભાગરૂપે ઈન્દોરની ખાલસા કોલેજમાં રોકાશે તો બોમ્બથી ઉડાવી દેવાની ધમકી આપવામાં આવી છે.

આ સાથે તેમાં સમગ્ર ઈન્દોરને બોમ્બ બ્લાસ્ટથી આતંકિત કરવાની ધમકી પણ અપાઈ છે. પત્ર મોકલનાર વ્યક્તિની જગ્યાએ રતલામના બીજેપી ધારાસભ્ય ચેતન કશ્યપનું નામ એન્વલપ પર લખવામાં આવ્યું છે.

આ કેસમાં પોલીસે સીસીટીવી ફૂટેજના આધારે તપાસ હાથ ધરી છે.  એડિશનલ ડીસીપી પ્રશત ચૌબેનું કહેવું છે કે ધમકી આપનાર અજાણ્યા આરોપીની શોધ કરવામાં આવી રહી છે. રાહુલ ગાંધીની ભારત જોડો યાત્રા 23 નવેમ્બરે એમપીમાં પ્રવેશી રહી છે.  તેઓ 28 નવેમ્બરે ઈન્દોરમાં બેઠક કરશે.

પત્રની ટોચ પર વાહે ગુરુ લખેલું છે.  પછી નીચે લખ્યું છે… 1984માં આખા દેશમાં ભીષણ રમખાણો થયા હતા.  શીખોની હત્યા કરવામાં આવી હતી.  કોઈપણ પક્ષે આ અત્યાચાર સામે અવાજ ઉઠાવ્યો નથી.

પત્રમાં આગળ લખવામાં આવ્યું છે કે નવેમ્બરના છેલ્લા મહિનામાં ઈન્દોરમાં વિવિધ સ્થળોએ ભયાનક બોમ્બ વિસ્ફોટ થશે.  આખું ઈન્દોર બોમ્બ વિસ્ફોટોથી હચમચી જશે.  ટૂંક સમયમાં જ રાહુલ ગાંધીની ઈન્દોર મુલાકાત સમયે કમલનાથનું પણ શૂટિંગ કરવામાં આવશે.  રાહુલ ગાંધીને રાજીવ ગાંધી પાસે મોકલવામાં આવશે.

બીજા પેજમાં લખ્યું છે… નવેમ્બર 2022ના છેલ્લા અઠવાડિયામાં આખું ઈન્દોર બોમ્બ બ્લાસ્ટથી હચમચી જશે.  રાજબાડાને ખાસ ટાર્ગેટ બનાવવામાં આવશે.  પત્રની નીચે એક જ્ઞાનસિંહનું નામ લખેલું છે.  આ સાથે પત્રમાં ઘણા મોબાઈલ નંબર પણ નોંધાયેલા છે.  પત્રની સાથે આધાર કાર્ડની ફોટોકોપી પણ મોકલવામાં આવી છે.