મહામારી બાદ સ્ટાફની અછત સહિતના કારણો વેઇટિંગ પિરિયડને અભૂતપૂર્વ સ્તરે ખેંચી ગઈ!!
ભારતથી મોટી સંખ્યામાં લોકો એક અથવા બીજા કારણોસર ટુરીસ્ટ વિઝા મેળવી અમેરિકા પ્રવાસે જતા હોય છે ત્યારે પ્રથમવાર એવું બન્યું છે કે, હવે અમેરિકા જવા માટે બે વર્ષ સુધી રાહ જોવી પડશે. નોન-ઇમિગ્રન્ટ વિઝિટર વિઝાના અરજદારોની અમેરિકા જવા માટે એપોઇન્ટમેન્ટની રાહ જોવાનો સમય હવે બે વર્ષથી વધુ છે. ઉદાહરણ તરીકે દિલ્હી અને મુંબઈમાં માટે યુએસ સ્ટેટ ડિપાર્ટમેન્ટની વેબસાઈટ અનુસાર વેઇટિંગ પિરિયડ હવે અનુક્રમે 758 અને 752 દિવસનો છે.
જેનો અર્થ છે કે પ્રથમ વખત વિઝિટર વિઝા માટે ઈચ્છુક અરજદારને આ બે શહેરોમાં ઓક્ટોબર 2024ની આસપાસ એપોઈન્ટમેન્ટ મળશે. એક મહિના કરતા પણ ઓછા સમય પહેલા દિલ્હી અને મુંબઈમાં વેઇટિંગ પિરિયડ 581 અને 517 દિવસનો હતો, જે દર્શાવે છે કે કેવી રીતે મહામારી બાદ મુસાફરીની માંગમાં વધારો થયો છે અને કતાર લાંબી થઈ રહી છે.
જયારે એકતરફ યુએસ એમ્બેસી ભારતમાં 100% સ્ટાફિંગ સાથે મહામારી પૂર્વેની સ્થિતિ તરફ પરત ફરવાની આશા વ્યક્ત કરી રહ્યું છે ત્યારે આગામી ઉનાળાથી પરિસ્થિતિમાં સુધારો થાય તેવી શકયતા છે. ભારતમાં યુએસ મિશન વિશ્વભરમાં શક્ય તેટલી ઝડપથી તમામ વિઝા વર્ગોમાં રાહ જોવાનો સમય ઘટાડવા માટે તમામ પ્રયાસો કરી રહ્યું છે. કોરોના મહામારી દરમિયાન લગભગ સંપૂર્ણ શટડાઉન અને સંસાધનો સ્થિર થયા પછી વિઝા પ્રક્રિયા પુન:પ્રાપ્ત થઈ રહી છે. આ પુન:પ્રાપ્તિના ભાગરૂપે યુએસ સરકાર રાષ્ટ્રીય હિત અને પુનરાવર્તિત મુસાફરીને પ્રાથમિકતા આપી રહી છે. ઉદાહરણ તરીકે આ ઉનાળામાં ભારતમાં યુએસ મિશનએ રેકોર્ડબ્રેક 82000 વિદ્યાર્થી વિઝા જારી કર્યા છે તેવું યુએસ એમ્બેસીના પ્રવક્તાએ જણાવ્યું હતું.
અમેરિકન પ્રવકતાએ જણાવ્યું છે કે, અમે બી1/બી2 બિઝનેસ અને ટુરિઝમ વિઝાની પ્રક્રિયાને પણ આગળ વધારી રહ્યા છીએ. આગામી ઉનાળા સુધીમાં ભારતમાં યુએસ મિશન 100% સ્ટાફિંગની ખૂબ નજીક પહોંચી જાય તેવો આશાવાદ છે, જેના લીધે વિઝા માટેનો વેઇટિંગ પિરિયડમાં નોંધપાત્ર ઘટાડો થશે.
ટ્રાવેલ એજન્ટો હવે પ્રથમ વખત નોન-ઇમિગ્રન્ટ વિઝિટર વિઝા અરજદારોને એવા શહેરોમાં અરજી કરવા માટે કહી રહ્યા છે કે જ્યાં પ્રમાણમાં વેઇટિંગ પિરિયડ ઓછો હોય. ટૂંકા ગાળામાં વિઝાની તંગી ટ્રાવેલિંગ ક્ષેત્રને મંદી તરફ દોરી જતી નથી કારણ કે તમામ પશ્ચિમ તરફની ફ્લાઇટ્સ સપ્ટેમ્બરમાં પણ ભરેલી હશે જે અગાઉ ખૂબ જ દુર્બળ મુસાફરી મહિનો હતો. તેથી હવે પ્રવાસ સતત ધમધમતો રહેશે. ઉત્તર અમેરિકાની અર્થવ્યવસ્થાના વળતરના ભાડા અત્યારે રૂ. 2 લાખની નજીક છે. તેનું મુખ્ય કારણ એ છે કે, લોકો હજુ પણ તેમના કેનેડાના વિદ્યાર્થી વિઝા મેળવી રહ્યા છે અને મોટાભાગની વન-સ્ટોપ ફ્લાઇટ્સ ત્યાં જતા વિદ્યાર્થીઓથી ભરેલી છે.
એકવાર વિદ્યાર્થીઓનો ધસારો આ મહિનાના અંતમાં સ્થાયી થઈ જાય પછી ભાડામાં ઘટાડો થવાની આશા છે, તેવું ટ્રાવેલ એજન્ટ્સ ફેડરેશન ઑફ ઈન્ડિયાના સંયુક્ત સચિવ અનિલ કલસીએ જણાવ્યું હતું.
