થર્ટી ફર્સ્ટ: સુર્ય આથમતા જ પોલીસ મેદાનમાં ઉતરશે

• નસેડીઓ સાવધાન…
• અનેક પોઇન્ટ પર વાહનોની જડતી : બ્રેથ એનેલાઇઝરથી બંધાણીઓને શોધી કાઢવા કવાયત

થર્ટી ફર્સ્ટ ડિસેમ્બર અનુસંધાને જામનગર પોલીસ દ્વારા સઘન ચેકીંગ ઝુંબેશ હાથ ધરી દેવામાં આવી છે. શહેરના અનેક મહત્વપૂર્ણ માર્ગો પર પોલીસે બ્રેથ એનેલાઇઝર મારફત બંધાણીઓને શોધી કાઢવા કવાયત હાથ ધરવામાં આવી હતી. જયારે નશાકીય પદાર્થોની હેરાફેરીને અટકાવવા વાહનોની જડતી કરવામાં આવી હતી. ઉલ્લેખનીય છે કે, આજે સૂર્ય આથમે તે સાથે જ પોલીસ ફરીવાર મેદાનમાં ઉતરી જનારી છે.

જામનગર શહેરમાં 31 ડિસેમ્બરની ઉજવણી અંતર્ગત પોલીસ તંત્ર સતર્ક બન્યું છે અને શહેરમાં કોઈ નશેડી નશો કરીને છાકટાવેળા ન કરે તે સંદર્ભમાં પૂરતી તકેદારી રાખવામાં આવી રહી છે. પોલીસ દ્વારા સધન ચેકિંગ કરાઇ રહ્યું છે.જામનગર શહેર વિભાગના ડી.વાય.એસ.પી. જે.એન. ઝાલા અને સીટી બી. ડિવિઝનના પી.આઇ. પી.પી. ઝા તેમજ સમગ્ર બી. ડિવિઝનના પોલીસ સ્ટાફ દ્વારા શહેરના સીટી બી. ડિવિઝન વિસ્તારમાં માર્ચ પાસ્ટ કરવામાં આવી હતી. શહેરના મુખ્ય માર્ગો જી.જી. હોસ્પિટલ રોડ, ત્રણબત્તી, રણજીત રોડ, ટાઉનહોલ સર્કલ સહિતના અનેક વિસ્તારોમાં પોલીસની સમગ્ર ટીમ ફરી વળી હતી અને અનેક સ્થળે વાહન ચેકિંગ કરવામાં આવ્યું હતું. તેમજ ટ્રાફિક નિયમન ભંગ અંગેના અલગ અલગ કેસો કરવામાં આવ્યા હતા. શહેરમાં દારૂનો નશો કરીને કોઈ શખ્સો છાકટાવેડા ન કરે તે સંદર્ભમાં ખાસ તકેદારી રાખવામાં આવી રહી છે અને પોલીસ તંત્ર દ્વારા કેટલાક શકમંદોને બ્રેથ એનાલાઇઝરની મદદથી ચેકિંગ કરવામાં આવી રહ્યું છે. ઉપરાંત શહેરી વિસ્તારમાં નાઈટ ડ્રાઇવ પણ રાખવામાં આવી છે. ઉલ્લેખનીય બાબત છે કે, આજે સંધ્યા ટાણેથી જ પોલીસ મેદાનમાં ઉતરી જશે અને કાયદો વ્યવસ્થાની સ્થિતિને જાળવી રાખવા કવાયત હાથ ધરશે.