ગુજરાત સરકાર દ્વારા રાજ્યમાં પર્યટનના વિકાસ માટે રૂપિયા 770 કરોડના પ્રસ્તાવિત મૂડીરોકાણ સાથે દસ મેમોરેન્ડા ઓફ અન્ડરસ્ટેન્ડિંગ (એમઓયુ) પર હસ્તાક્ષર કરવામાં આવ્યા છે. આ પહેલમાં ચાર સ્ટાર રિસોર્ટ, મનોરંજન ક્ષેત્ર અને સાંસ્કૃતિક થીમ પાર્કની સ્થાપનાનો સમાવેશ થાય છે. રૂપિયા 145 કરોડના રોકાણના હેતુ સાથેનો એક એમઓયુ આદિવાસી બહુલ નર્મદા જિલ્લામાં ફોર સ્ટાર રિસોર્ટ, કોન્ફરન્સ અને કન્વેન્શન એરિયાની સ્થાપના માટે સમર્પિત છે. આ પ્રોજેક્ટનો ઉદ્દેશ 450 થી વધુ સ્થાનિક આદિવાસીઓ માટે રોજગારીની તકો ઊભી કરવાનો છે.
પ્રવાસન ક્ષેત્રે ગુજરાત સરકારે 770 કરોડના 10 એમઓયુ સાઇન કર્યા
રાજ્યની રાજધાની ગાંધીનગરમાં રૂપિયા 400 કરોડના રોકાણનો સંકેત આપતો અન્ય એક એમઓયુ, વિશ્વ કક્ષાના મનોરંજન ઝોન અને સંસ્કૃતિ થીમ પાર્કના નિર્માણ પર ધ્યાન કેન્દ્રિત કરે છે, જેમાં 1,100 લોકોને રોજગારી મળવાની અપેક્ષા છે. ગીર સોમનાથ અને કચ્છ જિલ્લામાં સિનેમેટિક ટૂરિઝમ માટે રૂપિયા 225 કરોડના સંયુક્ત રોકાણના ઉદ્દેશ્ય સાથેના બે એમઓયુ પર હસ્તાક્ષર કરવામાં આવ્યા હતા, જેમાં 2,500 સ્થાનિકો માટે રોજગારીનું સર્જન કરવાની સંભાવના છે.એકતા નગર ખાતે યોજાયેલી કોન્ફરન્સ દરમિયાન આ એમઓયુને ઔપચારિક સ્વરૂપ આપવામાં આવ્યું હતું, જેમાં ગુજરાત સરકારના પ્રકાશન મુજબ ગુજરાતને સાહસિક પ્રવાસન સ્થળ તરીકે વિકસાવવા પર ભાર મૂકવામાં આવ્યો હતો.
એકતા નગર ખાતે આયોજિત પ્રી-વાઈબ્રન્ટ ગુજરાત સમિટ ઈવેન્ટમાં હસ્તાક્ષર સમારોહ યોજાયો હતો. ગુજરાત પ્રવાસન નિગમ અને એડવેન્ચર ટૂર ઓપરેટર્સ એસોસિએશન ઓફ ઈન્ડિયા દ્વારા સંયુક્ત રીતે આયોજિત 15મી વાર્ષિક બેઠકમાં એમઓયુની આપ-લે કરવામાં આવી હતી. આ કાર્યક્રમમાં રાજ્યના પ્રવાસન, વન અને પર્યાવરણ મંત્રી મુળુભાઈ બેરા ઉપસ્થિત રહ્યા હતા. પ્રવાસન મંત્રી મુળુભાઇ બેરાએ ગુજરાતના પ્રવાસન ક્ષેત્રના વિકાસ પર પ્રકાશ પાથર્યો હતો, જે દેશ અને સમગ્ર વિશ્વના મુલાકાતીઓને આકર્ષિત કરે છે. દિવાળી દરમિયાન, રાજ્યના વિવિધ પ્રવાસન સ્થળોએ 42 લાખ લોકોએ મુલાકાત લીધી હતી.
