ફુટબોલ ટુર્નામેન્ટમાં સૌરાષ્ટ્રની રાજકોટ, જામનગર, જુનાગઢ સહિતની ટીમો મેદાને ઉતરશે: આયોજકોએ અબતકના આંગણે
રાજકોટમાં જામશે ફુટબોલનો રંગ
શહેરના ફુટબોલ પ્રેમીઓ માટે આગામી ૩જી માર્ચથી નિધિ સ્કુલ તેમજ હરિવંદના કોલેજના સંયુકત ઉપક્રમે ‘ઓપન સૌરાષ્ટ્ર ફુટબોલ પ્રિમીયર લીગ’ ફુટબોલ ટુર્નામેન્ટનું આયોજન કરવામાં આવ્યું છે. જેમાં સૌરાષ્ટ્રના અલગ-અલગ છ થી વધુ જીલ્લાઓમાંથી ટીમ ભાગ લઈ શકશે.
અબતકના આંગણે પધારેલા નિધિ સ્કુલના મેનેજીંગ ટ્રસ્ટી યશપાલસિંહ ચુડાસમા અને હરિવંદના કોલેજના સર્વેશ્ર્વર ચૌહાણે જણાવ્યું હતું કે, શહેરમાં આગામી ૩જી માર્ચથી ૨૧મી એપ્રિલ સુધી સૌરાષ્ટ્રમાં પ્રથમવાર ઓપન સૌરાષ્ટ્ર ફુટબોલ પ્રીમીયર લીગનું આયોજન નિધિ સ્કુલ તેમજ હરિવંદના કોલેજ દ્વારા રેસકોર્સ ફુટબોલ ગ્રાઉન્ડ ખાતે કરવામાં આવશે. આ ફુટબોલ ટુર્નામેન્ટમાં સૌરાષ્ટ્રની રાજકોટ, જામનગર, જુનાગઢ, સુરેન્દ્રનગર, ભાવનગર, મોરબી વગેરેની ટીમો ભાગ લેશે. પ્રીમીયર લીગમાં ભાગ લેનાર ટીમોને ડ્રેસ આયોજક તરફથી આપવામાં આવશે. તેમજ પ્રીમીયર લીગમાં વિજેતા ટીમને એક લાખ રૂપિયાનું રોકડ ભવ્ય પુરસ્કાર આપવામાં આવશે.
આ ટુર્નામેન્ટ રાઉન્ડ રોબીન લીગ પદ્ધતિથી રમાડી દરેક ટીમોને બીજી દરેક ટીમો સાથે રમવાનો લાભ મળશે. છેલ્લા ૨ વર્ષથી નિધિ સ્કુલ દ્વારા નોકઆઉટ પઘ્ધતિથી ફુટબોલ ટુર્નામેન્ટનું આયોજન થતું હતું. જે આ વર્ષથી લીગ પઘ્ધતિથી આયોજન કરી ૨ મહિના સુધી ફુટબોલ ખેલાડીઓને આ રમત પ્રત્યે પ્રોત્સાહન આપવામાં આવશે. આગામી સમયમાં નિધિ સ્કુલ દ્વારા ગુજરાત પ્રીમીયર લીગ ફુટબોલ ટુર્નામેન્ટનું આયોજન પણ કરવામાં આવશે. આ પ્રિમીયર લીગનાં આયોજનમાં નિધિ સ્કુલના મેનેજીંગ ટ્રસ્ટી યશપાલસિંહ ચુડાસમા, પ્રજ્ઞેશદાન ગઢવી હરિવંદના કોલેજનાં સર્વેશ્ર્વર ચૌહાણ, આકાશ ગોહિલ, ઓમકારસિંહ રાઠોડ, અશોક પરમાર, લાલસિંઘ ચૌહાણ, કરત કતીરા, હર્ષદ રાઠોડ, મયુર ચોપડા, જીતેન્દ્ર ભાભોર, મેહુલ વિરજા જહેમત ઉઠાવી રહ્યા છે.
