- બોઈલર બિલ, કોફી (પ્રમોશન એન્ડ ડેવલપમેન્ટ) બિલ અને રબર (પ્રમોશન એન્ડ ડેવલપમેન્ટ) બિલ તથા આઝાદી પૂર્વેના કાયદાને બદલવા માટેના અન્ય બીલોનો સમાવેશ કરવામાં આવ્યો છે
અબતક, નવીદિલ્હી:હાલ ભારત જે ગતિથી આગળ વધી રહ્યું છે તેને જોતા હવે ભવિષ્યમાં આ વૃદ્ધિ હરણફાળ ભરે માટે એક વિશેષ વ્યવસ્થા ઊભી કરવામાં આવી રહી છે અને તેના માટે વિવિધ બિલોને પસાર કરવા ખૂબ જરૂરી છે ત્યારે સોમવારથી શરૂ થતા બજેટ સત્રમાં મોદી સરકાર 6 બિલોનો પ્રસ્તાવ મૂકશે જે ભારતીય અર્થવ્યવસ્થા માટે અત્યંત મદદરૂપ અને મહત્વપૂર્ણ પુરવાર થશે.
22 જુલાઈથી 12 ઓગસ્ટ સુધી સંસદના ચોમાસુ સત્ર દરમિયાન છ નવા બિલ રજૂ કરવામાં આવશે અને નાણામંત્રી નિર્મલા સીતારમણ 23 જુલાઈએ કેન્દ્રીય બજેટ રજૂ કરશે. પહેલાથી જ સૂચિબદ્ધ થયેલા નવા બિલોમાં ફાઇનાન્સ બિલ, ભારતીય એરક્રાફ્ટ લેજિસ્લેશન 2024નો સમાવેશ થાય છે જે નાગરિક ઉડ્ડયન ક્ષેત્રમાં વ્યવસાય કરવામાં સરળતા માટે સક્ષમ જોગવાઈઓ પ્રદાન કરવા માટે એરક્રાફ્ટ એક્ટ 1934નું સ્થાન લેશે અને ડિઝાસ્ટર મેનેજમેન્ટ એક્ટમાં સુધારો કરવા માટેનું બિલ સામેલ છે. બોઈલર બિલ, કોફી (પ્રમોશન એન્ડ ડેવલપમેન્ટ) બિલ અને રબર (પ્રમોશન એન્ડ ડેવલપમેન્ટ) બિલ આઝાદી પૂર્વેના કાયદાને બદલવા માટેના અન્ય ત્રણ બિલ છે. સ્પીકર ઓમ બિરલાએ ભૂતપૂર્વ કેન્દ્રીય મંત્રી અનુરાગ ઠાકુર અને ભાજપના નિશિકાંત દુબેનો સમાવેશ કરીને બિઝનેસ એડવાઈઝરી કમિટી ની પુન:રચના કરી છે. સમિતિ નીચલા ગૃહના કાર્યસૂચિ પર ચર્ચા કરે છે અને ગૃહની કામગીરી માટે સમય નક્કી કરે છે. બિઝનેસ એડવાઈઝરી કમિટીમાં ઠાકુર અને દુબે ઉપરાંત અન્ય પક્ષોના સભ્યો પણ છે. સ્પીકરની આગેવાની હેઠળની સમિતિમાં સુદીપ બંદોપાધ્યાય (ટી.એમ.સી), પીપી ચૌધરી (ભાજપ), લવુ શ્રીકૃષ્ણ દેવરાયાલુ (ટીડીપી), ગૌરવ ગોગોઈ (કોંગ્રેસ), સંજય જયસ્વાલ (ભાજપ), દિલેશ્વર કામૈત (જેડી–યુ), ભર્ત્રીહરિ મહતાબ (ભાજપ)નો સમાવેશ થાય છે.
