માલદીવ અગાઉ ભારત સાથે વિવાદમાં ઉતર્યા બાદ હવે ઇઝરાયેલ સાથે વિવાદમાં ઉતર્યું છે. ભારતની જેમ જ ઇઝરાયેલ સામે પણ તેને પાછી પાની કરવાનો વારો આવ્યો છે. આમ ચીનની જેમ જ હવે માલદીવ વિવાદમાં રહેવા ઇચ્છતું હોય તેવો ઘાટ સર્જાયો છે.
ઇસ્લામિક વિશ્વમાં નેતા બનવા માટે, માલદીવના રાષ્ટ્રપતિ મોહમ્મદ મુઇઝુએ ઇઝરાયેલના પાસપોર્ટ ધારકો પર પ્રતિબંધ મૂકવાનો નિર્ણય લીધો હતો, પરંતુ હવે તે નિર્ણય તેમના ગળામાં ફાંસો બની ગયો છે. માલદીવ માટે સમસ્યા એ છે કે જો તે ઈઝરાયેલ પર પાસપોર્ટ પ્રતિબંધ લાદશે તો ઈઝરાયેલમાં રહેતા 20 લાખથી વધુ પેલેસ્ટિનિયન આરબો પણ તેની અસરમાં આવી જશે.
માલદીવના વહીવટીતંત્રમાં વરિષ્ઠ લોકોના વિરોધને પગલે પ્રતિબંધને લાગુ કરવાની યોજનાને અટકાવી દેવામાં આવી છે. માલદીવના એટર્ની જનરલ અહેમદ ઉશમે કહ્યું છે કે ઈઝરાયેલના પાસપોર્ટ ધારકોને માલદીવમાં પ્રવેશવા પર પ્રતિબંધ મૂકવાના નિર્ણય પર વિચાર કરવો જોઈએ.
માલદીવના મીડિયા આઉટલેટ અધાદુએ આ વિશે માહિતી આપી છે કે એટર્ની જનરલે કહ્યું કે ’સૌથી મોટી ચિંતા એ છે કે ઇઝરાયલી પાસપોર્ટ ધરાવતા ઘણા પેલેસ્ટિનિયન છે, જેમની સંખ્યા લાખોમાં છે. જ્યારે અમે સંપૂર્ણ પ્રતિબંધ લાદીશું ત્યારે તેમનું શું થશે? ’આ બાબતો પર વિચાર કરવાની જરૂર છે’ ગયા અઠવાડિયે ગુરુવારે એજીની ઓફિસમાં એક પ્રેસ કોન્ફરન્સમાં અહેમદ ઉશામે કહ્યું હતું કે સરકારનું વલણ બદલાયું નથી પરંતુ કેટલાક લોકો ઇઝરાયલી પાસપોર્ટ પર સંપૂર્ણ પ્રતિબંધને લઈને ચિંતિત છે. તેમણે કહ્યું કે આ પ્રકારની બાબતો પર વિચાર કર્યા બાદ ઉકેલ શોધવામાં આવશે.
ઉષમે જણાવ્યું હતું કે આ બિલનો સમાવેશ કરવામાં આવ્યો નથી કારણ કે સંસદમાં આ જ વિષય પરનું બિલ રજૂ કરવામાં આવ્યું હતું, જેનો પ્રસ્તાવ ગાલોલુ ઠેકુનુના સાંસદ મિકેલ નસીમે કર્યો હતો. સંસદની છેલ્લી બેઠકમાં આ બિલને વિચારણા માટે સ્વીકારવામાં આવ્યું હતું. તે સત્તાધારી પીપલ્સ નેશનલ કોંગ્રેસના બહુમતી સમર્થન સાથે સ્વીકારવામાં આવ્યું હતું.
માલદીવના રાષ્ટ્રપતિ મોહમ્મદ મુઈઝુએ આ મહિનાની શરૂઆતમાં ઈઝરાયેલના નાગરિકોને માલદીવ આવવા પર પ્રતિબંધ લગાવવાની જાહેરાત કરી હતી. માલદીવના રાષ્ટ્રપતિ કાર્યાલયે આ નિર્ણય અંગે માહિતી આપી હતી કે આ માટે કાયદામાં જરૂરી સુધારા કરવામાં આવશે. માલદીવે કહ્યું હતું કે તે ગાઝા પર ઈઝરાયેલ સરકારના હુમલાના વિરોધમાં આ પ્રતિબંધ લાદી રહ્યું છે.
