વોટિંગ ટ્રેન્ડ પ્રથમ તબક્કા જેવો જ રહ્યો, ચૂંટણી તંત્ર અને રાજકીય પક્ષોના વધુ મતદાન કરાવવાના પ્રયાસો ધાર્યા તેટલા સફળ ન રહ્યા
બીજા તબક્કામાં પણ ઓછું મતદાન થવાના એંધાણ વર્તાઈ રહ્યા છે. બપોર સુધીનો વોટિંગ ટ્રેન્ડ પ્રથમ તબક્કા જેવો જ રહ્યો છે. એટલે ચૂંટણી તંત્ર અને રાજકીય પક્ષોના વધુ મતદાન કરાવવાના પ્રયાસો ધાર્યા તેટલા સફળ રહ્યા નથી.
ગુજરાતમાં પ્રથમ તબક્કાના મતદાનથી ચૂંટણી પંચ ખુશ ન હતું. મતદારોની ઉદાસીનતાને કારણે પ્રથમ તબક્કામાં નિરાશાજનક મતદાન બાદ ચૂંટણી પંચે આજે બીજા તબક્કાના મતદાન પહેલા અનેકવિધ પ્રયાસો કર્યા હતા.
એક નિવેદનમાં, ચૂંટણી પંચે જણાવ્યું હતું કે, ગુજરાતની ચૂંટણીના પ્રથમ તબક્કામાં સુરત, રાજકોટ અને જામનગરમાં રાજ્યની સરેરાશ 63.3 ટકા કરતાં ઓછું મતદાન નોંધાયું હતું, જે 2017ની ચૂંટણીના પ્રથમ તબક્કામાં 66.75 ટકા હતું. જ્યારે ઘણા મતવિસ્તારોમાં મતદાનની ટકાવારી વધી છે, ત્યારે આ મહત્વના જિલ્લાઓની શહેરી ઉદાસીનતાને કારણે સરેરાશ મતદાનનો આંકડો ઘટ્યો છે. હિમાચલ પ્રદેશની વિધાનસભાની તાજેતરની સામાન્ય ચૂંટણી દરમિયાન, શિમલા શહેરી વિધાનસભા મતવિસ્તારમાં સૌથી ઓછું 62.53 ટકા મતદાન નોંધાયું હતું જ્યારે રાજ્યમાં સરેરાશ 75.6 ટકા છે.
ચૂંટણી પંચે જણાવ્યું હતું કે 1 ડિસેમ્બર, 2022 ના રોજ થયેલા મતદાન દરમિયાન ગુજરાતના શહેરોએ સમાન શહેરી ઉદાસીનતા દર્શાવી હતી. જેના કારણે પ્રથમ તબક્કામાં મતદાનની ટકાવારી ઘટી હતી. આ દરમિયાન, ગુજરાત વિધાનસભા ચૂંટણીના બીજા અને અંતિમ તબક્કા માટેનો હાઇ-વોલ્ટેજ પ્રચાર શનિવારે સાંજે 5 વાગ્યે સમાપ્ત થયો હતો.અમદાવાદ, વડોદરા અને ગાંધીનગર સહિત ઉત્તર અને મધ્ય ગુજરાતના 14 જિલ્લાઓમાં 93 બેઠકો પર 800 થી વધુ ઉમેદવારો મેદાનમાં છે. 8મી ડિસેમ્બરે મતગણતરી હાથ ધરાશે. ગુરુવારે સૌરાષ્ટ્ર, કચ્છ અને દક્ષિણ ગુજરાતની 89 બેઠકો માટે પ્રથમ તબક્કાનું મતદાન યોજાયું હતું.
બીજા તબક્કાના મતદાનમાં પણ પહેલા તબક્કા જેવો જ ટ્રેન્ડ જોવા મળી રહ્યો છે. પ્રથમ તબક્કામાં બપોરે 1 વાગ્યા સુધીમાં 34 ટકા આસપાસ મતદાન નોંધાયું હતું. જ્યારે બીજા તબક્કામાં પણ આવું જ થયું છે. બપોર સુધીમા 34 ટકા આસપાસ જ મતદાન નોંધાયું છે.
