વર્ષ 2022માં રશિયામાંથી સસ્તા તેલની આયાતમાં 10 ગણો વધારો થયો: ટર્નઓવર 92 હજાર કરોડ સુધી પહોંચી ગયું
તાજેતરમાં ઉઝબેકિસ્તાનના સમરકંદમાં વડાપ્રધાન નરેન્દ્ર મોદી અને રશિયાના રાષ્ટ્રપતિ વ્લાદિમીર પુતિનની મુલાકાત ચર્ચામાં રહી હતી. આ દરમિયાન મોદીએ પુતિનને યુક્રેન યુદ્ધને લઈને સલાહ આપી હતી કે યુદ્ધ જ ઉકેલ નથી. આ સલાહની વિશ્વભરમાંથી પ્રશંસા થઈ રહી છે. બંને નેતાઓની મુલાકાત એવા સમયે થઈ જ્યારે પશ્ચિમના કેટલાક દેશોએ રશિયા પાસેથી સસ્તા તેલની આયાત કરવા બદલ ભારતની ટીકા કરી હતી. પરંતુ યુક્રેન યુદ્ધ પછી, યુએસ સહિત ઘણા દેશો દ્વારા રશિયા પર લાદવામાં આવેલા કડક પ્રતિબંધો છતાં ભારતે રશિયા પાસેથી તેલ ખરીદવાનું ચાલુ રાખ્યું. રશિયા પાસેથી તેલ ખરીદી કરીને ભારતે 35 હજાર કરોડ રૂપિયાની જંગી બચત કરી છે.
હકીકતમાં, ભારતે પશ્ચિમી દેશોના વિરોધ છતાં તેલની આયાત કરવાનો નિર્ણય લીધો હતો. આ નિર્ણયના ફાયદા અને ગેરફાયદા વિશે ઘણી ચર્ચા થઈ હતી. રોઇટર્સના એક રિપોર્ટમાં ડેટા રજૂ કરતા કહેવામાં આવ્યું છે કે ભારતે આ વર્ષના પ્રથમ ક્વાર્ટરમાં રશિયાથી 6.6 મિલિયન ટન ક્રૂડ ઓઇલની આયાત કરી છે. બીજા ક્વાર્ટરમાં આ વધીને 84.2 મિલિયન ટન થઈ ગયું. આ દરમિયાન રશિયાએ પણ પ્રતિ બેરલ 30 ડોલરનું ડિસ્કાઉન્ટ આપ્યું હતું. તેના કારણે પ્રથમ ક્વાર્ટરમાં એક ટન ક્રૂડ ઓઈલની આયાતનો ખર્ચ લગભગ 790 ડોલર થયો હતો.
આ પછી, બીજા ક્વાર્ટરમાં તે ઘટીને 740 ડોલર થઈ ગયો. આ રીતે ભારતને કુલ 35,000 કરોડ રૂપિયાનો ફાયદો થયો છે. સમાન સમયગાળા દરમિયાન અન્ય સ્ત્રોતોમાંથી આયાતની કિંમતમાં વધારો થયો હતો. 2022માં રશિયામાંથી સસ્તા તેલની આયાતમાં 10 ગણો વધારો થયો છે. ટર્નઓવર 11.5 બિલિયન ડોલર સુધી પહોંચી ગયું છે. વર્ષના અંત સુધીમાં તે રેકોર્ડ 13.6 બલિયન ડોલર સુધી પહોંચે તેવી શક્યતા છે. ભારત ચીન પછી રશિયન ક્રૂડ ઓઈલના બીજા સૌથી મોટા ખરીદદાર તરીકે ઉભરી આવ્યું છે.
- રશિયા ત્રીજા ક્રમનું સૌથી મોટું ક્રૂડ સપ્લાયર બન્યું
જુલાઈમાં સાઉદી અરેબિયાને પછાડીને ત્રીજા સ્થાને રશિયા ભારતનું બીજું સૌથી મોટું તેલ સપ્લાયર બન્યું હતું. જો કે, સાઉદી અરેબિયાએ પાછળથી ઓગસ્ટ સુધીમાં તેનું સ્થાન પાછું મેળવ્યું અને હવે રશિયા ભારતને ત્રીજું સૌથી મોટું તેલ સપ્લાયર રહ્યું છે. ડેટા દર્શાવે છે કે એપ્રિલ-જુલાઈ દરમિયાન ભારતની રશિયામાંથી ખનિજ તેલની આયાત આઠ ગણી વધીને 11.2 બિલિયન ડોલર થઈ હતી, જે ગયા વર્ષના સમાન સમયગાળામાં 1.3 બિલિયન ડોલર હતી.
- ભારત માટે ક્રૂડના ભાવ ખૂબ મહત્વપૂર્ણ
માર્ચથી, જ્યારે ભારતે રશિયા પાસેથી આયાતમાં વધારો કર્યો છે, તે વધીને 12 બિલિયન ડોલર થઈ ગયો છે, જે ગયા વર્ષે 1.5 બિલિયન ડોલર કરતાં થોડો વધારે છે. તેમાંથી જૂન અને જુલાઈમાં લગભગ 7 બિલિયન ડોલરની આયાત કરવામાં આવી હતી. ભારત માટે તેલની કિંમતો મહત્વની છે કારણ કે આ આયાત 83 ટકા માંગ પૂરી કરે છે. ભારત સરકાર આમાં ઘણો ખર્ચ કરે છે.
- 2021-22માં દેશનું તેલ આયાત બિલ બમણું થયુ
એક અહેવાલમાં જણાવાયુ છે કે એક હકીકત એ પણ છે કે 2021-22માં દેશનું તેલ આયાત બિલ બમણું થઈને 119 બિલિયન ડોલર થઈ ગયું છે. આનાથી સરકારી નાણા પર ઘણું દબાણ આવ્યું અને રોગચાળા પછી આર્થિક સુધારણાને પણ અસર થઈ. તાજેતરમાં નાણામંત્રી નિર્મલા સીતારમણે એક સેમિનારમાં કહ્યું હતું કે રશિયાથી તેલની આયાત એ ફુગાવા વ્યવસ્થાપન વ્યૂહરચનાનો એક ભાગ છે અને અન્ય દેશો પણ તે જ કરી રહ્યા છે.
- ડાયરેક્ટર ટેક્સ કલેક્શન 30 ટકા વધીને 8.36 લાખ કરોડે પહોંચ્યું
- એડવાન્સ ટેક્સ કલેક્શન પણ 17% વધીને રૂ. 2.95 લાખ કરોડ થયુ
ઈન્કમટેક્સ ઓફ ઈન્ડિયાએ જાહેર કર્યું છે કે નાણાકીય વર્ષની શરૂઆતથી દેશમાં ડાયરેક્ટ ટેક્સ કલેક્શન 30 ટકા વધીને રૂ. 8,36,225 કરોડ થઈ ગયું છે, નાણાકીય વર્ષ 2021-22માં આ જ સમયગાળામાં રૂ. 6,42,287 કરોડનું ટેક્સ કલેક્શન થયું હતું. દેશના કુલ ડાયરેક્ટ ટેક્સ કલેક્શનમાં કોર્પોરેટ ટેક્સનો હિસ્સો રૂ. 4,36,020 કરોડ છે અને વ્યક્તિગત આવકવેરાનો હિસ્સો રૂ. 3,98,440 કરોડ છે. જ્યારે નેટ ડાયરેક્ટ ટેક્સ કલેક્શન 7,00,669 કરોડ રૂપિયા પર પહોંચી ગયું છે. તે ગયા વર્ષના નાણાકીય વર્ષ કરતાં 23% વધુ છે. નાણાકીય વર્ષ 2021-22 દરમિયાન, સમાન સમયગાળામાં નેટ ડાયરેક્ટ ટેક્સ કલેક્શન રૂ. 5,68,147 કરોડ હતું. નેટ ડાયરેક્ટ ટેક્સ કલેક્શનમાંથી રૂ. 3,68,484 કરોડ કોર્પોરેટ ટેક્સમાંથી આવ્યા છે, જ્યારે બાકીના રૂ. 3,30,490 કરોડ વ્યક્તિગત આવકવેરા દ્વારા
આવ્યા છે. એપ્રિલ-સપ્ટેમ્બર દરમિયાન, 17 સપ્ટેમ્બર સુધી કુલ એડવાન્સ ટેક્સ કલેક્શન 1 વર્ષ અગાઉના સમાન સમયગાળાની તુલનામાં 17% વધીને રૂ. 2,95,308 કરોડ થયું છે. અર્થતંત્ર કોરોના રોગચાળામાંથી ઝડપથી પુન:પ્રાપ્ત થઈ રહ્યું છે. ઉપરાંત, કર પ્રણાલીને વધુ સરળ બનાવવાને કારણે, દેશમાં કર વસૂલાત સતત વધી રહી છે.
