‘ડ્રગ્સની માહિતી કેમ આપશ’ તેમ કહી મિત્રને મિત્રએ છરીના ઘા ઘચકાવ્યા

પોલીસને બાતમી આપ્યાની શંકાએ યુવક અને યુવતીએ છરી વડે કર્યો જીવલેણ હુમલો

રાજકોટમાં ડ્રગ્સના કાળા કારોબારમાં સંડોવાયેલા બે મિત્રો વચ્ચે ડખ્ખો થતા એક મિત્રએ યુવતી સાથે મળી છરી વડે હુમલો કરતા યુવાનને સારવાર માટે હોસ્પિટલમાં દાખલ કરવામાં આવ્યો છે. અગાઉ યુવાનની પત્ની એન.ડી.પી.એસ.ના ગુનામાં જેલમાં હોય ત્યારે અન્ય શખ્સે પોલીસને કેમ બાતમી આપે છે તેમ કહી છરી ઝીકી દીધી હતી.

આ અંગેની પોલીસમાંથી પ્રાપ્ત વિગત મુજબ રાજકોટના રૈયાધારમાં સ્લમ ક્વાટરમાં રહેતા અને રીક્ષા ચલાવી ગુજરાન ચલાવતા મયુર સુનિલભાઈ ધામેલિયા નામના 20 વર્ષના યુવાન ગઇ કાલે આશાપુરા ચોકમાં હતો ત્યારે ત્યાં ઘસી આવેલા સમીર ઉર્ફે સમલો કાસમ બ્લોચ અને એક અજાણી યુવતીએ આવી છરી વડે હુમલો કરતા તેને સારવાર માટે સિવિલ હોસ્પિટલમાં ખસેડવામાં આવ્યો છે.હોસ્પિટલના બીછાને રહેલા મયુર ધામેલિયાએ જણાવ્યું હતું કે તેની પત્ની સુધા અગાઉ એન.ડી.પી.એસ.ના ગુનામાં જેલ હવાલે હોય અને હુમલો કરનાર સમીર ઉર્ફે સમલો બ્લોચ અને મયુર વચ્ચે મિત્રતા હતી. ગઇ કાલે ફરિયાદી મયુર ધામેલિયા આશાપુરા ચોકમાં હતો ત્યારે સમીર ઉર્ફે સમલો અને એક અજાણી યુવતી એક્ટિવા પર આવ્યા હતા. જ્યાં સમીર ઉર્ફે સમલાએ તું કેમ પોલીસને ડ્રગ્સ બાબતે મારી બાતમી આપી છે તેમ કહી છરીના બે ઘા ઝીંકતા યુવાનને સારવાર માટે ખસેડવામાં આવ્યો છે. આ અંગે યુનિવર્સિટી પોલીસ મથકના હેડ કોન્સ્ટેબલ આઇ.ટી. મોરવાડિયાએ સમીર ઉર્ફે સમલા અને એક યુવતી સામે ગુનો નોંધી આગળની કાર્યવાહી હાથધરી છે.