બે રાઉન્ડ પછી ખાલી પડેલી બેઠક માટે 10 ઓગસ્ટ પછી પ્રવેશ કાર્યવાહી થશે: 34 હજારથી વધુ બેઠકો ખાલી પડી
એડમિશન કમિટી દ્વારા ડિગ્રી ઈજનેરી બેઠક માટે પ્રવેશ કાર્યવાહી હાથ ધરવામાં આવી હતી. જેમાં 137 સંસ્થામાં પ્રવેશની ફાળવણી કરવામાં આવી છે. ઇજ્નેરીનું તેજ ઝાંખું પડ્યુંહોય તેમ બે રાઉન્ડ બાદ પણ 60 ટકા શીટો ખાલીખમ છે. સંસ્થા પૈકી 26 સંસ્થાની 75 ટકાથી લઈને 100 ટકા બેઠક ભરાઈ ગઈ છે. જ્યારે 20 સંસ્થાની 50 ટકાથી લઈને 75 ટકા બેઠક ભરાઈ છે. 18 સંસ્થાની 25 ટકાથી લઈને 50 ટકા બેઠક ભરાઈ છે. જ્યારે 22 બેઠકની 10 ટકાથી લઈને 25 ટકા બેઠક ભરાઈ છે. જ્યારે 51 સંસ્થા એવી છે કે જેમની 10 ટકા બેઠક પણ ભરાઈ નથી.
ડિગ્રી ઈજનેરી અભ્યાસક્રમમાં પ્રવેશ માટે એડમિશન કમિટી દ્વારા બીજા રાઉન્ડની ફાળવણી કરવામાં આવી છે. જેમાં 19958 વિદ્યાર્થીને પ્રવેશની ફાળવણી કરવામાં આવી છે. પ્રવેશ ફાળવાયેલા વિદ્યાર્થીઓએ 6 ઓગસ્ટ સુધીમાં પ્રવેશ કન્ફર્મ કરાવવાના રહેશે, જ્યારે 10 ઓગસ્ટ સુધીમાં જે-તે સંસ્થા ખાતે રિપોર્ટ કરવાનો રહેશે. બે રાઉન્ડ પછી ખાલી પડેલી બેઠક માટે 10 ઓગસ્ટ પછી પ્રવેશ કાર્યવાહી થશે. બીજા રાઉન્ડની ફાળવણી બાદ પણ ડિગ્રી ઈજનેરીમાં 34 હજાર કરતા વધુ બેઠક ખાલી પડી છે. ગત વર્ષે એડમિશન કમિટી દ્વારા બીજા રાઉન્ડમાં 17640 વિદ્યાર્થીને પ્રવેશની ફાળવણી કરવામાં આવી હતી. એડમિશન કમિટી દ્વારા બીજા રાઉન્ડની ફાળવણી કરવામાં આવી છે તે વિદ્યાર્થી પોર્ટલ પર લોગઇન કરીને જોઈ શકશે.
નિયત પ્રવેશને કન્ફર્મ કરવા માટે વિદ્યાર્થી ઓનલાઈન ફી ભરીને કન્ફર્મ કરી શકશે. જે વિદ્યાર્થીને શૂન્ય ફીથી પ્રવેશ કન્ફર્મ કરવાનો છે તેમણે પોર્ટલ પર કન્ફર્મ કરીને પ્રવેશ કાયમ કરવાનો રહેશે. પ્રવેશ કન્ફર્મ કરતા વિદ્યાર્થી એડમિશન લેટર ડાઉનલોડ કરી શકશે. બીજા રાઉન્ડનો પ્રવેશ કન્ફર્મ કરવા માટે છેલ્લી તારીખ 6 ઓગસ્ટ સુધીની છે. વિદ્યાર્થીએ સંસ્થા ખાતે 10 ઓગસ્ટ સુધીમાં રિપોર્ટ કરવાનો રહેશે. પ્રવર્તમાન નિયમોનુસાર બે રાઉન્ડ પછીની ખાલી બેઠક પરના પ્રવેશની કાર્યવાહી 10 ઓગસ્ટથી શરૂ થશે. જેનો વિગતવાર કાર્યક્રમ સમિતિની વેબસાઈટ પર ઉપલબ્ધ કરવામાં આવશે.
પૂરક પરીક્ષામાં પાસ થયેલા વિદ્યાર્થી, ગુજકેટ ન આપેલા હોય તેવા વિદ્યાર્થી અને અગાઉ રજિસ્ટ્રેશન ન કરેલા હોય તેવા વિદ્યાર્થીની સરકારી સંસ્થાની પ્રવેશની કાર્યવાહી બીજા રાઉન્ડ બાદ જાહેર કરવામાં આવશે. સરકારી અને અનુદાનિત સંસ્થાની 11285 બેઠક પૈકી 8458 બેઠક પર પ્રવેશ ફાળવાયો છે, 2827 બેઠક ખાલી પડી છે.
