ટેસ્લાએ વિશ્વભરમાં ધૂમ મચાવી છે. અદ્યતન ટેકનોલોજી સાથેની આ કાર હવે ટૂંક સમયમાં ભારતમાં પણ દોડવા લાગે તો નવાઈ નહિ. બીજી તરફ મહત્વની વાત તો એ છે કે ટેસ્લાનું સ્ટીયરીંગ ગુજરાત તરફ વળવાનો અંદેશો છે. એટલે કે તેનો મેન્યુફેક્ચરિંગ પ્લાન્ટ ગુજરાતમાં સ્થપાય તેવી શકયતા છે. આ મામલે મુખ્યમંત્રીએ સેલ્ફ મારી દીધો છે. એટલે કે તેઓએ જણાવ્યું છે કે વાતચીતની ચેનલ ચાલુ જ છે. હવે કેન્દ્ર સરકાર શુ નિર્ણય લ્યે છે તેના ઉપર મદાર છે.
મુખ્યમંત્રી ભુપેન્દ્ર પટેલે જણાવ્યું કે ભારતમાં મેન્યુફેક્ચરિંગ ફેસિલિટી સ્થાપવા ટેસ્લા અને કેન્દ્ર સરકાર સાથે વાતચીત ચાલી રહી છે. બીજી તરફ ગુજરાત રાજ્ય રોકાણ માટે અનુકૂળ વાતાવરણને પ્રોત્સાહન આપવાની પ્રતિબદ્ધતા સાથે સજ્જ છે. અમે તેમની યોજનાઓમાં નોંધપાત્ર ભૂમિકા ભજવીએ તે સુનિશ્ચિત કરવા માટે ગુજરાત સૌથી યોગ્ય સમયે ટેસ્લા સાથે જોડાણ કરશે. પ્રાથમિક ચર્ચાઓ કેન્દ્ર સરકાર દ્વારા કરવામાં આવી રહી છે. જો કે, અમે પણ કોમ્યુનિકેશન માટે ચેનલો ખુલ્લી રાખી છે.
ટેસ્લાની કેન્દ્ર સાથે વાતચીત ચાલુ, ત્યાંથી લીલીઝંડી મળ્યા બાદ પ્રોજેકટ ગુજરાતની ઝોળીમાં પડે તેવા ઉજળા સંકેતો
ગુજરાત વહીવટીતંત્રે ભારતમાં યુએસ કંપનીની યોજનાઓને ટેકો આપવા માટે ટેસ્લા ઇન્ક સાથે સંચાર ચેનલો ખુલ્લી રાખી છે તેવું સ્પષ્ટ પણે મુખ્ય પ્રધાન ભૂપેન્દ્ર પટેલે એક ઇમેઇલ ઇન્ટરવ્યુમાં જણાવ્યું છે. આમ ટેસ્લાનો પ્રોજેકટ ગુજરાતની ઝોલીમાં પડે તો નવાઈ નથી. એકતરફ ગુજરાત ઔદ્યોગિક ક્ષેત્રે હરણફાળ ભરી રહ્યું છે. ગુજરાત સુરક્ષાની સાથે ઔદ્યોગિક પ્રોત્સાહનો આપવામાં પણ ટોચે હોય ટેસ્લાના પ્લાન્ટ માટે પસંદગીનો કળશ ટેસ્લા ઉપર ઢોળાય તેવી શકયતા સેવાઈ રહી છે.
વધુમાં મુખ્યમંત્રીએ જણાવ્યું હતું કે રાજ્યએ દેશના આર્થિક ઉત્પાદનમાં તેનું યોગદાન 2026-27 સુધીમાં 8% થી થોડું વધારીને 10% કરવાનું લક્ષ્ય નક્કી કર્યું છે, તે સમય સુધીમાં તે 500 બિલિયન ડોલરની અર્થવ્યવસ્થા બનવાની આશા રાખે છે. રાજ્ય અમદાવાદ-મુંબઈ હાઈ-સ્પીડ રેલ પ્રોજેક્ટમાં ધ્યાન કેન્દ્રિત કરી રહ્યું છે. અર્થતંત્રને હરિયાળી બનાવવા અને ગ્રીન હાઈડ્રોજન હબ બનાવવાની સાથે વૈશ્વિક ઉત્પાદન અને ટ્રેડિંગ હબ બનાવવાના પુરજોશમાં પ્રયાસો થઈ રહ્યા છે.
તેઓએ ઉમેર્યું કે ગુજરાતે રાષ્ટ્રીય વિકાસ દરમાં સતત આગળ રહીને ‘ભારતના વિકાસ એન્જિન’નું બિરુદ મેળવ્યું છે. દેશની વસ્તીના માત્ર 5% હોવા છતાં, ગુજરાત રાષ્ટ્રીય જીડીપીમાં 8.3% થી વધુ યોગદાન આપે છે. અગાઉના વર્ષમાં, ભારતની કુલ વેપારી નિકાસમાં રાજ્યનો હિસ્સો 33% હતો.
ગુજરાતે ‘મેક ઈન ઈન્ડિયા’, ‘સ્ટાર્ટઅપ ઈન્ડિયા’ અને ‘ડિજિટલ ઈન્ડિયા’ જેવી રાષ્ટ્રીય પહેલના લાભોનો અસરકારક રીતે ઉપયોગ કર્યો છે. અમારા ઈન્ફ્રાસ્ટ્રક્ચર પ્રોજેક્ટ્સ, જેમ કે ધોલેરા સ્પેશિયલ ઈન્વેસ્ટમેન્ટ રિજન, ડાયમંડ રિસર્ચ એન્ડ મર્કેન્ટાઈલ (ડ્રીમ) સિટી, ગિફ્ટ સિટી અને સેક્ટર-વિશિષ્ટ ઔદ્યોગિક ઉદ્યાનો, સ્વચ્છ ઉર્જા, સ્વ-નિર્ભરતા અને અર્ધ-વાહકની નીતિઓ સાથે મળીને ભારતને 2047 સુધીમાં વિકસિત દેશ બનવાની સુવિધા આપવા માટે રચાયેલ છે.
રાજ્યના વિકાસનો આગામી તબક્કો નવા પ્રોજેકટ ઉપર નિર્ભર
સીએમએ જણાવ્યું કે ગુજરાતનો આગામી વિકાસનો તબક્કો ગિફ્ટ સિટી, ધોલેરા સર, ડ્રીમ સિટી, મંડલ-બેચરાજી એસઆઈઆર, પીએમ-મિત્ર પાર્ક, બલ્ક ડ્રગ પાર્ક, ગ્રીનફિલ્ડ બંદરો અને એલએનજી ટર્મિનલ અને અમદાવાદને જોડતી આગામી હાઈ-સ્પીડ રેલ પ્રોજેક્ટ જેવા મેગા પ્રોજેક્ટ્સ પર આધારિત છે. ધોલેરા ખાતે સેમિકન્ડક્ટર ડિસ્પ્લે ફેબ મેન્યુફેક્ચરિંગ પ્લાન્ટ સ્થાપવા અંગે, વેદાંત અને ફોક્સકોન બંને સ્વતંત્ર રીતે તકો શોધી રહ્યા છે. દરમિયાન, માઈક્રોન એસેમ્બલી, ટેસ્ટિંગ, માર્કિંગ અને પેકેજિંગ પ્રોજેક્ટનું બાંધકામ પહેલેથી જ ચાલી રહ્યું છે.
ગુજરાતને દેશનું મોડેલ ગ્રીન સ્ટેટ બનાવવા પ્રયાસો
આબોહવા પરિવર્તન એ વૈશ્વિક ચિંતા છે, અને ગુજરાતે વડા પ્રધાનના માર્ગદર્શન હેઠળ સમર્પિત આબોહવા પરિવર્તન વિભાગની સ્થાપના કરીને તેને સંબોધવામાં આગેવાની લીધી હતી. ગુજરાત ભારતના રહેણાંક સોલાર રૂફટોપ્સમાં પણ આગળ છે. 2.9 ગીગાવોટ જેમાં કુલ રૂફટોપ ઉપભોક્તા 440,000 થી વધુ છે. તેની સ્થાપિત ક્ષમતા સાથે રૂફટોપ સોલરમાં ગુજરાત તમામ રાજ્યોમાં પ્રથમ ક્રમે છે. મોઢેરા ખાતેના ‘સોલાર વિલેજ’ને વૈશ્વિક ઓળખ મળી છે. ગુજરાત ભારત સરકાર સાથે મળીને કામ કરીને વૈશ્વિક ગ્રીન હાઇડ્રોજન કેપિટલ બનવા માટે પ્રતિબદ્ધ છે. વધુમાં, ગુજરાતે કેનાલ-ટોપ સોલાર પ્રોજેક્ટની પહેલ કરી અને 2025 સુધીમાં વિશ્વના સૌથી મોટા હાઇબ્રિડ સોલાર અને વિન્ડ પાર્ક દ્વારા ભારતની રિન્યુએબલ એનર્જી ક્ષમતામાં 30ગીગાવોટ ઉમેરવાની યોજના બનાવી છે.
સરકારની સકારાત્મક વલણથી અનેક વિદેશી કંપનીઓએ ગુજરાતમાં પ્રવેશવા રસ દાખવ્યો
મુખ્યમંત્રીએ જણાવ્યું કે સક્રિય નીતિ-નિર્માણ, વ્યવસાય કરવા માટે અનુકૂળ વાતાવરણ, રોકાણકાર-મૈત્રીપૂર્ણ અભિગમ, મજબૂત ઔદ્યોગિક ઈન્ફ્રાસ્ટ્રક્ચર અને જીવનની સુધારેલી ગુણવત્તાને લીધે, ગુજરાત હવે ભારતીય અને વૈશ્વિક સમૂહો માટે ટોચની પસંદગી તરીકે ઊભું છે. યુએસ, જાપાન, ફ્રાન્સ, જર્મની, નેધરલેન્ડ, યુકે, સ્વિટ્ઝર્લેન્ડ, ઇટાલી, સ્વીડન, યુએઇ અને સાઉદી અરેબિયાની કંપનીઓએ ગુજરાતમાં રિન્યુએબલ એનર્જી, કેમિકલ્સ, ફૂડ પ્રોસેસિંગ, નાણાકીય જેવા વિવિધ ક્ષેત્રોમાં ઊંડો રસ દાખવ્યો છે. નાણાકીય વર્ષ 2023-24 માં, સપ્ટેમ્બર સુધી, ગુજરાત સરકારે 55 થી વધુ કંપનીઓ સાથે સમજૂતીના મેમોરેન્ડમ પર હસ્તાક્ષર કર્યા છે, જેમાં એગ્રો અને એગ્રો-ફૂડ પ્રોસેસિંગ, ટેક્સટાઇલ અને એપેરલ, એન્જિનિયરિંગ, ઓટોમોબાઇલ, હેલ્થકેર સહિતના ક્ષેત્રોમાં તકો ઊભી થવાની ધારણા છે.
