ચીને તાઇવાનને ઘેરી લીધા બાદ યુદ્ધઅભ્યાસના નામે આસપાસના વિસ્તારોમાં મિસાઈલમારો ચલાવ્યો અને 100 ફાઇટર જેટ ઉડાવ્યા
વર્ષોથી વિવાદો જ પેદા કરવાનું કામ કરતાં ચીને હવે તાઇવાનને પોતાનો જ એક હિસ્સો ગણાવીને તેના ઉપર કબજો કરવાના મેલા મનસૂબા સાથે તેને ભીંસમાં લેવાનું શરૂ કર્યું છે.ચીને તાઇવાનને ઘેરી લીધા બાદ યુદ્ધઅભ્યાસના નામે આસપાસના વિસ્તારોમાં મિસાઈલમારો ચલાવ્યો અને 100 ફાઇટર જેટ ઉડાવ્યા છે. જેને કારણે બન્ને દેશો વચ્ચે તણાવ ચરમસીમાએ પહોંચ્યો છે. અને યુદ્ધની દહેશત પેદા થઈ રહી છે.
રશિયા અને યુક્રેન વચ્ચે છેલ્લા 6 મહિનાથી ભીષણ યુદ્ધ ચાલી રહ્યું છે. હજારો નિર્દોષ લોકો મૃત્યુ પામ્યા છે, અર્થવ્યવસ્થા પડી ભાંગી છે અને સમગ્ર વિશ્વની સામે અનેક નવા પડકારો ઉભા થયા છે. હવે આ યુદ્ધની અસરમાંથી વિશ્વ બહાર નીકળ્યું નથી. ત્યાં બીજા યુદ્ધની દહેશતે આખી દુનિયાને ચિંતામાં મૂકી દીધી છે. આ સમયે ચીન અને તાઈવાન વચ્ચે તણાવ ચરમસીમાએ પહોંચી ગયો છે. સ્થિતિ એવી બની ગઈ છે કે ચીન ડરાવવા માટે તાઈવાનની આસપાસના વિસ્તારોમાં મિસાઈલ છોડી રહ્યું છે.
અમેરિકી સંસદના સ્પીકર નેન્સી પેલોસી થોડા દિવસો પહેલા તાઈવાનના પ્રવાસે આવી હતી. તે મુલાકાત પહેલા જ ચીન સતત ધમકી આપી રહ્યું હતું. એવું કહેવામાં આવી રહ્યું હતું કે તાઈવાનમાં ચીનની સાર્વભૌમત્વ સાથે રમત રમાઈ રહી છે. પરંતુ ધમકીઓ સામે ન તો અમેરિકા ઝૂક્યું અને ન તો નેન્સી પેલોસી. આવી સ્થિતિમાં નેન્સીએ પણ તાઈવાનનો પ્રવાસ પૂરો કરીને ચીનને મોટો સંદેશ આપ્યો. પરિણામ એ આવ્યું કે શબ્દયુદ્ધમાં સક્રિય ચીન એક અલગ જ રસ્તે નીકળી ગયું.
ચીને તાઈવાન નજીક 100 ફાઈટર જેટ ઉડાવ્યા છે. આ પહેલા બુધવારે 27 ફાઈટર એરક્રાફ્ટ તાઈવાનના એર ઝોનમાં પ્રવેશ્યા હતા. ગુરુવારે ચીને એક ડગલું આગળ વધીને તાઈવાનની આસપાસના વિસ્તારો પર 11 બેલેસ્ટિક મિસાઈલો છોડી હતી.
ચીને છોડેલી 5 મિસાઈલ જાપાનમાં પડી!!
યુએસ હાઉસ સ્પીકર નેન્સી પેલોસીની મુલાકાત પછી, ચીન એક મોટી સૈન્ય કવાયત કરી રહ્યું છે અને તાઈવાનની આસપાસના વિસ્તારોમાં મિસાઈલ છોડી રહ્યું છે.જાપાનના રક્ષા મંત્રી નોબુઓ કિશીએ દાવો કર્યો છે કે તેમના એક્સક્લુઝિવ ઈકોનોમિક ઝોનમાં પાંચ બેલેસ્ટિક મિસાઈલો પડી છે. કિશીએ કહ્યું કે આવું પહેલીવાર બન્યું છે અને જાપાન વ્યૂહાત્મક રીતે તેનો વિરોધ કરી રહ્યું છે. તેમણે કહ્યું કે આ એક ગંભીર સમસ્યા છે કારણ કે પ્રશ્ન રાષ્ટ્ર અને નાગરિકોની સુરક્ષાનો છે.જાપાનનો દક્ષિણ ભાગ ઓકિનાવા તાઈવાનની સૌથી નજીક છે. તેનો વિશિષ્ટ આર્થિક જળ જાપાનના દરિયાકાંઠે 200 નોટિકલ માઈલ સુધી છે.
ચીને અમેરિકા સામેના તણાવમાં ભારતને ખેંચવાનો પ્રયાસ કર્યો
તાઈવાન મુદ્દે અમેરિકા સાથે વધી રહેલા તણાવ વચ્ચે ચીને ભારતને સમગ્ર પ્રકરણમાં ખેંચવાનો પ્રયાસ કર્યો છે. ચીનના વિદેશ મંત્રાલય દ્વારા જારી કરવામાં આવેલા નિવેદનમાં અમેરિકાને ધમકી આપતા કહેવામાં આવ્યું છે કે વન-ચાઈના નીતિને ભારત સહિત તમામ આંતરરાષ્ટ્રીય સમુદાયનું સમર્થન છે. ભારતે આ મુદ્દે હજુ સુધી સત્તાવાર રીતે કોઈ ટિપ્પણી કરી નથી. પરંતુ, એ પણ હકીકત છે કે ભારતે લગભગ એક દાયકાથી એક ચીન નીતિ પર વ્યૂહાત્મક મૌન સેવ્યું છે.ચીની દૂતાવાસે એક પછી એક અનેક પ્રેસ રિલીઝ જારી કરી. જેમાં તાઈવાનને ચીનનો અભિન્ન અંગ ગણાવ્યો છે. ભારતનો ઉલ્લેખ કરવામાં આવ્યો છે કે તે કેવી રીતે હંમેશા એક ચીન નીતિનું પાલન કરે છે.
જો તાઇવાન ઉપર યુદ્ધના વાદળો છવાશે તો સેમિક્ધડકટરની અછત સર્જાશે
ચીન તાઈવાનને કબજે કરવાનો પ્રયાસ કરી રહ્યું છે. જો તાઈવાન પર હુમલો થશે તો દુનિયાભરના મોબાઈલ અને ઓટો ઈન્ડસ્ટ્રીમાં ચિપ કટોકટી સર્જાશે જે સૌથી મોટી હશે. હકીકતમાં, વિશ્વના 90 ટકા અદ્યતન સેમિક્ધડક્ટર તાઇવાનમાં બને છે. ગયા વર્ષે, તાઈવાને માત્ર સેમી-ક્ધડક્ટર કેટેગરીમાં 118 બિલિયન ડોલરની નિકાસ કરી હતી. ટીએસએમસી એટલે કે તાઈવાન સેમિક્ધડક્ટર મેન્યુફેક્ચરિંગ કંપની વિશ્વની તમામ મોટી કંપનીઓને ચિપ્સ સપ્લાય કરે છે.
