ટીમ ગીલે ત્રીજી ટી-20 જીતી ઝીમ્બાબ્વે સામેની સિરીઝમાં 2-1થી આગળ

• સુકાની ગિલના 66, ઋતુરાજ ગાયકવાડના 49 રનની વિસ્ફોટક ઈનિંગ્સ: વોશિંગ્ટનની ત્રણ વિકેટ: શ્રેણીની ચોથી ટી20 શનિવારે હરારે સ્પોર્ટ્સ ક્લબ ખાતે રમાશે

શુભમન ગિલની કેપ્ટન્સ ઈનિંગ્સની મદદથી ભારત ઝિમ્બાબ્વે સામેની ત્રીજી ટી20માં અપેક્ષા મુજબ એકતરફી વિજય મેળવવાની સાથે જ શ્રેણીમાં 2-1ની લીડ મેળવી લીધી છે. ભારતના સિનિયર ખેલાડીઓ યશસ્વી જયસ્વાલ, સંજૂ સેમસન અને શિવમ દુબે ટીમમાં પરત ફરતા ભારતીય ટીમ વધુ મજબૂત બની હતી. ભારતે સુકાની ગિલના 66 રન તથા ઋતુરાજ ગાયકવાડના 49 રનની ઈનિંગ્સની મદદથી 20 ઓવરમાં ચાર વિકેટે 182 રનનો સ્કોર રજૂ કર્યો હતો.જવાબમાં ઝિમ્બાબ્વેની ટીમનો પ્રારંભિક ધબડકો થયા બાદ માયર્સે અણનમ ફિફ્ટી ફટકારીને લડત આપી હતી પરંતુ ટીમનો સ્કોર નિર્ધારિત ઓવરમાં છ વિકેટે 159 રન સુધી જ સિમિત રહેતા ભારતનો 23 રને વિજય થયો હતો. ભારત તરફથી વોશિંગ્ટન સુંદરે ચાર ઓવરમાં 15 રન આપીને ત્રણ વિકેટ ઝડપી હતી અને મેન ઓફ ધ મેચ બન્યો હતો. ભારત અને ઝિમ્બાબ્વે વચ્ચે શ્રેણીની ચોથી ટી20 શનિવારે 13 જુલાઈના રોજ હરારે સ્પોર્ટ્સ ક્લબ ખાતે રમાશે. ભારતે ટોસ જીતીને પ્રથમ બેટિંગ લીધી હતી. યશસ્વ જયસ્વાલે ઓપનર તરીકે પુનરાગમન કર્યું હતું. જયસ્વાલે 27 બોલમાં ચાર ચોગ્ગા અને બે છગ્ગાની મદદથી 36 રન કર્યા હતા. કેપ્ટન શુભમન ગિલે પણ હરારે ખાતે નવી વિકેટ પર ફટકાબાજી કરી હતી અને 49 બોલમાં 66 રન નોંધાવ્યા હતા જેમાં સાત ચોગ્ગા અને ત્રણ સિક્સરનો સમાવેશ થયો હતો. પ્રથમ વિકેટ માટે બંનેએ 67 રન જોડ્યા હતા. ઝિમ્બાબ્વેના કેપ્ટન સિકંદર રઝાએ આ પાર્ટનરશિપને તોડતા ટીમને પ્રથમ સફળતા અપાવી હતી. ગત મેચમાં સદી ફટકારનાર અભિષેક શર્મા ત્રીજા ક્રમે બેટિંગમાં ઉતર્યો હતો પરંતુ 10 રન કરી રઝાનો બીજો શિકાર બન્યો હતો. ઋતુરાજ ગાયકવાડે ગિલનો સાથ આગળ ધપાવ્યો હતો અને 29 બોલમા ચાર ચોગ્ગા અને ત્રણ છગ્ગાના સહારે 49 રન કરતા બંનેએ ત્રીજી વિકેટ માટે 72 રન જોડ્યા હતા. મુઝારબાનીએ પહેલા ગિલ અને બાદમાં ગાયકવાડને આઉટ કરી બે સફળતા મેળવી હતી. સંજૂ સેમસન 12 રને જ્યારે રિન્કુ એક રન કરીન નોટ આઉટ રહ્યા હતા. ઝિમ્બાબ્વેની ફિલ્ડિંગ પણ કંગાળ રહી હતી અને કેટલાક કેચ છૂટ્યા હતા તેમજ એક્સ્ટ્રા રન પણ આપ્યા હતા.