તસ્કરોને હાથે કોઈ મોટી મતા ન લાગી: બે તસ્કરોના સીસીટીવીમાં ફૂટેજ મળ્યા
શહેરમાં મવડી નજીક બાપા સીતારામ ચોક પાસે રાત્રીના સમયે તસ્કરોએ આઠ દુકાનોના તાળા તોડયાની જાણ થતાં પોલીસ ઘટના સ્થળે દોડી જઈ સીસીટીવી ફૂટેજ આધારે તપાસનો ધમધમાટ શ‚ કર્યો છે.
આ અંગે પોલીસમાંથી પ્રાપ્ત વિગત મુજબ શહેરના મવડી ગામ નજીક બાપાસીતારામ ચોક પાસે આવેલા આર્કેડ અને પ્લેટિનીયમ કોમ્પલેક્ષમાં તસ્કરોએ એક સાથે આઠ દુકાનોને નિશાન બનાવી તાળા તોડયા હતા. તસ્કરોએ તાળા તોડયા બાદ શટર ઉંચકી બનાવને અંજામ આપ્યો હતો. સવારે બનાવની જાણ થતાં તાલુકા પોલીસ મથકનો સ્ટાફ ઘટના સ્થળે દોડી ગયો હતો.
પ્રાથમિક જાણકારી મુજબ તસ્કરોએ આર્કેડ કોમ્પ્લેક્ષમાં આવેલી રોયલ કલેકશન, ગ્રેન્સી બ્યુટી પાર્લર, પ્રિન્સ ફેશન, શ્રધ્ધા ડેન્ટલ, ક્લિનીક અને ફોરમ કિડસવેરને નિશાન બનાવી હતી. ત્યારબાદ બાજુમાં આવેલા પ્લેટિનીયમ કોમ્પ્લેક્ષમાં ખોડિયાર ફેશન અને ક્રિષ્ના કોમ્પ્યુટર સહિત દુકાનોના તાળા તોડયા હતા. જો કે આઠેય દુકાનોમાં કોઈ મોટી રકમ તથા કિંમતી વસ્તુ ન હોવાથી કોઈ મોટી મત્તા હાથ લાગી ન હતી. તાલુકા પોલીસ મથકના સ્ટાફે સીસીટીવી ફૂટેજ તપાસી અજાણ્યા શખ્સોની શોધખોળ હાથ ધરી છે.
