સ્વચ્છ સર્વેક્ષણ-2021ના વિજેતાઓની જાહેરાત : સુરતના મેયર હેમાલી બોઘાવાલી, શહેરી વિકાસ મંત્રી વિનુભાઈ મોરડીયા તથા કમિશનર બંછાનિધી પાનીએ રાષ્ટ્રપતિના હસ્તે સન્માન સ્વીકાર્યું
અબતક, રાજકોટ :
સ્વચ્છ સર્વેક્ષણ-2021ના વિજેતાઓની જાહેરાત કરવામાં આવી છે. જેમાં બીજા નંબરે ગુજરાતના સુરત શહેરનો નંબર આવ્યો છે. સતત પાંચમી વખત મધ્યપ્રદેશનું ઈન્દોર શહેર પ્રથમ નંબરે રહ્યું છે.ત્રીજા નંબરે આંધપ્રદેશના વિજયવાડાનો નંબર આવ્યો છે. રાષ્ટ્રપતિ રામનાથ કોવિંદે આજે વિજેતાઓને સન્માનિત કર્યા હતા. જ્યારે અમદાવાદને દેશના સૌથી સ્વચ્છ કેન્ટોનમેન્ટ તરીકે જાહેર કરાયું છે.
સ્વચ્છ ભારત મિશન-અર્બન 2.0 હેઠળ ભારતને કચરા મુક્ત બનાવવાના વડા પ્રધાન નરેન્દ્ર મોદીના વિઝનની હરોળમાં આ સમારોહમાં કચરા મુક્ત શહેરોની શ્રેણી હેઠળ આવતા વિજેતા શહેરોનું સન્માન કરવામાં આવ્યું હતું. આ યાદીમાં સુરત ફરી એક વખત બીજા ક્રમે આવતા ગુજરાત અને સુરત માટે આ એક ગર્વની બાબત સાબિત થઈ છે. રાષ્ટ્રપતિના હસ્તે મેયર હેમાલી બોઘાવાલી અને શહેરી વિકાસ મંત્રી વિનુભાઈ મોરડીયા તથા પાલિકા કમિશનર બંછાનિધી પાનીએ સન્માન સ્વિકાર્યું હતું. એક લાખથી વધુ વસ્તીવાળા શહેરમાં સુરતને બીજો ક્રમ મળ્યો છે. સર્વેક્ષણ અંતર્ગત મ્યુનિ.એ 1 લાખથી વધુ દસ્તાવેજો અપલોડ કર્યા હતા. તેમાં સુરતને 1500માંથી 1350 માર્કસ મળ્યા છે.
આ કાર્યક્રમમાં, આવાસ અને શહેરી બાબતોના મંત્રાલયની પહેલ સફાઇ મિત્ર સુરક્ષા ચેલેન્જ હેઠળ શ્રેષ્ઠ પ્રદર્શન કરતા શહેરોને માન્યતા આપતી વખતે સફાઈ કર્મચારીઓના યોગદાનની પ્રશંસા પણ કરવામાં આવી હતી. આ વખતે સ્વચ્છ સર્વેક્ષણમાં 4320 શહેરોનો સમાવેશ કરવામાં આવ્યો હતો, જે વિશ્વનો સૌથી મોટો સ્વચ્છતા સર્વેક્ષણ છે. શહેરોને સામાન્ય રીતે સ્ટાર સિસ્ટમનો ઉપયોગ કરીને રેટ કરાય છે અને આ વર્ષે 342 શહેરોને, 2018માં 56ની તુલનામાં કેટલાંક સ્ટાર રેટિંગની અંતર્ગત પ્રમાણપત્ર આપવામાં આવ્યા છે. તેમાં નવ ફાઇવ સ્ટાર શહેર, 166 થ્રી સ્ટાર શહેર, 167 એક સ્ટાર શહેર સામેલ છે.
મંત્રાલયે કહ્યું કે આ સ્વચ્છ સર્વેક્ષણનું છઠ્ઠું વર્ઝન છે જે પુરસ્કાર સમારંભ દરમ્યાન હાજર લોકોમાં કેન્દ્રીય આવાસ અને શહેરી બાબતોના મંત્રી, હરદીપ સિંહ પૂરી, રાજ્યમંત્રી કૌશલ કિશોર, મુખ્યમંત્રીઓ અને શહેરી વિકાસ મંત્રીઓ, ડિપ્લોમેટ્સ રાજ્ય અને શહેરના પ્રશાસકો અને વરિષ્ઠ અધિકારીઓ, સેકટર ભાગીદારો અને બ્રાન્ડ એમ્બેસેડર અને બિન સરકારી સંગઠનો અને સીએસઓ સહિત 1200 અતિથિઓની ભાગીદારી રહી હતી.
2016 માં આ પગલાની શરૂઆતમાં, સર્વેક્ષણમાં ફક્ત 73 મોટા શહેરોનો સમાવેશ કરવામાં આવ્યો હતો. આ વર્ષના સર્વેની સફળતા આ વખતે નાગરિકો તરફથી મળેલા પ્રતિસાદની સંખ્યાના આધારે જ નક્કી કરી શકાય છે. આ વખતે આ પ્રકારની વ્યવસ્થા કરવામાં આવી હતી. આ વખતે પાંચ કરોડથી વધુ ફીડબેક આવ્યા. ગયા વર્ષે આ સંખ્યા 1.87 કરોડ હતી. સ્વચ્છ સર્વેક્ષણ 2021′ અંગે મંત્રાલયે કહ્યું હતું કે જમીની સ્તરે રાજ્યો અને શહેરોના પ્રદર્શનમાં નોંધપાત્ર સુધારો થયો છે. ઉદાહરણ તરીકે, છ રાજ્યો અને છ કેન્દ્રશાસિત પ્રદેશોએ પાયાના સ્તરે તેમની કામગીરીમાં પાંચથી 25 ટકાનો સુધારો કર્યો છે, એમ તેમાં જણાવાયું હતું.
