- દિવાળી તહેવાર નિમિત્તે સુરત પોલીસ કમિશનરની અપીલ
- નાગરિકોને સાવધાનીપૂર્વક તહેવારની ઉજવણી કરવા કરી અપીલ
- જાહેરમાં જોખમી રીતે ફટાકડા ફોડનારાઓ સામે કડક કાર્યવાહીની ચેતવણી
Surat : ગુજરાત સહિત વિશ્વભરમાં આવતીકાલે દિવાળી પર્વની ઉમળકાભેર ઉજવણી કરવામાં આવશે. તેમજ દિવાળીનાં તહેવારમાં લોકો ફટાકડા ફોડીને ઉજવણી કરતા હોય છે. પરંતુ ઘણી વખત ફટાકડા ફોડવાથી મોટી દુર્ઘટનાઓ પણ સર્જાતી હોય છે. ત્યારે ફટાકડા ફોડતી વખતે કોઈ દુર્ઘટના ના સર્જાય તે માટે સુરત પોલીસે નાગરિકોને સાવધાનીપૂર્વક ફટાકડા ફોડવાની અપીલ કરી છે અને આ સાથે જ જાહેરમાં હાથમાં ફટાકડા ફોડતા, રોકેડ છોડતા અથવા અન્ય લોકોને નુકસાન પહોંચે તે રીતે ફટાકડા ફોડતા લોકોને ચેતવણી પણ આપી છે.
જાહેરમાં જોખમી રીતે ફટાકડા ફોડતા લોકોને ચેતવણી
સુરત શહેર પોલીસ કમિશનર અનુપમસિંહ ગેહલૌતે પત્રકારો સાથે વાતચીત કરતા જણાવ્યું કે, દિવાળીના તહેવાર પર જાહેરમાં માર્ગો પર વીડિયો બનાવવાનાં ચક્કરમાં રાહદારીને નુકસાન પહોંચે તે રીતે ફટાકડા ફોડતા લોકો સામે કડક કાર્યવાહી કરવામાં આવશે. આ ઉપરાંત તેમણે કહ્યું કે, જાહેરમાં હાથમાં ફટાકડા ફોડવા તેમ જ હાથમાં રાખી રોકેટ હવામાં ઊડાડતા, ફટાકડા ફોડતા કોઈ નજરે પડશે તો તેની સામે પણ સુરત પોલીસ કડક કાર્યવાહી કરશે.
વીડિયો સામે આવશે તો પણ કરાશે કડક કાર્યવાહી
આ દરમિયાન સુરત પોલીસ કમિશનરે જણાવ્યું કે, આ ઉપરાંત, જોખમી રીતે ફટાકડા ફોડનારનાં જો વીડિયો પણ સામે આવશે તો પણ એ વીડિયોનાં આધારે પોલીસ કાર્યવાહી કરશે. તેમજ સુરત પોલીસ કમિશનરે નાગરિકોને દિવાળીનાં તહેવાર નિમિત્તે સાવધાની રાખવા, સુખ-શાંતિથી તહેવારની ઉજવણી કરવા અને કોઈને નુકસાન ના પહોંચે તેનું ધ્યાન રાખવા અપીલ કરી છે.
