ગુજરાત હાઈકોર્ટ એડવોકેટ્સ અસોસિએશનના અધ્યક્ષ આસિમ પંડ્યાએ રાજ્યપાલ, મુખ્યમંત્રી અને વડાપ્રધાનને કરી રજુઆત
ગુજરાત હાઈકોર્ટ એડવોકેટ્સ અસોસિએશનના અધ્યક્ષ અસિમ પંડ્યાએ એક મહિના પહેલા સંઘ તરફથી રાજ્યપાલ સમક્ષ રજૂઆત કરી હતી કે કોર્ટમાં ગુજરાતી ભાષાના ઉપયોગને માન્યતા આપવામાં આવે. પરંતુ સંઘના જ અમુક લોકોએ વિરોધ કરતા રજૂઆત પાછી ખેંચવી પડી હતી. હવે તેમણે અંગત ધોરણે ભાષાને લગતી આ રજૂઆત વિવિધ તંત્ર સમક્ષ કરી છે.
અમદાવાદ- લગભગ એક મહિના પહેલા જ માંગ કરવામાં આવી હતી કે ગુજરાત હાઈકોર્ટમાં સુનાવણી દરમિયાન અંગ્રેજીની સાથે સાથે ગુજરાતી ભાષાનો ઉપયોગ કરવાની મંજૂરી મળવી જોઈએ. આ માંગને કારણે ઘણો વિવાદ સર્જાયો હતો અને હવે ફરી એકવાર ગુજરાત હાઈકોર્ટ એડવોકેટ્સ અસોસિએશનના અધ્યક્ષ આસિમ પંડ્યાએ રાજ્યપાલ, મુખ્યમંત્રી અને વડાપ્રધાનને વિનંતી કરી છે કે ગુજરાતી ભાષાના ઉપયોગને મંજૂરી આપવામાં આવવી જોઈએ.
સીનિયર એડવોકેટ આસિમ પંડ્યાએ તંત્ર સમક્ષ દલીલ કરી છે કે વર્ષ 2012 માં વિધાનસભા, મંત્રી પરિષદ અને ગવર્નર દ્વારા અંગ્રેજીની સાથે ગુજરાતી ભાષાના ઉપયોગને મંજૂરી આપવામાં આવી હતી. તો આ નિર્ણય પર અમલ કરવા માટે તંત્રએ કાર્યવાહી કરવી જોઈએ. આ સિવાય તેમણે લીગલ અને પ્રેક્ટિકલ ધોરણે અનેક દલીલો કરી હતી. તેમણે જણાવ્યું કે, મોટાભાગના દસ્તાવેજોનું અંગ્રેજીમાં ભાષાંતર કરવું પડે છે, જે પ્રક્રિયા ખર્ચાળ પણ છે.
ગત મહિને આસિમ પંડ્યાએ જીએચએએના અધ્યક્ષ તરીકે આ પ્રકારની રજૂઆત રાજ્યપાલ સમક્ષ કરી હતી. પરંતુ તેમને અસોસિએશનના જ અમુક સભ્યોના વિરોધનો સામનો કરવો પડ્યો હતો. આ સિવાય ગુજરાત હાઈકોર્ટના અમુક વકીલોએ પણ વિરોધ કર્યો હતો. રાજ્યપાલને રજૂઆત કરી તેના એક જ અઠવાડિયામાં તેમણે માંગ પાછી ખેંચવી પડી હતી કારણકે વિરોધ કરનારા વકીલોની દલીલ હતી કે, તેઓ અસોસિએશન તરફથી આ પ્રકારની માંગ મૂકવાની સત્તા નથી ધરાવતા.
હાઈકોર્ટના વકીલોએ ગુજરાતી ભાષાના ઉપયોગના વિરોધમાં દલીલો શરુ કરી તો નીચલી અદાલતોમાં વિરોધ શરુ થયો. અમુક બાર સંગઠનો દ્વારા બાર કાઉન્સિલ ઓફ ગુજરાતને સંદેશ મોકલવામાં આવ્યો કે, અંગ્રેજીની સાથે સાથે ગુજરાતીના ઉપયોગને તાત્કાલિક ધોરણે મંજૂરી આપવામાં આવે. નીચલી અદાલતના વકીલોની દલીલ હતી કે ફરજિયાતપણે અંગ્રેજી ભાષાના ઉપયોગને કારણે મોટા ભાગના વકીલો હાઈકોર્ટમાં હાજર નથી રહી શકતા કારણકે તેમને તે ભાષામાં ફાવટ નથી. જો ભાષાનો કોઈ અવરોધ નહીં હોય તો પ્રત્યેક વકીલને સમાન તક મળી રહેશે.
ઉલ્લેખનીય છે કે, અલગ અલગ કેસની સુનાવણી દરમિયાન ગુજરાત હાઈકોર્ટે કહ્યું છે કે ગુજરાત હાઈકોર્ટના કોઈ પણ કેસની કાર્યવાહી વખતે માત્ર અંગ્રેજી ભાષાનો ઉપયોગ કરવો જોઈએ.
