બીજું જનતા દળના સુપ્રીમોએ સતત છઠ્ઠી વખત વિધાનસભાની દાવેદારી કરી

• અત્યાર સુધીમાં બીજેડીએ લોકસભાની 15 બેઠક અને વિધાનસભાની 72 બેઠકો ઉપર ઉમેદવારો જાહેર કર્યા

ઓડિશાના મુખ્યમંત્રી અને બીજુ જનતા દળના વડા નવીન પટનાયકે રાજ્યની વિધાનસભા ચૂંટણી માટે ઉમેદવારોની પ્રથમ યાદી જાહેર કરી છે.  સીએમ પોતે હિંજીલી વિધાનસભા સીટ પરથી ચૂંટણી લડશે. તેઓ સતત છઠ્ઠી વખત ચૂંટણી લડી રહ્યા છે

બીજેડીએ અત્યાર સુધીમાં લોકસભાના 15 અને વિધાનસભાના 72 ઉમેદવારો જાહેર કરી દીધા છે. જેમાં લોકસભામાં બીજેડી મહાસચિવ પ્રણવ પ્રકાશ દાસને સંબલપુર લોકસભા બેઠક પરથી ઉમેદવાર બનાવવામાં આવ્યા છે, જ્યાં તેમનો મુકાબલો કેન્દ્રીય મંત્રી અને ભારતીય જનતા પાર્ટીના ઉમેદવાર ધર્મેન્દ્ર પ્રધાન સાથે થશે.  આ ઉપરાંત આદિત્ય બિરલા ગ્રુપના સંતરૂપ મિશ્રાને કટક લોકસભા બેઠક ઉપરથી મેદાનમાં ઉતારવામાં આવ્યા છે. ઓડિશાના મંત્રી સુદામ મરાંડી મયુરભંજ લોકસભા બેઠક પરથી ચૂંટણી લડશે, જ્યારે ભારતીય હોકી ટીમના ભૂતપૂર્વ કેપ્ટન દિલીપ તિર્કી સુંદરગઢ લોકસભા બેઠક પરથી ભૂતપૂર્વ કેન્દ્રીય મંત્રી અને આઉટગોઇંગ સાંસદ જુઅલ ઓરામનો સામનો કરશે.  લોકસભા સીટ માટેના અન્ય ઉમેદવારોમાં લંબોદર નિયલ (કાલાહાંડી), અંસુમન મોહંતી (કેન્દ્રપારા), પ્રજીપ કુમાર માઝી (નવરંગપુર) અને મનમથ રાઉત્રે (ભુવનેશ્વર), કૌશલ્યા હિકાકા (કોરાપુટ) અને રંજીતા સાહુ (આસ્કા)નો સમાવેશ થાય છે.  ઓડિશામાં લોકસભાની 21 અને વિધાનસભાની 147 બેઠકો છે.  ઓડિશામાં લોકસભા અને વિધાનસભાની ચૂંટણીઓ એક સાથે ચાર તબક્કામાં (13, 20, 25 મે અને 1 જૂને) મતદાન સાથે યોજાશે.

પટનાયક પોતે ગંજમ જિલ્લાના હિંજિલી વિધાનસભા મતવિસ્તારથી ચૂંટણી લડશે.  વિધાનસભા માટે જાહેર કરાયેલા 72 ઉમેદવારોમાં 13 નવા ચહેરા અને 12 મહિલા ઉમેદવારોનો સમાવેશ થાય છે.  બીજેડી પ્રમુખે ફરીથી મોટાભાગના મંત્રીઓ અને વિધાનસભા અધ્યક્ષ પ્રમિલા મલિકને ઉમેદવાર તરીકે નામાંકિત કર્યા છે.  મલ્લિક જાજપુર જિલ્લાની તેમની પરંપરાગત બેઠક બિંજારપુર વિધાનસભા મતવિસ્તારથી ચૂંટણી લડી રહ્યા છે.