- મની લોન્ડરિંગના કેસમાં દિલ્હીના ભૂતપૂર્વ આરોગ્યપ્રધાન જૈન વિરૂધ્ધ કરાશે કાર્યવાહી
દિલ્હીમાં સત્તા ગુમાવ્યા બાદ આમ આદમી પાર્ટીને આજે વધુ એક ઝટકો લાગ્યો છે. રાષ્ટ્રપતિ દ્રૌપદી મુર્મુએ આપ નેતા સત્યેન્દ્ર જૈન પર મની લોન્ડરિંગનો કેસ ચલાવવા માટે એન્ફોર્સમેન્ટ ડિરેક્ટોરેટને મંજૂરી આપી છે. ઇડી હવે કોર્ટમાં એક નવી પૂરક ચાર્જશીટ દાખલ કરશે જેમાં રાષ્ટ્રપતિની મંજૂરીની માહિતી આપવામાં આવશે. ગૃહ મંત્રાલયે દિલ્હીના પૂર્વ આરોગ્ય પ્રધાન વિરુદ્ધ ભારતીય નાગરિક સુરક્ષા સંહિતાની કલમ 218 હેઠળ મંજૂરી માંગી હતી.
ગૃહ મંત્રાલયે રાષ્ટ્રપતિને વિનંતી કરી હતી કે એન્ફોર્સમેન્ટ ડિરેક્ટોરેટ દ્વારા કરવામાં આવેલી તપાસ અને પૂરતા પુરાવાના આધારે જૈન સામે કાર્યવાહી કરવાની મંજૂરી આપવામાં આવે. તપાસ એજન્સીએ જૈન વિરુદ્ધ કથિત હવાલા વ્યવહારો સંબંધિત મની-લોન્ડરિંગ કેસમાં કેસ નોંધ્યો હતો. અને મે 2022 માં તેમની ધરપકડ કરી હતી. તેમજ એજન્સી એ તેમના અને તેમના પરિવારના સભ્યો દ્વારા નિયંત્રિત શેલ કંપનીઓ દ્વારા દિલ્હીના ઉત્તર પશ્ચિમ ગામડાઓમાં 123 એકરથી વધુ ખેતીની જમીન હસ્તગત કરવાનું આરોપ મૂક્યો હતો. તે હાલમાં જામીન પર બહાર છે અને ઇડીએ તેની સામે ચાર્જશીટ દાખલ કરી છે.
જૈને 2015 અને 2017 ની વચ્ચે વિવિધ વ્યક્તિઓના નામે જંગમ સંપત્તિ મેળવી હોવાના આરોપો પર મની લોન્ડરિંગનો કેસ નોંધવામાં આવ્યો હતો, જેના માટે તેઓ સંતોષકારક રીતે હિસાબ આપી શક્યા ન હતા. બાદમાં, ઇડીએ પ્રિવેન્શન ઓફ મની લોન્ડરિંગ એક્ટ હેઠળ પણ કેસ નોંધ્યો અને આરોપ લગાવ્યો કે તેમની માલિકીની અને નિયંત્રિત ઘણી કંપનીઓએ શેલ કંપનીઓ પાસેથી 4.81 કરોડ રૂપિયાની હાઉસિંગ એન્ટ્રીઓ મેળવી હતી જેના બદલામાં કોલકાતા સ્થિત એન્ટ્રી ઓપરેટરોને હવાલા દ્વારા રોકડ ટ્રાન્સફર કરવામાં આવી હતી.
