રશીયા- યુક્રેન વચ્ચેનું યુદ્ધ હવે વિશ્વ માટે તો સામાન્ય બની ગયું છે. યુદ્ધથી શુ બદલાયું તે તો આ બે દેશો જ અનુભવી રહ્યા છે. યુદ્ધના શરૂઆતના સમયમાં આખા વિશ્વને આ યુદ્ધની અસર પહોંચી હતી. પણ સમય જતાં હવે વૈશ્વિક સ્થિતિ સામાન્ય થઈ ગઈ છે. બીજી તરફ અન્ય દેશો પણ આ બન્ને દેશોની લડાઈ વચ્ચે પોતાના અંગત સ્વાર્થના રોટલા શેકી રહ્યા છે. તેવામાં હવે આ બન્ને દેશોની લડાઈ અટકાવવાના છેલ્લા પ્રયાસ પણ વિશ્વના બીજા દેશો કરી રહ્યા છે.
યુક્રેનમાં ચાલી રહેલા યુદ્ધ વચ્ચે સાઉદી અરેબિયા ઓગસ્ટની શરૂઆતમાં શાંતિ મંત્રણાનું આયોજન કરશે, જેમાં ભારત પણ ભાગ લઈ શકે છે. જોકે, સાઉદી અરેબિયા અને યુક્રેને હજુ સુધી વાતચીતની પુષ્ટિ કરી નથી. આ સમિટ લાલ સમુદ્રના બંદર શહેર જેદ્દાહમાં યોજાશે. તેમણે જણાવ્યું કે યુક્રેન ઉપરાંત બ્રાઝિલ, ભારત, દક્ષિણ આફ્રિકા અને અન્ય ઘણા દેશો સમિટમાં ભાગ લેશે.
વહીવટીતંત્રના ઉચ્ચ સ્તરીય અધિકારી પણ આ બેઠકમાં હાજરી આપે તેવી શક્યતા છે. અધિકારીના જણાવ્યા અનુસાર, યુક્રેન આ કાર્યક્રમની તૈયારીઓ સંભાળી રહ્યું છે. તેમણે કહ્યું કે રશિયા મંત્રણામાં ભાગ લે તેવી શક્યતા નથી. સૌથી પહેલા આ શાંતિ મંત્રણાની માહિતી ’ધ વોલ સ્ટ્રીટ જર્નલ’ દ્વારા આપવામાં આવી હતી. તેમણે ’વાટાઘાટોમાં સામેલ રાજદ્વારીઓ’ને ટાંકીને કહ્યું કે શાંતિ મંત્રણા 5-6 ઓગસ્ટના રોજ થશે અને લગભગ 30 દેશો તેમાં ભાગ લેશે.
હજુ સુધી સાઉદી અરેબિયાના અધિકારીઓ અને રિયાધમાં યુક્રેનિયન એમ્બેસીએ આ અંગે કોઈ ટિપ્પણી કરી નથી. આ સમિટના સમાચાર એવા સમયે આવ્યા છે જ્યારે અમેરિકાના રાષ્ટ્રીય સુરક્ષા સલાહકાર જેક સુલિવાન ગુરુવારે સાઉદી અરેબિયાની મુલાકાતે ગયા હતા. અધિકારીઓએ જણાવ્યું હતું કે સમિટ જૂનની મંત્રણા પછીનું આગલું પગલું છે. રશિયા અને યુક્રેન વચ્ચેના યુદ્ધ બાદથી વિશ્વ બે જૂથોમાં વહેંચાયેલું છે. ત્યાં એક જૂથ છે જે યુક્રેનને સીધી મદદ કરી રહ્યું છે.
અમેરિકાના નેતૃત્વમાં પશ્ચિમી દેશો યુક્રેનને શસ્ત્રો તેમજ રાજકીય મદદ પણ આપી રહ્યા છે. ઈરાન, સીરિયા અને બેલારુસ જેવા દેશો રશિયાને સીધી મદદ કરી રહ્યા છે. એક જૂથ છે જે તટસ્થ છે. મોટાભાગના આરબ દેશો તટસ્થ રહ્યા છે. ઓપેક પ્લસના સભ્યો હોવાને કારણે રશિયા અને સાઉદી નજીક છે. આ યુદ્ધ દરમિયાન સાઉદીએ ઘણી વખત આવા પગલા લીધા છે, જેનાથી રશિયાને ફાયદો થશે. અમેરિકાના દબાણ છતાં સાઉદીએ તેલનું ઉત્પાદન ઘટાડ્યું જેના કારણે ક્રૂડ ઓઈલ મોંઘું થયું.
ઉલ્લેખનીય છે કે આ બન્ને દેશો વચ્ચેના યુદ્ધના કારણે શરૂઆતના દિવસોમાં તો વિશ્વમાં ક્રૂડનું સંકટ ઉપરાંત ખાદ્ય સંકટ સહિતની અનેક સમસ્યાઓ ઉદભવી હતી. પણ ધીમે ધીમે વિશ્વ આખાએ વૈકલ્પિક રસ્તાઓ શોધી લેતા સ્થિતિ સામાન્ય બની ગઈ છે.
