રૂપિયો “મોટો” થઈ જશે !!!
નિકાસકારોને હવે ચુકવણાની સમસ્યા નહિ નડે, સરળ પદ્ધતિના કારણે નિકાસ પણ વધશે અને રૂપિયો પણ મજબૂત થતો જશે એટલે અર્થતંત્રને બુસ્ટર ડોઝ મળશે
આરબીઆઇએ આંતરરાષ્ટ્રીય વેપારને રૂપિયામાં સેટલ કરવા લીલીઝંડી આપ્યા બાદ હવે રશિયા અને ઈરાનમાં ચા અને બાસમતી ચોખાની નિકાસને વેગ મળશે તે સ્પષ્ટ થયું છે. જેને કારણે હવે રૂપિયો વધુ મજબૂત થઈ જશે.
નિકાસકારો રશિયા અને ઈરાનમાં ચૂકવણીને લઈને સમસ્યાઓનો સામનો કરી રહ્યા હતા. રશિયા અને ઈરાન ભારતીય ચાના મુખ્ય ખરીદદારો છે અને બાદમાં બાસમતી ચોખા માટેનું મુખ્ય સ્થળ પણ છે. આ બંને દેશો પશ્ચિમી પ્રતિબંધોનો સામનો કરી રહ્યા છે.
ભારત વાર્ષિક 45 મિલિયન કિલોગ્રામ ચાની રશિયામાં નિકાસ કરે છે. પરંતુ રશિયા અને યુક્રેન વચ્ચે ચાલી રહેલા યુદ્ધ અને યુએસ અને યુરોપના પ્રતિબંધોને કારણે જાન્યુઆરી-એપ્રિલમાં દેશમાં ચાની નિકાસ ગયા વર્ષના સમાન સમયગાળાની સરખામણીએ 10% ઘટી છે. ચાની નિકાસ કરતી અગ્રણી કંપની એશિયન ટીના ડિરેક્ટર મોહિત અગ્રવાલે જણાવ્યું હતું કે “સરકારના પગલાથી ચૂકવણીના મુદ્દાને ઉકેલવામાં મદદ મળશે. તે માત્ર રશિયા અને ઈરાનમાં ચાની નિકાસમાં વધારો કરશે નહીં પરંતુ ભારતને તમામ નિકાસ વધારવામાં પણ મદદ કરશે.
વિદેશી ખરીદદારો હવે ભારતીય બેંકમાં વોસ્ટ્રો એકાઉન્ટ ખોલી શકે છે અને તેઓ ભારતીય નિકાસકારોને રૂપિયામાં ચૂકવણી કરી શકે છે. ફોરેક્સ જોખમ વિદેશી ખરીદનારને ટ્રાન્સફર કરવામાં આવે છે કારણ કે રૂપિયાની રકમ નિશ્ચિત છે તેમ આઈએફએ ગ્લોબલના સ્થાપક અને સીઈઓ અભિષેક ગોએન્કાએ કહ્યું હતું.
2019માં ભારતે ઈરાનમાં 53 મિલિયન કિલો ચાની નિકાસ કરી હતી. જ્યારથી અમેરિકાએ ઈરાન પર પ્રતિબંધો લાદ્યા છે ત્યારથી ભારત ડોલર આધારિત વેપારમાં સામેલ થઈ શક્યું નથી. આથી, 2018માં રૂપિયો-રિયાલ ટ્રેડ મિકેનિઝમ મૂકવામાં આવ્યું હતું. આ અંતર્ગત ભારતની ઓઈલ રિફાઈનરીઓ ઈરાનમાંથી ક્રૂડ ઓઈલની આયાત માટે યુકો બેંક અને આઈડીબીઆઈ બેંકમાં ભારતીય રૂપિયા જમા કરાવે છે અને આ ફંડનો ઉપયોગ ઈરાનમાંથી નિકાસકારોના લેણાંની ચુકવણી માટે કરવામા આવે છે.
