પોર્ટની બાજુમાં જ ઇન્ડસ્ટ્રીયલ સિટી ડેવલપ કરીને માલની નિકાસમાં ભારણ બનતો ટ્રાન્સપોર્ટેશન ખર્ચ ઘટાડવા પ્રયાસો
ભૂતકાળમાં ધમધમતા અને હાલમાં વિકાસના અભાવે નિર્જન બનેલા જોડિયા અને સિક્કા સહિતના બંદરોમાં નવા પ્રાણ પુરાય તેવી આશા
સૌરાષ્ટ્ર વિશાળ દરિયાકિનારો ધરાવે છે. પણ કમનસીબે હજુ ઉદ્યોગોને તેનો ફાયદો મળી રહ્યો નથી. પરિણામે હવે રૂ. 2 લાખ કરોડના રોકાણ સાથે દહેજથી લઈ ઓખા સુધીના બંદરોના વિકાસ માટે મેરિટાઇમ બોર્ડ સજ્જ બન્યું છે. જેથી ભૂતકાળમાં ધમધમતા અને હાલમાં વિકાસના અભાવે નિર્જન બનેલા જોડિયા અને સિક્કા સહિતના બંદરોમાં નવા પ્રાણ પુરાય તેવી આશા જાગી છે.
વાઈબ્રન્ટ ગુજરાત ગ્લોબલ સમિટ 2024 પહેલા, ગુજરાત મેરીટાઇમ બોર્ડ એ દુબઈ અને સિંગાપોર જેવા સ્થાપિત વૈશ્વિક મેરીટાઇમ હબની તર્જ પર કલ્પના કરાયેલ મહત્વાકાંક્ષી પ્રોજેક્ટ ‘પોર્ટ સિટી’ બનાવવાની યોજનાને પુનર્જીવિત કરી છે.
એક દાયકા કરતાં પણ વધુ સમય પહેલાં, વૈવિધ્યસભર સમૂહ જીવીકે ગ્રૂપે બંદર શહેરની દરખાસ્ત કરી હતી, પ્રથમ દહેજમાં અને પછી સ્થાનાંતરિત કરીને દ્વારકા નજીક ઓખામઢીમાં તેનું નિર્માણ કરવાની યોજના હતી. જો કે, બાદમાં યોજના સ્થગિત કરવામાં આવી હતી અને દરખાસ્ત ધૂળ ખાઈ ગઈ હતી. જીવીકેએ મલેશિયાના વાયટીએલ કોર્પોરેશન સાથે પણ આ પ્રોજેક્ટ માટે વાટાઘાટો શરૂ કરી હતી.
જીએમબી આગામી 15 વર્ષમાં ગુજરાતના બંદરોની કાર્ગો હેન્ડલિંગ ક્ષમતા બમણી કરીને લગભગ 900 મિલિયન ટન કરવા માંગે છે. નવા શહેરમાં બંદરની નજીક ઔદ્યોગિક ઉત્પાદન એકમો હશે અને તેનો હેતુ લોજિસ્ટિક્સ ખર્ચમાં ઘટાડો કરવાનો છે, જીએમબીના એક વરિષ્ઠ અધિકારીએ જણાવ્યું હતું. પોર્ટ્સ રેગ્યુલેટર 500 ચોરસ કિમી જમીનમાં ફેલાયેલા બંદર શહેર અને આ પ્રોજેક્ટને રાજ્ય માટે આર્થિક ડ્રાઇવર બનાવવા માટે આગામી 15 વર્ષમાં રૂ. બે લાખ કરોડના રોકાણનો પ્રવાહનું લક્ષ્ય ધરાવે છે.
અધિકારીએ જણાવ્યું હતું કે જીએમબી બંદરોની હાલની કાર્ગો-હેન્ડલિંગ ક્ષમતા 450 મિલિયન ટન છે, અને બંદર શહેર દ્વારા સમાન ક્ષમતાનું સંચાલન કરવામાં આવશે. આ પોતાનામાં એક શહેર હશે. અમે ટૂંક સમયમાં પ્રોજેક્ટ માટે કન્સલ્ટન્ટની નિમણૂક કરીશું અને વિગતવાર ફિઝિબિલિટી રિપોર્ટ તૈયાર કરવામાં આવશે. અમે તે પછી આ પ્રોજેક્ટ માટે સંભવિત સ્થાનોને ઓળખીશું, તેમ તેમણે કહ્યું.
ઉલ્લેખનીય છે કે ગુજરાત મેરિટાઇમ બોર્ડ રૂ. 2 લાખ કરોડનો ખર્ચ કરવા જઈ રહ્યું છે. જેને પગલે વર્ષોથી સૌરાષ્ટ્રના જોડિયા અને સિક્કા જેવા જે બંદરોની ઉપેક્ષા થઈ રહી હતી. હવે તેના વિકાસના દરવાજા ખુલે તેવી આશા સેવાઈ રહી છે.
