ચૂંટણી જીતવા માટે ભારતના આડેધડ વચનો આપવામાં આવી રહ્યા છે. જે મફતની રેવડી તરીકે અત્યારે હોટ ટોપિક બન્યું છે. આ મામલો સુપ્રીમ સુધી પણ પહોંચ્યો છે. જો કે સુપ્રીમે આ મામલો કેન્દ્ર સરકાર સહિતની સંસ્થાઓ ઉપર છોડી દીધો છે. ચૂંટણી પૂર્વે આડેધડ વચનો આપવા એ માત્ર ભારતમાં જ નહીં, વિશ્વના અનેક દેશોમાં પ્રથા બની ચૂક્યું છે.
આનું શ્રેષ્ઠ ઉદાહરણ ચીલી છે. આ દેશનું અર્થતંત્ર કોરોના બાદથી જ પીડાઈ રહ્યું છે. તેમ છતાં સરકાર એક અનોખું પગલું લેવા જઈ રહ્યું છે.
ચિલીના રાષ્ટ્રપતિ ગેબ્રિયલ બોરિકની સરકારે ચૂંટણી જીતવા માટે દેશવાસીઓને અઠવાડિયામાં માત્ર 40 કલાક જ કામ કરવા માટેનો નિયમ ઘડવાનું વચન આપ્યું હતું. તેઓએ દેશમાં તેના ચૂંટણી વચનને પૂર્ણ કરવા માટે કામના કલાકો ઘટાડવાનું બિલ પસાર કરવાના પ્રયાસો ફરી શરૂ કર્યા છે. આ બીલથી લોકો દૈનિક અંદાજે 8 કલાક કામ કરશે એટલે અઠવાડિયામાં 2 રજા મળશે. હવે એક તરફ અર્થતંત્ર પીડાઈ રહ્યું છે. બીજી તરફ જો લોકો અઠવાડિયામાં 2 દિવસ કામકાજથી અળગા રહેશે તો દેશની હાલત શુ થશે તે અંગે સરકાર કોઈ વિચાર કરતી નથી.
જો આ બિલ પસાર થઈ જશે, તો આગામી પાંચ વર્ષમાં અઠવાડિયામાં કામના કલાકો 45 થી ઘટાડીને 40 થઈ જશે. આ બિલ 2017માં ચિલીની સંસદમાં રજૂ કરવામાં આવ્યું હતું અને ત્યારથી તે લટકી રહ્યું છે. બોરીકે આ બિલને ’તાકીદનું’ ગણાવ્યું છે. આ પછી, ચિલીના બંધારણ મુજબ, ધારાસભ્યોએ શક્ય તેટલી વહેલી તકે તેના પર કામ કરવું પડશે.
ચિલીના સાંસદ બોરિક સરકાર દ્વારા બિલમાં કરાયેલા અનેક ફેરફારો અંગે ચર્ચા કરશે. આમાં ચોક્કસ કેટેગરીમાં કામના કલાકો ઘટાડવા માટે સમય મર્યાદા વધારવાનો સમાવેશ થાય છે. આમાં જાહેર પરિવહન ડ્રાઇવરો અને ઘરેલું કામદારોનો સમાવેશ થાય છે.
“આ સુધારાઓ જરૂરી છે જેથી આપણે શક્ય તેટલી વહેલી તકે એક નવું ચિલી બનાવી શકીએ જે વધુ ન્યાયી છે,” બોરીકે રાષ્ટ્રપતિ ભવનમાં એક સમારોહમાં જણાવ્યું હતું. વર્તમાન કેન્દ્ર-ડાબેરી સરકારે એવા સમયે કામદારોના યુનિયનો અને કામદારોના મહાસંઘો તેમજ નાની, મધ્યમ અને મોટી કંપનીઓ સાથે સંવાદને પ્રોત્સાહન આપ્યું છે જ્યારે વિશ્વના સૌથી મોટા કોપર ઉત્પાદકની અર્થવ્યવસ્થા ધીમી પડી રહી છે અને અહીં કોરોના પછી મોંઘવારી પણ ઝડપથી વધી છે.
