ભાજપના વિરોધ વચ્ચે પણ વિધાનસભામાં આરોગ્ય અધિકાર બિલ પાસ : તબીબોએ સતત બે દિવસ વિરોધ નોંધાવ્યો, વિધાનસભામાં કુચ કરી રહેલા તબીબો ઉપર લાઠીચાર્જ અને વોટરકેનનથી બળ પ્રયોગ પણ કરાયો
રાજસ્થાન વિધાનસભામાં આરોગ્ય અધિકાર બિલ પસાર કરવામાં આવ્યું છે. રાજ્યના લોકોને આરોગ્યનો અધિકાર આપનાર રાજસ્થાન દેશનું પ્રથમ રાજ્ય બન્યું છે. જો કે વિધાનસભામાં બિલ પર ચર્ચા દરમિયાન ભાજપના ધારાસભ્યો ગૃહમાંથી વોકઆઉટ કરી ગયા હતા.વિરોધપના નાયબ નેતા રાજેન્દ્ર રાઠોડે બિલનો વિરોધ કરી રહેલા ખાનગી હોસ્પિટલોના માલિકો અને ડોક્ટરો પર લાઠીચાર્જ કરવા માટે જવાબદાર પોલીસ અધિકારીઓ સામે પગલાં લેવા અને વોટર કેનનનો ઉપયોગ કરવાની ન્યાયિક તપાસની માંગ કરી હતી.
રાઠોડે જણાવ્યું હતું કે પોલીસ દ્વારા બળપ્રયોગ કરવાથી દોઢ ડઝન ડોકટરો ઘાયલ થયા છે. બીજી તરફ ખાનગી હોસ્પિટલના માલિક અને બિલનો વિરોધ કરી રહેલા તબીબો વચ્ચે સતત બે દિવસ ઘર્ષણ થયું હતું. ડોકટરો વિધાનસભા તરફ કૂચ કરી રહ્યા હતા. આ દરમિયાન પોલીસકર્મીઓએ તેમને રોકવાનો પ્રયાસ કર્યો હતો. જ્યારે ડોક્ટર ન રોકાયા તો પોલીસકર્મીઓએ વોટર કેનન ફાયર કરીને તેમનો પીછો કર્યો હતો.
આગલા દિવસે પણ પોલીસે ડોક્ટરો પર લાઠીચાર્જ કર્યો હતો. ડોક્ટરોએ આખી રાત જયપુરના સ્ટેચ્યુ સર્કલ પર ધરણા કર્યા હતા. બીજી તરફ સરકારી હોસ્પિટલના તબીબો પણ આંદોલનકારીઓના સમર્થનમાં આવ્યા હતા. તેઓએ બે કલાક કામનો બહિષ્કાર કર્યો હતો. જેના કારણે મેડિકલ સિસ્ટમ પડી ભાંગી હતી. હોસ્પિટલોમાં પહોંચેલા દર્દીઓની સારવાર થઈ શકી ન હતી.તબીબોનો આરોપ છે કે સરકાર બિલમાં તેમની શરતો અને સૂચનો સામેલ નથી કરી રહી. બિલ પાસ થયા બાદ ડોક્ટરોએ આત્મવિલોપનની ચેતવણી આપી છે.
શુ છે ડોકટરોની માંગ ?
ઈમરજન્સી યુનિટ સિસ્ટમમાંથી ડિલિવરી દૂર કરવી જોઈએ. રાજ્ય અને જિલ્લા કક્ષાએ રચવામાં આવનાર ઓથોરિટીમાં ખાનગી હોસ્પિટલના માલિકો અને ડોક્ટરોના પ્રતિનિધિ ઓનો સમાવેશ કરવો જોઈએ. ફરિયાદો માટે સિંગલ વિન્ડો કાર્યરત કરવી જોઈએ. દર્દીને અન્ય હોસ્પિટલમાં મોકલવા પર એમ્બ્યુલન્સનો ખર્ચ સરકાર અથવા દર્દીના સગાએ ઉઠાવવો જોઈએ.
બિલમાં કેવી જોગવાઈઓ છે ?
રાજ્યમાં દરેક વ્યક્તિને ખાતરીપૂર્વક સારવાર મળશે.
સરકારી અને ખાનગી હોસ્પિટલો હવે કોઈપણ દર્દીને સારવાર આપવાનો ઇનકાર કરી શકશે નહીં.
ઈમરજન્સીના કિસ્સામાં ખાનગી હોસ્પિટલોએ મફત સારવાર આપવાની રહેશે.
ખાનગી હોસ્પિટલોમાં ઈમરજન્સી યુનિટમાં સારવાર માટે અલગ ફંડ બનાવવામાં આવશે.
હોસ્પિટલોમાં દેખરેખ માટે રાજ્ય અને જિલ્લા સ્તરે ઓથોરિટીની રચના કરવામાં આવશે.
ઓથોરિટીમાં હોસ્પિટલો અને ડોક્ટરો સામે સુનાવણી થશે. જો દોષી સાબિત થશે તો 10 થી 25 હજારનો દંડ થશે.
સત્તાધિકારીના કોઈ નિર્ણયને સિવિલ કોર્ટમાં પડકારી શકાશે નહીં.
તબીબોને વિરોધ પાછો ખેંચવા સીએમ ગેહલોતની અપીલ
મુખ્યમંત્રી અશોક ગેહલોતે ડોક્ટરોને આંદોલન પાછું ખેંચવાની અપીલ કરી હતી. તેમણે કહ્યું, ’હું વ્યક્તિગત રીતે તમામ ડોક્ટરોને અપીલ કરું છું કે સરકારની વિચારસરણી સકારાત્મક છે. ડોકટરોએ કામ પર પાછા ફરવું જોઈએ. બીજી તરફ મેડિકલ મિનિસ્ટર પરસાદી લાલ મીણાએ વિધાનસભામાં જણાવ્યું હતું કે આરોગ્યનો અધિકાર બિલ જનહિતમાં છે. સરકારના બજેટનો 60 ટકા હિસ્સો તબીબી સારવાર પાછળ ખર્ચવામાં આવે છે. 90 ટકા પરિવારો સરકારની ચિરંજીવી યોજના સાથે જોડાયેલા છે. તેમણે કહ્યું કે મોટી હોસ્પિટલો સારવારના નામે લોકોને છેતરે છે. તેમણે કહ્યું કે મૂળ બિલમાં ઈમરજન્સી યુનિટનો વિરોધ હતો. તબીબોના વાંધાના આધારે તેને બદલવામાં આવ્યો હતો. સરકારે નિર્ણય લીધો છે કે જો દર્દીની ખાનગી હોસ્પિટલોના ઈમરજન્સી યુનિટમાં સારવાર કરવામાં આવે તો તેની ભરપાઈ સરકાર દ્વારા કરવામાં આવશે. આ માટે ફંડ બનાવવામાં આવશે.
