શહેરમાં ૩ દિવસથી મેઘરાજાએ વિરામ લીધો છે છતાં સેલરનાં પાણી રાજમાર્ગો પર છોડવામાં આવતા હોવાનાં કારણે રજપુતપરા વિસ્તારમાં વગર વરસાદે જળબંબાકાર જેવી પરિસ્થિતિ જોવા મળી રહી છે. સામાન્ય રીતે નિયમ મુજબ સેલરનાં પાણી રાત્રી દરમિયાન જ રોડ ઉપર નિકાલ કરવાની જોગવાઈ છે છતાં તેનું પાલન કરવામાં આવતું નથી. પરીણામે લોકોએ ભારે હાલાકીનો સામનો કરવો પડે છે. મહિલા કોલેજ ચોકમાં અંડરબ્રીજમાં પણ વરસાદ વિના પાણી-પાણી જેવી સ્થિતિ જોવા મળી રહી છે. આ પાણી કયાંથી આવે છે અને તેનો નિકાલ કઈ રીતે કરવો તેના માટે લાખો રૂપિયા ખર્ચાઈ ગયા હોવા છતાં સમસ્યા યથાવત છે. બ્રીજમાં વિના વરસાદે પાણીની સ્થિતિ વચ્ચે અનેક વાહન ચાલકો સ્લીપ થતા હોવાની ફરિયાદો ઉઠી રહી છે છતાં તંત્ર દ્વારા તેના નિકાલ માટે કયારેય ગંભીરતા લેવામાં આવતી નથી આટલું જ નહીં દિવસે સેલરનાં પાણીનો રાજમાર્ગો પર નિકાલ કરતાં એપાર્ટમેન્ટો પર પણ કૃપાદ્રષ્ટિ રાખવામાં આવી રહી છે.
