ઇમરાન ખાને દેશની પથારી ફેરવી નાખી!!!
નાણાકીય વર્ષ 2020-21માં પાકિસ્તાને 1.12 લાખ કરોડનું નવું દેવું કર્યું, પાકિસ્તાન ઉપર કુલ દેવું 6.37 લાખ કરોડે પહોંચ્યું
દેવામાં સતત વધારાને કારણે પાકિસ્તાનની કરન્સીની વેલ્યુમાં 30.5 ટકાનો ઐતિહાસિક ઘટાડો
અબતક, નવી દિલ્હી : પાકિસ્તાન વિદેશી દેવાના બોજ નીચે દબાયેલું છે. એક નવા સરકારી અહેવાલ મુજબ, નાણાકીય વર્ષ 2020-21માં, પાકિસ્તાને 1.12 લાખ કરોડનું નવું બાહ્ય દેવું લીધું છે, જેણે 75 હજાર કરોડના અગાઉના દેવાનો રેકોર્ડને તોડ્યો છે.
વર્તમાન સરકારે માત્ર ત્રણ વર્ષમાં પાકિસ્તાનનું બાહ્ય દેવું લગભગ બમણું કર્યું છે, જે કુલ આંકડોમાં 2.62 લાખ કરોડ ઉમેરીને 6.37 લાખ કરોડ થઈ ગયું છે. આર્થિક બાબતોના મંત્રાલય દ્વારા જાહેર કરવામાં આવેલા અહેવાલમાં કહેવામાં આવ્યું છે કે ચાલુ ખાતાની ખાધ પર દબાણ ઘટાડવા, વિદેશી મુદ્રા ભંડારને મજબૂત કરવા, બાહ્ય દેવાની સેવા ક્ષમતા વધારવા અને જળ ક્ષેત્રના વિકાસ માટે જરૂરી ધિરાણ પૂરું પાડવા માટે પાકિસ્તાન દ્વારા નવી લોન લેવામાં આવી હતી
ચાલુ ખાતાની ખાધને પહોંચી વળવા માટે ભારે ઋણ લેવાનું શરૂ થઈ ગયું છે. દેવામાં સતત વધારો થવાના કારણે પાકિસ્તાની રૂપિયો ડોલર સામે 30.5 ટકા તૂટ્યો છે સપ્ટેમ્બરમાં નાણા મંત્રાલયે જણાવ્યું હતું કે કુલ જાહેર દેવુંમાં 2.9 ટ્રિલિયન પાકિસ્તાની રૂપિયા ચલણના અવમૂલ્યનને કારણે છે. પાકિસ્તાનના વડા પ્રધાન ઈમરાન ખાનની વર્તમાન સરકારના શાસનમાં છેલ્લા ત્રણ વર્ષ અને ચાર મહિનામાં અમેરિકી ડૉલર સામે પાકિસ્તાની રૂપિયો તાજેતરમાં 30.5 ટકા નબળો પડ્યો છે.
પાકિસ્તાની રૂપિયાનું મૂલ્ય ઓગસ્ટ 2018માં ડોલર સામે 123 રૂપિયાથી ઘટીને ડિસેમ્બર 2021માં 177 રૂપિયા થઈ ગયું છે, જે છેલ્લા 40 મહિનામાં 30.5 ટકાનો ઘટાડો છે. દેશના ઈતિહાસમાં આ ચલણનું સૌથી વધુ અવમૂલ્યન છે. એકમાત્ર ઉચ્ચ અવમૂલ્યન ખાસ કરીને બાંગ્લાદેશના નિર્માણ પછી થયું હતું અને પાકિસ્તાનનું ચલણ ડોલર સામે 1971-72માં રૂ. 4.60 થી રૂ. 11.10માં 58 ટકા ઘટી ગયું હતું.
