અંજારના ભુવડ વિસ્તારમાં સર્જાયેલ ગમખ્વાર અકસ્માતમાં ત્રણ મિત્રો પૈકી એકનું ઘટનાસ્થળે જ મોત

• અમદાવાદ પ્રસંગમાં જતાં મુંદ્રાના યુવાનોની કારને અજાણ્યા ટ્રક ચાલકે ટક્કર મારતા અકસ્માત સર્જાયો

અંજારના ભુવડ વિસ્તારમાં એક ગમખ્વાર અકસ્માત સર્જાયો હતો. જેમાં મુંદ્રાના યુવાનોની કારને અજાણ્યા ટ્રક ચાલકે ટક્કર મારતા એક યુવાનનું ઘટનાસ્થળે જ મોત નીપજ્યું હતું. જયારે અન્ય બે યુવાનોને ઇજા પહોંચતા સારવાર અર્થે ખસેડવામાં આવ્યા છે.

મળતી માહિતી મુજબ મુન્દ્રાના સમાગોગા ગામમાં રહેતા ત્રણ મિત્રો વિશ્વરાજસિંહ અનિરુદ્ધ સિંહ જાડેજા (ઉ.વ.23), મયુરસિંહ પ્રદીપસિંહ જાડેજા (ઉ.વ.22) અને વિજયરાજસિહ જાડેજા (ઉ.વ.આશરે 32) મુન્દ્રાથી અમદાવાદ સ્વીફ્ટ કાર જેના રજીસ્ટર નંબર જીજે-12-સીજી-4401માં લગ્ન પ્રસંગે જઈ રહ્યા હતા. દરમિયાન અંજારના ભુવડ વિસ્તારમાં સુર્યા કંપની નજીક અચાનક અજાણ્યા ટ્રકચાલકે ટક્કર મારતા અકસ્માત સર્જાયો હતો.

અકસ્માતમાં વિશ્વરાજસિંહ જાડેજાનુ ઘટના સ્થળે જ મૃત્યુ નીપજયું હતું. જયારે અન્ય બે યુવાનોમાં મયુરસિંહ જાડેજાને માથાના ભાગે અને શરીરના ભાગે ગંભીર ઇજાઓ પહોંચતા આદિપુરની ખાનગી હોસ્પિટલમાં આઈસીયુમાં સારવાર હેઠળ રાખવામાં આવ્યા છે. તથા વિજયરાજસિંહ જાડેજાને સામાન્ય ઇજાઓ પહોંચી છે. ઘટનાની જાણ થતા અંજાર પોલીસે ઘટના સ્થળે દોડી જઈ ઘટનાની નોંધ લઈ વધુ તપાસ હાથ ધરી છે.