એકમાં ફાયદો બીજામાં નુકસાની સહન કરી કંપનીઓ ભાવ સ્થિર રાખી રહ્યા છે
અબતક, નવી દિલ્હી : ઓઈલ કંપનીઓને અત્યારે પ્રતિ લિટર પેટ્રોલ પર 10 રૂપિયાનો નફો થઈ રહ્યો છે. આવી સ્થિતિ હોવા છતાં, તેના ગ્રાહકોને ફાયદો થયો નથી કારણ કે કંપનીઓએ લાંબા સમયથી કિંમતો સ્થિર રાખી છે. બીજી તરફ, તેઓ ડીઝલ પર પ્રતિ લિટર રૂ. 6.5નું નુકસાન સહન કરી રહ્યા છે.
સરકારી કંપનીઓ ઈન્ડિયન ઓઈલ કોર્પોરેશન, ભારત પેટ્રોલિયમ કોર્પોરેશન લિમિટેડ અને હિન્દુસ્તાન પેટ્રોલિયમ કોર્પોરેશનએ એપ્રિલથી પેટ્રોલ અને ડીઝલના ભાવમાં કોઈ ફેરફાર કર્યો નથી. તેઓને 24 જૂન, 2022 ના અઠવાડિયામાં પેટ્રોલ પર 17.4 રૂપિયા પ્રતિ લિટર અને ડીઝલ પર 27.7 રૂપિયા પ્રતિ લિટરનું નુકસાન થઈ રહ્યું હતું.
જોકે, ઓક્ટોબર-ડિસેમ્બર ક્વાર્ટરમાં આ કંપનીઓએ પેટ્રોલ પર નફો કર્યો છે પરંતુ ડીઝલ પર નુકસાન વેઠવું પડી રહ્યું છે. એપ્રિલ-મેમાં જ્યારે ક્રૂડ ઓઈલના ભાવ 103 ડોલર સુધી પહોંચી ગયા ત્યારે પણ આ કંપનીઓએ ભાવમાં કોઈ ફેરફાર કર્યો ન હતો. આ કારણે તેને તે સમયે મોટું નુકસાન થયું હતું. ક્રૂડ ઓઈલની કિંમત જૂનમાં 116 ડોલર થી ઘટીને 78-79 ડોલર થઈ ગઈ છે.
આ ત્રણેય કંપનીઓ 90 ટકા માર્કેટ શેર ધરાવે છે. છેલ્લા 20 વર્ષમાં પ્રથમ વખત, તેઓએ આટલા લાંબા સમય સુધી ભાવ સ્થિર રાખ્યા. તેમણે નવેમ્બરમાં કિંમતોની દૈનિક જાહેરાત બંધ કરી દીધી હતી. તે સમયે દેશમાં પેટ્રોલના ભાવ 110 રૂપિયાને પાર પહોંચી ગયા હતા. જો કે ગયા વર્ષે માર્ચના મધ્યમાં પેટ્રોલ અને ડીઝલના ભાવમાં અચાનક 10 રૂપિયા પ્રતિ લીટરનો વધારો થયો હતો. આ પહેલા પેટ્રોલ પરની એક્સાઈઝ ડ્યુટીમાં 13 રૂપિયા અને ડીઝલ પર 16 રૂપિયાનો વધારો કરવામાં આવ્યો હતો.
એપ્રિલ-સપ્ટેમ્બરમાં કંપનીઓને 21 હજાર કરોડનું નુકસાન
ક્રૂડ ઓઈલના ઊંચા ભાવને કારણે એપ્રિલ-સપ્ટેમ્બર ક્વાર્ટરમાં આ ત્રણ કંપનીઓને રૂ. 21,201 કરોડનું નુકસાન થયું હતું. જો કે, આ સમયગાળા દરમિયાન, સરકારે તેમને 22,000 કરોડ રૂપિયા પણ આપ્યા હતા. આઈસીઆઈસીઆઈ સિક્યોરિટીઝે એક રિપોર્ટમાં જણાવ્યું છે કે આઈઓસીને ડિસેમ્બર ક્વાર્ટરમાં રૂ. 1,300 કરોડ અને એચપીસીએલને રૂ. 600 કરોડનું નુકસાન થઈ શકે છે. બીપીસીએલ નફાની જાણ કરી શકે છે.
