મોદીના “દાણા-પાણી” ઋણ ચૂકવવા તાલિબાનો તત્પર
ભારતના વિદેશ મંત્રાલયના અધિકારીઓની ટીમ અફઘાનિસ્તાનની મુલાકાતે, માનવતાવાદી સહાય સહિતની સ્થિતિની સમીક્ષા: તાલિબાન સહાયના બદલામાં તમામ સહયોગ આપવા આતુર
વિકાસવાદથી આતંકવાદનો ખાત્મો બોલાવવા સરકાર સજ્જ છે. જેના ભાગરૂપે પાડોશી દેશમાં ભારતે અનેક માનવતાવાદી સહાય કરી છે. સામે મોદીના ” દાણા- પાણી”નું ઋણ ચૂકવવા તાલિબાનો તત્પર બન્યું છે. ભારતની વિદેશ મંત્રાલયની એક ટીમ અફઘાનિસ્તાનની મુલાકાતે છે. જે દરમિયાન તાલિબાને સહાયના બદલામાં તમામ સહયોગ આપવા આતુરતા દેખાડી છે.
અફઘાનિસ્તાનમાંતાલિબાનોએ સત્તા સંભાળી ત્યારથી પ્રથમ વખત, વિદેશ મંત્રાલયના વરિષ્ઠ રાજદ્વારીની આગેવાની હેઠળની એક ટીમ કાબુલ ગઈ છે અને તે દેશમાં ભારતીય માનવતાવાદી સહાય કામગીરી અને પુરવઠાની સમીક્ષા કરશે અને ત્યાં શાસક તાલિબાનના વરિષ્ઠ સભ્યોને પણ મળશે. . વિદેશ મંત્રાલયે ગુરુવારે જારી એક નિવેદનમાં આ માહિતી આપી હતી. આ ટીમનું નેતૃત્વ પાકિસ્તાન,અફઘાનિસ્તાન, ઈરાન માટે વરિષ્ઠ રાજદ્વારી જેપી સિંહ કરી રહ્યા છે. આ ટીમ તાલિબાનના વરિષ્ઠ સભ્યોને મળશે અને ભારત દ્વારા મોકલવામાં આવેલી મદદ અંગે ચર્ચા કરશે.
વિદેશ મંત્રાલયના પ્રવક્તા અરિંદમ બાગચીએ સાપ્તાહિક પ્રેસ બ્રીફિંગમાં જણાવ્યું હતું કે વિદેશ મંત્રાલયમાં સંયુક્ત સચિવ જેપી સિંહની આગેવાની હેઠળ અધિકારીઓની એક ટીમ અફઘાનિસ્તાનમાં અમારા માનવતાવાદી સહાય પુરવઠાની કામગીરીની સમીક્ષા કરવા માટે હાલમાં કાબુલમાં છે.
ટીમની સુરક્ષા અંગેના પ્રશ્નના જવાબમાં તેમણે કહ્યું કે જ્યારે અમારી ટીમ ત્યાં ગઈ છે ત્યારે અમે તેમની સુરક્ષાનું ધ્યાન રાખીએ છીએ જેથી કોઈ સમસ્યા ન થાય. અગાઉ, વિદેશ મંત્રાલયે તેના નિવેદનમાં કહ્યું હતું કે આ ટીમ માનવતાવાદી સહાય સાથે સંકળાયેલા વિવિધ આંતરરાષ્ટ્રીય સંગઠનોના પ્રતિનિધિઓને મળશે અને સંભવત: એવા સ્થળોની પણ મુલાકાત લેશે જ્યાં ભારતીય કાર્યક્રમો અથવા પ્રોજેક્ટ્સ લાગુ કરવામાં આવી રહ્યા છે.
જ્યારે કાબુલમાં ભારતીય દૂતાવાસ ખોલવાની સંભાવના વિશે પૂછવામાં આવ્યું ત્યારે વિદેશ મંત્રાલયના પ્રવક્તાએ કહ્યું કે આ સંદર્ભમાં આપણે ગયા વર્ષના ઓગસ્ટ પછીના વિકાસ પર નજર નાખવી જોઈએ. આપણે જાણીએ છીએ કે ગત 15મી ઓગસ્ટ પછી ત્યાંની બગડતી સુરક્ષા સ્થિતિને ધ્યાનમાં રાખીને ભારતમાંથી તમામ કર્મચારીઓને પરત લાવવામાં આવ્યા હતા.
જો કે, ત્યાંના સ્થાનિક કર્મચારીઓ એમ્બેસીની યોગ્ય કાળજી લે છે અને માનવતાવાદી સહાયમાં પણ મદદ કરે છે, એમ તેમણે ઉમેર્યું હતું. જ્યારે પૂછવામાં આવ્યું કે શું તે તાલિબાનને માન્યતા આપવાની દિશામાં એક પગલું છે, બાગચીએ કહ્યું કે તે સાચું છે કે ભારતીય ટીમની કાબુલની આ પ્રથમ મુલાકાત હતી પરંતુ આ મુલાકાત માનવતાવાદી સહાય અને વિતરણ સાથે સંબંધિત છે અને વધુ અનુમાન ન કરવું જોઈએ. પર આજે આ પહેલા વિદેશ મંત્રાલયે એક નિવેદનમાં જણાવ્યું હતું કે અફઘાનિસ્તાનના લોકોની જરૂરિયાતોને ધ્યાનમાં રાખીને ભારતે અત્યાર સુધીમાં 20 હજાર મેટ્રિક ટન ઘઉં, 13 ટન દવા, કોવિડ વિરોધી રસીના પાંચ લાખ ડોઝ મોકલ્યા છે. ગરમ કપડાં વગેરે આ સામગ્રી કાબુલમાં ઈન્દિરા ગાંધી ચિલ્ડ્રન હોસ્પિટલ, ડબ્લ્યુએચઓ, ડબ્લ્યુઇપી જેવી યુએન એજન્સીઓને સોંપવામાં આવી છે.
મંત્રાલયે કહ્યું, “અફઘાનિસ્તાનના લોકો સાથે અમારી વિકાસ ભાગીદારી ચાલુ રાખીને, અમે ઈરાનમાં રહેતા અફઘાન શરણાર્થીઓને ડોઝ આપવા માટે ઈરાનને ભારતમાં નિર્મિત કોવેક્સીનના 10 લાખ ડોઝ આપ્યા છે.” તેમાં કહેવામાં આવ્યું છે કે, “પોલીયો રસીના 60 મિલિયન ડોઝ અને બે ટન આવશ્યક દવાઓ અફઘાન લોકો માટે યુનિસેફને સપ્લાય કરવામાં આવી છે.”
નિવેદન અનુસાર, ભારતથી અફઘાનિસ્તાનમાં વધુ તબીબી સહાય અને અનાજ મોકલવાની પ્રક્રિયા ચાલી રહી છે. વિદેશ મંત્રાલયે કહ્યું કે અફઘાનિસ્તાનમાં ભારત દ્વારા આપવામાં આવી રહેલી મદદની વ્યાપક પ્રશંસા કરવામાં આવી રહી છે. તેમાં કહેવામાં આવ્યું છે કે અફઘાનિસ્તાન સાથે ભારતના ઐતિહાસિક અને સભ્યતાના સંબંધો છે અને તે અમારા સ્ટેન્ડને માર્ગદર્શન આપશે.
ઉલ્લેખનીય છે કે, ભારત અફઘાનિસ્તાનમાં થઈ રહેલી ઘટનાક્રમ પર ચિંતા વ્યક્ત કરી રહ્યું છે. ભારતે નવેમ્બરમાં અફઘાનિસ્તાન પર પ્રાદેશિક સંવાદનું આયોજન કર્યું હતું જેમાં રશિયા, ઈરાન, કઝાકિસ્તાન, કિર્ગિસ્તાન, તાજિકિસ્તાન, તુર્કમેનિસ્તાન, ઉઝબેકિસ્તાનના રાષ્ટ્રીય સુરક્ષા સલાહકારોએ ભાગ લીધો હતો. વાટાઘાટોમાં ભાગ લેનારા દેશોએ અફઘાનિસ્તાન વૈશ્વિક આતંકવાદનું આશ્રયસ્થાન ન બને તે સુનિશ્ચિત કરવા માટે કામ કરવાનો સંકલ્પ કર્યો. આ દેશોએ અફઘાનિસ્તાનમાં ’ખુલ્લી અને સાચા અર્થમાં સમાવિષ્ટ’ સરકારની રચના માટે હાકલ કરી, જેમાં અફઘાનિસ્તાનના તમામ વર્ગોનું પ્રતિનિધિત્વ કરવામાં આવે. દિલ્હીમાં અફઘાનિસ્તાનના વિષય પર પ્રાદેશિક સુરક્ષા સંવાદના અંતે જારી કરાયેલ એક ઘોષણામાં, તેમણે કહ્યું અફઘાનિસ્તાનની જમીનનો ઉપયોગ ધિરાણ, આશ્રય, તાલીમ અથવા કોઈપણ આતંકવાદી ગતિવિધિઓના આયોજન માટે ન થવો જોઈએ તે અંગે સહમતિ સધાઈ હતી.ભારત અફઘાનિસ્તાનમાં માનવતાવાદી સંકટને પહોંચી વળવા માટે અફઘાનિસ્તાનને અવિરત માનવતાવાદી સહાયની હિમાયત કરી રહ્યું છે.
જમ્મુ-કાશ્મીરમાં આતંકવાદનો સફાયો કરવા મેગા ઓપરેશનની તૈયારી
જમ્મુ-કાશ્મીરમાં છેલ્લા કેટલાક દિવસોથી સ્થિતિ સતત બગડી રહી છે. આતંકવાદીઓ ફરી એકવાર ઘાટીમાં લોકોને નિશાન બનાવી રહ્યા છે અને હત્યાનો સિલસિલો જારી રહ્યો છે. જમ્મુ-કાશ્મીરમાં છેલ્લા 26 દિવસમાં આતંકીઓએ 10 લોકોની હત્યા કરી છે. જેના કારણે ઘાટીમાં ફરી એકવાર આતંકનો પડછાયો ઘેરાઈ રહ્યો છે. રાજસ્થાનના એક બેંક મેનેજરની બુધવારે હત્યા કરવામાં આવી હતી, જ્યારે સાંજે આતંકવાદીઓ દ્વારા એક મજૂરની હત્યા કરવામાં આવી હતી. આજે જ્યાં ગૃહમંત્રી અમિત શાહ જમ્મુ-કાશ્મીરની તાજેતરની સ્થિતિ અંગે ચર્ચા કરવા માટે એક મોટી બેઠક યોજવાના છે, ત્યારે આજે કાશ્મીરી પંડિતોએ ટાર્ગેટ કિલિંગ સામે સામૂહિક હિજરતની વાત કરી છે. લોકો ડરી ગયા છે. લોકો હવે ઘાટી છોડી રહ્યા છે. જેને પરિણામે હવે સરકાર નક્કર પગલું લેવા જઇ રહી છે. સરકાર દેશની અંદરના દુશ્મનોને ઝેર કરવા તૈયારી કરી રહી છે.
