- યુરોપના 29 દેશોમાં જવા માટે શેંગેન વિઝાની પડે છે જરૂર: હાલમાં શેંગેન વિઝા હેઠળ 180 દિવસની અંદર 90 દિવસ સુધી ટ્રાવેલ કરી શકાય છે: નવા ફેરફાર પ્રમાણે હવે મલ્ટીપલ એન્ટ્રીની પણ છૂટ મળશે
ભારતીયોને શેંગેન વિઝા મામલે મોટી રાહત મળી છે. યુરોપિયન યુનિયનના મોટા ભાગના દેશોની મુલાકાત લેવા માટે શેંગેન વિઝા જરૂરી છે. યુરોપિયન યુનિયને આ વિઝાના નિયમો હળવા કર્યા છે જેના કારણે ભારતીયોને 5 વર્ષની વેલિડિટી સાથેના શેંગેન વિઝા મળી શકે છે. આ ઉપરાંત યુરોપિયન યુનિયને વિઝા કાસ્કેડ રેજિમની નવી વ્યવસ્થા લાગુ કરી છે જેના કારણે મલ્ટિપલ એન્ટ્રીની પણ સગવડ મળે છે.
શેંગેન એરિયામાં યુરોપના 29 દેશોનો સમાવેશ થાય છે અને તેમાંથી 25 દેશો યુરોપિયન યુનિયનના મેમ્બર છે. હાલમાં શેંગેન વિઝા હેઠળ 180 દિવસની અંદર તમે શેંગેન એરિયામાં 90 દિવસ સુધી ટ્રાવેલ કરી શકો છો. પરંતુ તેમાં તમે ક્યાંય વર્ક કરી શકતા નથી. 18 એપ્રિલે યુરોપિયન યુનિયને કેટલીક છૂટછાટને મંજૂરી આપી છે. તેથી હવે માઈગ્રેશન અને મોબિલિટી વધારવા માટે લાંબા ગાળાના વિઝાને મંજૂરી આપવામાં આવી છે. અગાઉ શેંગેન ક્ધટ્રીઝ દ્વારા મોટા ભાગે શોર્ટ ટર્મ વિઝા આપવામાં આવતા હતા. ભારતીય ટ્રાવેલર્સ વારંવાર શેંગેન એરિયાની મુલાકાતે જતા હોય તો પણ તેમને શોર્ટ ટર્મ વિઝા જ ઈશ્યૂ કરાતા હતા.
શેંગેન વિઝા એક એવા વિઝા છે, જે બિન-યુરોપિયન લોકોને યુરોપિયન યુનિયનના દેશોમાં મુસાફરી કરવા અને ત્યાં ટૂંકા સમય માટે રહેવાની મંજૂરી આપે છે. એન્ટ્રીની તારીખથી જ વિઝાની માન્યતા શરૂ થાય છે અને મહત્તમ 90 દિવસ સુધી ચાલે છે.
આ સુધારાના કારણે સૌથી વધુ ફાયદો એવા ભારતીયોને થશે જેમણે વારંવાર યુરોપિયન યુનિયનના દેશોમાં જવાનું થાય છે. તેમણે હવે દર વખતે શેંગેન વિઝા માટે અરજી કરવાની જરૂર નહીં રહે. તમારો પાસપોર્ટ વેલિડ હોય અને તમારી ટ્રાવેલ હિસ્ટ્રીને લઈને કોઈ શંકા ન હોય તો તમને 5 વર્ષની વેલિડિટી સાથેના શેંગેન વિઝા મળી શકે છે.
શેંગેન વિઝા મેળવવા ભારતીયો માટે વધારે કઠિન છે અને તેમાં રિજેક્શનનું પ્રમાણ સૌથી ઉંચું છે. અમેરિકા આજે 10 વર્ષના વિઝિટર વિઝા આપે છે અને યુકે પણ એક લાખ રૂપિયાની ફીના બદલામાં એટલી જ વેલિટિડીના વિઝા ઈશ્યૂ કરે છે. તેની તુલનામાં શેંગેન વિઝાની વેલિડિટી ઓછી છે, પરંતુ આ એક મોટી રાહત છે.
શેંગેન એરિયામાં હવે વિઝા કાસ્કેડ રેજિમ લાગુ કરવામાં આવશે જેથી ભારતીયોએ અગાઉના ત્રણ વર્ષમાં કાયદેસર રીતે બે વિઝા મેળવ્યા હોય તો તેમને બે વર્ષની વેલિડિટી સાથે લોંગ ટર્મ મલ્ટિ-એન્ટ્રી શેંગેન વિઝા મળી શકે છે. બે વર્ષના વિઝા પછી પાંચ વર્ષની વેલિડિટીના વિઝા મળશે. જોકે, તેના માટે પાસપોર્ટમાં પૂરતો સમયગાળો બાકી હોવો જરૂરી છે. યુરોપિયન યુનિયને જણાવ્યું છે કે આ વિઝાની વેલિડિટીના ગાળા દરમિયાન વિઝાહોલ્ડરો વિઝા ફ્રી નાગરિકોની જેમ જ ટ્રાવેલિંગ રાઈટ્સ ધરાવશે. ભારત અને યુરોપિયન યુનિયન પોતાના સંબંધોને ગાઢ બનાવવા માગે છે ત્યારે આ જાહેરાત કરવામાં આવી છે. આ ફેરફાર થયા તે અગાઉ શેંગેન ક્ધટ્રીઝ દ્વારા યુરોપની વારંવાર મુલાકાત લેતા ટ્રાવેલર્સને વિઝા આપવામાં આવતા હતા.
ભારતમાં છ મહિના, બે વર્ષ અને પાંચ વર્ષના વિઝા બહુ ઓછા જોવા મળે છે. દર વખતે ઈયુના મેમ્બર દેશની મુલાકાત લેવામાં આવે ત્યારે લોકોએ તેની ફી ભરવી પડે છે, એટલું જ નહીં, તેમણે નવેસરથી આખું પેપરવર્ક પણ કરવું પડે છે. એક ટ્રાવેલ એેજન્ટે કહ્યું કે મારા ક્લાયન્ટ યુરોપથી ભારત આવવાના હોય તે દિવસે જ વિઝા એક્સપાયર થતો હોય ત્યારે બહુ ચિંતામાં રહે છે. તે દિવસે ફ્લાઈટ કેન્સલ થાય તો તેમની કેવી હાલત થાય. આવી સ્થિતિમાં ફ્રિક્વન્ટ ટ્રાવેલર્સને ખરેખર મોટો લાભ મળવાનો છે.
