ભારતમાં નિર્માણ થયેલી એપલ પ્રોડક્ટસ વૈશ્ર્વિક સ્તરે છવાઈ જશે!!
ભારત એપલના ફ્લેગશિપ આઇફોન 14 સ્માર્ટફોનનું ઉત્પાદન કરવા માટે તૈયાર છે અને કંપનીએ પુષ્ટિ કરે છે કે ઉપકરણો ભારતમાં કોન્ટ્રાક્ટ-નિર્માતા ફોક્સકોનની ફેક્ટરી શ્રીપેરુમ્બુદુર, તમિલનાડુમાં બનાવવામાં આવશે. આ કદાચ સૌથી ઝડપી સ્કેલ-અપ હશે જે એપલ દ્વારા તેના ભારતમાં મેન્યુફેક્ચરિંગ સેટઅપમાં શરૂ કરવામાં આવ્યું છે જેમાં 7 સપ્ટેમ્બરે તેના વૈશ્વિક અનાવરણના અઠવાડિયાની અંદર નવીનતમ આઈફોન અહીં બનાવવામાં આવશે.
આ અંગે એપલ દ્વારા સત્તાવાર રીતે પુષ્ટિ કરવામાં આવી છે. આઈફોન 14 લાઇન-અપ ગ્રાઉન્ડ-બ્રેકિંગ તકનીકો અને મહત્વપૂર્ણ સલામતી ક્ષમતાયુક્ત હશે. અમે ભારતમાં ઉપકરણનું ઉત્પાદન કરવા માટે ઉત્સાહિત છીએ, તેવું એપલે એક નિવેદનમાં જણાવ્યું હતું. સૂત્રોએ જણાવ્યું હતું કે ભારતમાં નિર્મિત ઉપકરણો માત્ર દેશમાં જ વેચવામાં આવશે નહીં પરંતુ વૈશ્વિક બજારોમાં પણ નિકાસ કરવામાં આવશે. જો કે, ભારતમાં ઉત્પાદનનો અર્થ એ નથી કે ઉપકરણોની કિંમત ઓછી રાખવામાં આવે. એપલ પાસે હાલમાં તેના ટોચના 3 વૈશ્વિક ઉત્પાદન ભાગીદારો ભારતમાં સ્માર્ટફોન બનાવે છે. જેમાં વિસ્ટ્રોન, ફોક્સકોન અને પેગાટ્રોનનો સમાવેશ થાય છે. કંપનીએ આઈફોન એસઇ સાથે 2017 માં ભારતમાં આઈફોન બનાવવાની શરૂઆત કરી હતી. હાલમાં એપલ ભારતમાં આઈફોન એસઇ, આઈફોન 12 અને આઈફોન 13 પણ બનાવે છે. એપલના ત્રણેય ઉત્પાદકો સરકારની પ્રોડક્શન-લિંક્ડ ઇન્સેન્ટિવ સ્કીમ(પીએલઆઈ)ના ભાગ રૂપે પૂરા પાડવામાં આવેલા પ્રોત્સાહનનો લાભ લેશે.
ભારતમાં આઈફોન 14નું ઉત્પાદન કરવાનો નિર્ણય એવા સમયે લેવામાં આવ્યો છે જ્યારે ચાઈનાએ વિશ્વભરમાંથી વિશ્વસનીયતા ગુમાવી દીધી છે. એક આંકડા અનુસાર અમેરિકી જાયન્ટ કંપની એપલની 95% પ્રોડક્ટ્સનું ઉત્પાદન ચાઈનામાં થતું હતું પરંતુ હવે એપલ ચાઈનાનો વિકલ્પ શોધી રહી છે ત્યારે ભારતમાં આઈફોન 14 બનાવવાનો નિર્ણય ભારતને ચાઈનાના વિકલ્પ તરીકે એપલ જોઈ રહી હોય તેવો સૂચક નિર્ણય છે. ભારત સરકારે અમેરિકન ઈલેક્ટ્રોનિક્સ કંપનીને 5-6 વર્ષમાં દેશમાં 50 બિલિયન ડોલરનું વાર્ષિક ઉત્પાદન કરવા અને મેકબુક્સ, આઇપેડ્સ, ઈયર પોડ્સ અને ઘડિયાળોનો સમાવેશ કરવા માટે આઈફોન ઉપરાંત તેની સ્થાનિક રીતે નિર્મિત પ્રોડક્ટ કીટીને વિસ્તારવા જણાવ્યું હોવાનું માનવામાં આવે છે. એપલ તેના અન્ય ઉત્પાદનો માટે મેક ઇન ઇન્ડિયા પ્રોગ્રામનો અભ્યાસ કરી રહી છે, પરંતુ અત્યાર સુધી તેણે ફક્ત આઈફોન માટે જ રોકાણ કર્યું છે. જો કે, એપલને ભારત માટે ઉત્પાદન ક્ષમતા ઉજ્જવળ દેખાય છે. સપ્ટેમ્બર 2021 માં પૂરા થયેલા નાણાકીય વર્ષમાં એપલની વૈશ્વિક આવક 365 બિલિયન ડોલર હતી, જેમાંથી 191 બિલિયન ડોલર આઈફોનમાંથી આવી હતી. જ્યારે લગભગ 67 બિલિયન ડોલર મેકબુક્સ અને આઇપેડ્સમાંથી આવી હતી.
