- એસએમસીએ આંતરરાષ્ટ્રીય ડ્રગ્સ રેકેટની કડી ઝડપી
- સ્ટેટ મોનીટરીંગ સેલ પોલીસ સ્ટેશનમાં એનડીપીએસ એક્ટ હેઠળ પ્રથમ ગુનો નોંધાયો
સ્ટેટ મોનીટરીંગ સેલ હાલ સુધી દારૂ-જુગાર સહીતની બદ્દી ડામવા કાર્યરત હતી ત્યારે હવે એસએમસી પોલીસ સ્ટેશન બન્યા બાદ મહત્વની બ્રાન્ચએ માદક પદાર્થના વેચાણ પર ધોસ બોલાવવાનું શરૂ કર્યું છે. એસએમસી પોલીસ સ્ટેશનમાં પ્રથમવાર એનડીપીએસ એક્ટ હેઠળ ગુનો નોંધાયો છે. બ્રાન્ચે નવસારીથી રૂ. 1.50 કરોડના કોકેન સાથે નાઇજીરીયન યુવતીની ધરપકડ કરી છે.
રાજ્યના મુખ્યમંત્રી ભૂપેન્દ્ર પટેલના દિશા નિર્દેશમાં ગુજરાતના યુવાઓને ડ્રગ્સની બદીથી દુર રાખવા ડ્રગ્સ સામે રીતસરની જંગ છેડી છે, ત્યારે રાજ્યમાંથી દારૂ જુગાર ઉપરાંત ડ્રગ્સના કેસો શોધી કાઢીને માફિયાઓ સુધી પહોંચવા ગૃહ રાજ્ય મંત્રી હર્ષ સંઘવી દ્વારા સ્ટેટ મોનિટરીંગ સેલ પોલીસ સ્ટેશનમાં ખાસ ટીમ બનાવવા સૂચનાઓ આપવામાં આવી હતી.
જે અંતર્ગત સ્ટેટ મોનિટરિંગ સેલ પોલીસ સ્ટેશનમાં એનડીપીએસ એક્ટનો પ્રથમ કેસ નોંધાયો છે. એસએમસી પોલીસ સ્ટેશનની ખાસ ટીમે રૂ. 1.50 કરોડના કોકેન સાથે એક નાઇજિરિયન યુવતીને નવસારીથી પકડી તેની સામે કાર્યવાહી શરૂ કરી છે.
ગુજરાત રાજ્યમાં કાયદો અને વ્યવસ્થાની સ્થિતિને વધુ મજબૂત બનાવવા અને ઓર્ગેનાઈઝ્ડ ક્રાઇમ સામે લડત વધુ અસરકારક બનાવવા માટે ગુજરાત ગૃહ વિભાગે તાજેતરમાં સ્ટેટ મોનિટરિંગ સેલને અલાયદા પોલીસ સ્ટેશનનો દરજ્જો આપી, તેને વિશેષ સત્તાઓ આપવા ઐતિહાસિક નિર્ણય લીધો હતો. દરમિયાન ગૃહ રાજ્ય મંત્રીની સુચના મુજબ ડ્રગ્સ હેરાફેરી અંગે બાજ નજર રાખી ડ્રગ્સ ડિલીવરી પહેલા જ પેડલરોને પકડવા એસએમસી પોલીસ સ્ટેશનની ખાસ ટીમને મોટી સફળતા મળી છે.
પોલીસ સૂત્રોમાંથી પ્રાપ્ત વિગત અનુસાર નાઇજીરીયન યુવતી મુંબઈથી ડ્રગ્સ લઈને ડિલિવરી આપવા નવસારી આવી હતી. યુવતીને ડિલિવરીનું લોકેશન આપવામાં આવ્યું હતું જ્યાંથી પેડલર ડિલિવરી લઇ જવાનો હતો. હવે કોકેન મંગાવનાર શખ્સ, નાઇજીરિયન યુવતી ભારત કેવી રીતે આવી, તેના વિઝાની ખરાઈ સહીતની કડીઓ અંગે એસએમસીએ તપાસ શરૂ કરી છે.
એસએમસીના ડી.આઇ.જી નિર્લિપ્ત રાય અને ડીવાયએસપી કે ટી કામરીયાની આગેવાનીમાં આ કામગીરી ગુજરાતમાં ડ્રગ્સ માફિયાને નાબૂદ કરવા માટે એસએમસી પોલીસ સ્ટેશનની ટૂંક સમયમાં વધતી જતી સક્રિય ભૂમિકા દર્શાવે છે.
