કોંગ્રેસના અંદરનાં કકળાટથી લોકસભાની ચૂંટણી પૂર્વે ભારે તોડ-જોડ થવાની ભીતિ: સિનિયરોની નારાજગી તેમજ રાજકોટ, સુરત અને અમદાવાદમાં ઉકળતો ચરૂ કોંગ્રેસ પક્ષ માટે ચિંતાનો વિષય

લોકસભાની ચૂંટણીને હવે ત્રણ મહિનાનો સમય બાકી છે. ત્યારે ભાજપ પક્ષ ચૂંટણીની તૈયારીમાં મસ્ત છે. સામે કોંગ્રેસ પક્ષ કજીયામાં વ્યસ્ત છે. કોંગ્રેસનો અંદરનો કકળાટ લોકસભાની ચૂંટણી પૂર્વે ભારે તોડ-જોડ સર્જી શકે તેવી ભીતિ સેવાઈ રહી છે. કોંગ્રેસમા સિનિયરોની નારાજગી તેમજ રાજકોટ, સુરત અને અમદાવાદમાં ઉકળતો ચરૂ પક્ષ માટે ચિંતાનો વિષય બન્યો છે.

આગામી માર્ચ કે એપ્રિલ મહિનામાં લોકસભાની ચૂંટણી યોજાનાર છે. ત્યારે ભાજપ દ્વારા બેઠકો પર વિજય મેળવવાનો તખ્તો ઘડીને તૈયારીઓનો ધમધમાટ ચાલી રહ્યો છે. સામે કોંગ્રેસ લોકસભાની તૈયારીઓ તોદૂરની વાત છે. પરંતુ સંગઠનને ટકાવી રાખવા માટે મથી રહ્યું છે. હાલ કોંગ્રેસની સ્થિતિ એક સાંધો ત્યાં તેર તૂટે તેવી થઈ જવા પામી છે. મળતી માહિતી મુજબ સીનીયર નેતાઓએ બગાવતના સૂર પોકારીને હાઈકમાન્ડ સમક્ષ બળાપો ઠાલવવાનું નકકી કર્યું છે. તાજેતરમાં જ અર્જુન મોઢવાડીયા, દિનશા પટેલ સહિતના સીનીયરોએ બેઠક યોજી પ્રદેશ પ્રમુખ અમિત ચાવડા સામે બળાપો કાઢ્યો હતો. સાથે એવું પણ કહ્યું હતુ કે મનઘડત નિર્ણયને કારણે કોંગ્રેસ પક્ષ નબળુ પડી રહ્યું છે. આજ પ્રકારે અમદાવાદ અને સુરતમાં પણ કોંગ્રેસનો અંદરનો કકળાટ સામે આવ્યો હતો. સુરતમાં ડઝનથી પણ વધુ પદાધિકારીઓએ સંગઠનના માળખામાં ભેદભાવ ભરી નીતિ અપનાવવામાં આવી હોવાના આક્ષેપ સાથે રાજીનામા ઘરી દીધા હતા.

કોંગ્રેસના અંદરનાં કકળાટમાં રાજકોટ જિલ્લો પણ બાકાત રહ્યો નથી. ફરિયાદ સેલનાં પ્રમુખ ધર્મેશ ઢાંકેચા અને ઉપપ્રમુખ શૈલેષ કપુરીયા વચ્ચે જસદણ વિધાનસભા બેઠકની પેટા ચૂંટણી બાબતે ઉગ્ર બોલાચાલી થઈ હતી. આ બોલાચાલી ઉગ્ર સ્વરૂપ ધારણ કરીને ગાળાગાળીમાં પરિણામી હતી.

ધર્મેશ ઢાંકેચાએ આ મામલે જિલ્લા કોંગ્રેસ પ્રમુખ હિતેશ વોરાને ફરિયાદ કરી હતી સાથે ધર્મેશ ઢાંકેચાએ આ મુદે અવસર નાકીયા, હેમાંગ વસાવડા સુધી પણ વાત પહોચાડી હતી. જયારે જિલ્લા કોંગ્રેસ પ્રમુખ હિતેશ વોરાએ આ મામલે કોઈ કાર્યવાહી કરવાની તૈયારી ન બતાવતા આમુદો છેક પ્રદેશ કક્ષાએ પણ પહોચ્યો હોવાનું સુત્રોમાંથી જાણવા મળ્યું છે.

જિલ્લા કોંગ્રેસ પ્રમુખ હિતેશ વોરા પોતાની સામે ગેરશિસ્ત આચરવા બદલ ફરિયાદ સેલનાં ધર્મેશ ઢાંકેચાને નોટીસ ફટકારવાનાં હોવાનું પણ સુત્રોમાંથી જાણવા મળ્યું છે.

ઉલ્લેખનીય છે કે રાજકોટ જિલ્લા કોંગ્રેસનું નવુ માળખું જાહેર થયું ત્યારથીજ આગેવાનો અને કાર્યકરોમાં અસંતોષની લાગણી પ્રસરી હતી.

નવા માળખાથી ફેલાયેલી આ નારાજગી પણ પ્રદેશ કક્ષાએ પહોચી હતી તે સમયે આગેવાનોએ એવો આક્ષેપો કર્યા હતા કે નવા માળખામાં જુના આગેવાનોને સાઈડલાઈન કરવામાં આવ્યા છે.

કોંગ્રેસમાં સર્જાયેલા આંતરીક કકળાટથી નજીકના દિવસોમાં ભારે તોડજોડ થવાની શકયતાઓ સેવાઈ રહી છે. ગઈકાલે જ કેબીનેટ મંત્રી કુંવરજીભાઈ બાવળીયાએ એવો દાવો પણ કર્યો હતો. કે કોંગ્રેસના નારાજ નેતાઓ તેમના સંપર્કમાં છે. કોંગ્રેસના આ આંતરીક કજીયાથી ભાજપને લાભાલાભ જ છે એક તરફ ભાજપ લોકસભા બેઠકો કબ્જે કરવા તૈયારીઓ કરી રહ્યું છે. ત્યારે બીજી બાજુ કોંગ્રેસ પોતાના સંગઠનને તુટતુ રોકવા માટે કમર કસી રહ્યું છે. ��