- રાજકોટના દંપતીએ છૂટાછેડા લીધા બાદ હાઇકોર્ટમાં પુત્રીના જન્મ પ્રમાણપત્રમાંથી પિતાનું નામ કમી કરવા અરજી
- મારી દીકરીના જૈવિક પિતા તમે નથી: માતાએ સ્વીકાર્યા બાદ કોર્ટના દરવાજા ખખડાવતા પાલક પિતા
બાળકને દત્તક લીધા બાદ તેના નામ પાછળ પિતાના નામનો ઉમેરો કરવા અનેક અરજીઓ થતી હોય છે પણ જન્મ પ્રમાણપત્રમાં બાળકના નામ પાછળથી પિતાનું નામ કાઢી નાખવાની એક અરજીએ ચર્ચા જગાવી છે. રાજકોટના એક રહેવાસીએ તેની પુત્રીના જન્મ રેકોર્ડમાંથી પોતાનું નામ દૂર કરવાની માંગ કરી છે.
સમગ્ર મામલા પર નજર કરવામાં આવે તો વર્ષ 2019માં અરજદારે પત્નીને છૂટાછેડા આપ્યા બાદ ગુજરાત હાઈકોર્ટનો દરવાજો ખખડાવ્યો હતો અને વિનંતી કરી હતી કે તેનું નામ 18 વર્ષની છોકરીના પિતા તરીકે દૂર કરવામાં આવે, જે તેની માતા સાથે રહે છે. આ દંપતીએ વર્ષ 2000 માં લગ્ન કર્યા હતા અને એક પુત્ર અને પછી 2007માં એક પુત્રીના માતા-પિતા બન્યા હતા. પુરુષને પુત્રી સાથેના તેના જૈવિક સંબંધ પર શંકા હતી કારણ કે તે ગર્ભધારણ સમયે અમદાવાદમાં રહેતો હતો જ્યારે તેની પત્ની રાજકોટમાં રહેતી હતી.
પુત્રીના લગ્ન પછી દંપતી વચ્ચેના સંબંધો વધુ બગડ્યા, જેના પરિણામે રાજકોટ ફેમિલી કોર્ટ દ્વારા તેમના છૂટાછેડા મંજુર કરવામાં આવ્યા હતા. બાદમાં પત્નીએ સ્વીકાર્યુ હતું કે, અરજદાર છોકરીનો જૈવિક પિતા(બાયોલોજીકલ) નથી અને આ બાબતની ખાતરી સ્વીકૃત છૂટાછેડાના હુકમનામામાં નોંધાયેલી છે.
આ હુકમનામાંનો ઉપયોગ કરીને તેમણે હાઇકોર્ટને અરજી કરી કે તેઓ જન્મ અને મૃત્યુ રજિસ્ટ્રારને પુત્રીના જન્મ પ્રમાણપત્રમાંથી પિતા તરીકેનું નામ કાઢીને સુધારો કરવાનો નિર્દેશ આપે. અરજદાર ભવિષ્યમાં વારસાઈ મિલ્કત સંબંધિત ગૂંચવણો ટાળવા માટે તેનું નામ કાઢી નાખવાની માંગ કરી રહ્યા છે, એમ તેમના વકીલે જણાવ્યું હતું.
અરજીની તાજેતરમાં સુનાવણી થઈ હતી, જેમાં હાઇકોર્ટના ન્યાયાધીશે ભારપૂર્વક જણાવ્યું હતું કે આ મુદ્દાના યોગ્ય નિર્ણય માટે બાળકની માતાની જુબાની જરૂરી છે. અરજદારના વકીલે દલીલ કરી હતી કે છૂટાછેડા લીધેલી પત્નીને મુકદ્દમામાં સામેલ કરવી બિનજરૂરી છે અને તેને અયોગ્ય તકલીફ આપશે. ફેમિલી કોર્ટના છૂટાછેડા હુકમનામામાં મહિલાએ પિતૃત્વ અંગે દસ્તાવેજીકૃત કબૂલાત કરી હોવા છતાં, હાઇકોર્ટે જાળવી રાખ્યું હતું કે માતાની હાજરી આવશ્યક છે કારણ કે અરજી “તથ્યોની શુદ્ધતા” કરતાં નામ કાઢી નાખવા અંગે હતી.
અરજદારના વકીલે મહિલાને શોધવા અને તે મુજબ અરજીમાં ફેરફાર કરવા માટે ચાર અઠવાડિયાનો સમય માંગ્યો હતો. હાઇકોર્ટે તેના આદેશમાં નોંધ કરીને સુનાવણી મુલતવી રાખી હતી. હવે મામલાની વધુ સુનાવણી 5 મે, 2025 ના રોજ હાથ ધરવામાં આવનાર છે.
